भांगरभूंय | प्रतिनिधी
रामायण आनी महाभारत हे दोन राष्ट्रीय ग्रंथ आमकां खूब कितें शिकयतात. रामायण आमकां मुल्यां आनी महाभारत लोकां कडेन कशें वागचें हाचीं मुल्यां शिकयता. आदल्या तेंपार उच्च शिक्षण नाशिल्लें, पूण ह्या दोन ग्रंथांची शिकवण आमकां खूब कितें शिकयताली. प्रभू राम खंयचे वाटेन आयलो, खंय पावलो हें आमकां आतां कळूंक लागलां. व्हडले संशोधक, कलाकार हाचेर काम करतात. कोण उलोवपां करतात, तर कोण चित्र काडून सांगतात. असोच एक कर्नाटकाचो कलाकार वारली चित्रांचो आदार घेवन रामायण आॅनलायन कोर्सांतल्यान सांगपाचो बरो यत्न करता. तो आसा मधुसूदन महाले. ह्या तीन दिसांच्या आॅनलायन कोर्सांतल्यान तो रामायण निर्मितीची गजाल सांगता. तशेंच वांगडा वारली शैलींतलीं चित्रां आसतात. विशेश म्हणल्यार संवसारांत हाका मान आसा.
संगितांत व्हडलीं घराणीं आसतात, तशेंच चित्रकलेंतूय वेगळीं वेगळीं शैली आसता. वारली हो प्रकार वेगळो. महाराष्ट्रांतल्या वारली आदिवासीं कडल्यान ही चित्रकलाक संवसारभर पावल्या. सदचे जिणेंतल्या परंपरांचें चित्र हातूंत दाखयतात, जी मातयेचे वण्टीर काडटात. तातूंत शेती, सैम, लग्न, सण, उत्सव सारक्या गजालींचो आसपाव आसता. वारली चित्रकला तांदळाची पेस्ट वापरून काडटात. चडशे वेळार बायलोच तीं चित्रां काडटात. तातूंत रामायण हो पारंपरीक विशय आशिल्ल्याचें दिसता.
मधुसूदन महाले हांचो जल्म होन्नावराक जालो. 27 आॅगस्ट 1988 दिसा ते जल्मले. अभियांत्रिकेची पदवी घेतले उपरांत ते पद्व्युत्तर पदवी घेतना ए आय आनी मशिन लर्निंग हे विशय घेतले. ते खेरीज तांणी स्टार्ट अपांत उडकी घेत होनिवेल सस्केन जे एस डब्ल्यू गपशप ह्या स्टार्टअपा खातीर काम केलें. ते खेरीज तांणी अभियांत्रिकी आनी तंत्र आतूंत काम केलें. ते सांगतात हांव चित्र काडिना, तर चित्र बरयतां. 350 वर्ग तांणी घेतल्यात. तांणी स्वताच होव विशय सोदलो. तो पुराणकाळ परंपरे कडेन जोडिल्लो आशिल्ल्यान वारली शैली वापरली. कारण वारली ही कला, परंपरा, संस्कृतीक चड म्हत्व दिता. खेरीज तातूंत बायलां आसतात, जीं सगली कल्पनाशक्त घालून चित्रां काडटात.
ते म्हणटात, ‘हेर धर्मीक ग्रंथा परस रामायणांत जी शक्त आसा, ती वेगळीच. म्हाका ही देवता चड आवडटा. आतांचे भुरगे सोडात, पूण तरणाटेय आमची परंपरा, इतिहास विसरत चल्ल्यात. तांची कारण दिवपाची ही सुवात न्हय. म्हज्या प्रयत्नांत हें जातलें अशें ना. पूण म्हजो चानयेचो वांटो आसतलो. म्हूण बऱ्या पगाराची नोकरी सोडून हांवें हें कलेक पुराय व्हांवन घेतलां. म्हाका देशभरांतल्यान मागणी येतात. म्हज्या वर्गाक येवपी पालकांनीय आॅनलायन वर्गाची मागणी केली. म्हज्या वर्गाक प्रचंड मागणी आसा. हांव तो गजालींच्या माध्यमांतल्यान तशेंच वारली चित्रांचे मजतीन शिकयता. घडये म्हज्या विद्यार्थ्यांक तें आवडटा आसतलें. तुमकां दिसतलें, म्हजें शिक्षण जालां अभियांत्रिकीत आमी हीं चित्रां खंयचीं? म्हजे भितर चित्रकार आसा. वारली सारके शैलींत हांव चित्रकला शिकलां. हांवें हनुमान चालिसा खातीर ती वापरल्या. ताची तोखणाय संवसारभर जाल्या. म्हजे भितरलो चित्रकार हें सगलें घडोवन हाडटा.’
तुमचे कितें दुबाव बी आसल्यार महालेक फोन करून तुमी ते पयस करपाक शकतात. ताचो फोन नंबर आसा 77159 19537.
ह्या आॅनलायन वर्गांत वांटो घेतल्यार तुमकां गजाली वा तुमचें म्हणणें मांडपाची कला शिकपाक मेळटली आनी आमचे म्हान परंपरेची वळख जातली. जेन्ना रामाणय टिव्हीचेर दाखयताले, तेन्ना एकान एक भारतीय ते पळयतालो. लोक घरा भायर सरपाक तयार नाशिल्ल्यान कार्यावळींचो वेळ बदलचो पडटालो. रस्त्यार जितो मूस नासतालो. हाचें कारण एक बरो पर्याय टिव्हीक मिळिल्लो.
महाले सरुय आमकां एक बरो पर्याय दिता. ताचो लाव आमी सगले जाण घेवया.
गोंय विद्यापीठाची वेबसायट
सगल्या विद्यार्थ्यांनी सप्तकांतल्यान दोन फावटीं तरी गोंय विद्यापीठाची वेबसायट पळोवपाक जाय. ताचेर बरीच उपेगी म्हायती मेळटा. आतां काॅलेज महोत्सव सुरू जातले. ते एंजाॅय करात, पूण परिक्षेचें विसरूं नाकात. कारण तुमचें पुराय करियर परिक्षेचेरुच अवलंबून आसा. शक्य तितले चड गूण घेवपाचो यत्न करात. तशेंच तुमचे मदीं कुशळटाय आसा ती विकसीत करपाचो यत्न करात. सामान्य ज्ञाना खातीर दिसाळीं वाचात, तांच्यो वेबसायटी पळयात.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
