भांगरभूंय | प्रतिनिधी
पर्तगाळीच्या गोकर्ण पर्तगाळी जीवोत्तम मठाक 550 वर्सां पुराय जाल्यांत. ते निमतान आयज श्रीरामाचे द. आशियेंतलें सगल्यांत उंच मुर्तीचें लोकार्पण जातलें. प्रधानमंत्री नरेंद्र मोदी ते खातीर खास हाजीर रावतले. ताका लागून देशांतल्या प्रसारमाध्यमांची थंय नदर आसतली. म्हणटकच पर्तगाळी, काणकोण आनी गोंय फुडले कांय दीस संवसाराच्या नकाशाचेर पावतलें. श्रीराम आनी पणजेच्या परशुरामाचे मुर्तीक लागून गोंयांत अध्यात्मीक पर्यटनाक गती मेळटली, अशें मुख्यमंत्र्यांनी सांगलां. पर्तगाळी मठाधिशानूय गोंय हें कुळदेव आनी अध्यात्माचें थळ जावचें, अशी इत्सा मुलाखतींत उक्तायल्या. सामान्य भौसाचीय हीच इत्सा आसतली. कारण चंगळवाद, ‘खाओ, पिओ, मजा करो’चे धुंदींत राज्यांतल्या पर्यटनाक भलतेंच मोडण मेळ्ळां. देशभरांतल्या पर्यटन थळांनी लोक अमूकच गजाल पळोवपाक वतात. तशे गोंयांत लोक कित्याक येतात, ताचो विचार दरेकल्यान करपाचो वेळ आयला. गोंयांत देवळां, चर्ची, दर्यावेळो पळोवपाक, नुस्तें खावपाक ते येतात. मात फाटल्या 20- 25 वर्सांच्या काळांत चडशे पर्यटक कित्याक येतात, कितें करतात, ताचो विचार दरेकल्यान करचो. देखून अध्यात्मीक पर्यटनूय गोंयांत योग्य रितीन फुलतलें हे खातीर यत्न जावंक जाय.
77 फूट उंचायेच्या श्रीरामाचे मुर्ती वांगडाच पर्तगाळी फुडाराक थीम पार्क आनी राम म्युझियम उबारपाचो विचार आसा. ही संकल्पना पर्यटन उदरगतीक बऱ्याक पडटली. कणेरी- कोल्हापूरा सिद्धगिरी संग्रहालय पळोवपाक खास लोक वतात. तशेच पर्तगाळीय दर म्हयन्याक हजारांनी पर्यटक येवंक शकतात. अशें म्हणटात की, भक्ती तेन्नाच पूर्ण जाता, जेन्ना ती सेवेच्या रुपांत प्रकट जाता. अन्न, शिक्षण आनी करुणा हीच देवळांची खरी आरती! प्रत्येक देवूळ, मठ अध्यात्म, भक्तीचीं थळां जावचींच, पूण तेच बाराबर समाजीक उन्नतीचींय केंद्रां जावचीं. शिर्डी, सिद्धीविनायक, तिरुपती, रामकृष्ण मिशन, अम्मा मठ, सत्यसाईबाबा, कुंडय मठ आनी हेरांनी समाजीक पांवड्यार बरेंच काम केलां. शाळा, लघुउद्देग, गरजूंक घरां, अनाथालय, पर्यावरण, घरा वचून भलायकी सेवा दिवप, हाॅस्पिटलां… अशे जायते उपक्रम चलयल्यात. देवळां फक्त फंडपेटी भरपाचें काम करता, ह्या कांय लोकांच्या समजाक छेद दिवपी हें कार्य.
पर्तगाळी मठान वडाळा- मुंबय विद्यार्थ्यांक निवास, शिक्षणीक साह्य, परिक्षेंत मार्गदर्शन, रोजगार सोदप्यांक मजत, संस्कृत, वेद, खेळ, संगीत कार्यावळ, भलायकी शिबिरां आयोजीत केल्यांत. गोंयच्या हेर देवळांकूय हें सहज शक्य आसा. देवाची सेवा म्हणटकच मनीसबळाचो उणाव जायतसो दिसना. स्वतंत्र उपक्रम चालीक लावप शक्य ना जाल्यार, गरीब विद्यार्थ्यांक शिक्षण पूर्ण करी मेरेन अर्थीक मजत, शिश्यवृत्ती, भलायकी शिबिरां, दुयेंत व्यक्तीक अर्थीक मजत, शाळांतल्या हुशार विद्यार्थ्यांक इनाम, उण्यां मोलांत महाप्रसाद, येरादारीची सुविधा, कृशी मळाचेर मजत, संगणक गिन्यान, नाटक- वादन, नाच, चित्रकला सारक्या मळांचेर मार्गदर्शन, मजत करूं येता. अध्यात्मीक पर्यटना खातीर देवळांनी यत्न करूं येतात. सरकाराची मजत आसतलीच.
धर्मीक, सांस्कृतीक, घरगुती सुवाळ्यां खातीर कमी भाड्यान सभाघरां दिवं येतात. देवळांनी वाचपघरां जायच. थंय धर्मीक, अध्यात्मीक आनी हेर दर्जेदार पुस्तकां दवरचीं. वस्तुसंग्रहालय सुरू करूं येता. गोंयचें दायज, भाशा, परंपरीक उत्सव, भजन- वादन कला, प्रवचनां, गोंयची संस्कृताय दाखोवपी उपक्रम देवळांनी सुरू केल्यार अध्यात्माची, कलेची ओड आशिल्लो पर्यटक गोंयां येतलोच. जंय सेवा आसता थंय देवाची सासाय आसता खंय. ताका लागून अध्यात्मीक मानसीकतायेच्या भक्तांनी विवीध उपक्रम सोंपेपणी चालीक लावंक दुडू दिवं येता. इत्सा आसा म्हणटकच मार्ग मेळटलोच. पर्तगाळी मठाक 550 वर्सां पुराय जातात. गोंयांत अध्यात्मीक पर्यटन आसा, तें आनीक वाडपाक, नेटान चालीक लागपाक पर्तगाळीचो मठ योगदान दितलोच. दुबाव ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
