भांगरभूंय | प्रतिनिधी
वाग वाठार परतून एकदां चर्चेंत आयला. कारण जालां सर्वोच्च न्यायालयाची उच्चाधिकार समिती. उत्तर कन्नडा जिल्ह्यांतल्या काळी वाग वाठाराक (आदलो दांडेली- अणशी वाग वाठार) जोडून आशिल्लीं गोंयचीं अभयारण्यां वाग वाठारा खातीर योग्य आसात, अशें मत हे समितीन उक्तायलां. खोतीगांव, नेत्रावळी, भगवान महावीर अभयारण्याचो मेळून सादारण 468 चौ. किलोमिटराचो आंवाठ ‘वाग वाठार’ म्हूण अधिसुचीत करचो, अशें हे समितीन म्हणलां. म्हादय वाटावपाक आंदोलन करप्यांक जाय तें म्हादय अभयारण्य मात ह्या वाठारांत ना. तें घाल्लें जाल्यार म्हादयचें उदक वळोवपाच्या कर्नाटकाच्या यत्नांक आडमेळीं येवपाचीं. समितीन सर्वोच्च न्यायालयाक शिफारस केल्या म्हणटकच हो वाग वाठार जाल्ल्यांत जमा आसा, अशें जाणकारांचें मत. समिती घडये फुडल्या 15 दिसांनी म्हादय अभयारण्याचो आस्पाव करपाकूय शकता. ह्या वाग वाठाराचो सोक्षमोक्ष फुडले सुनावणेंत लागूं येता. ती 15 डिसेंबराक जातली. प्रकरण न्यायालयांत आशिल्ल्यान समितीच्या निर्णयाचेर प्रतिक्रिया दिवप योग्य जावचें ना, अशें रानां मंत्र्यान म्हणलां. तर, समिती म्हणजे कितें देव न्हय. हांव म्हज्या लोकां खातीर रस्त्यार देवतलों, वेळ पडल्यार बंदखणींतूय वतलों, अशी प्रतिक्रिया समाजकल्याण मंत्र्यान दिल्या. नेत्रावळी अभयारण्यांत शे- देडशें वर्सां सावन लोक रावतात, तांणी केन्नाच शिकार करूंक ना, असोय मंत्र्याचो दावो. म्हादय बचाव अभियानाची अध्यक्ष निर्मला सावंत हांणी समितीचे शिफारसीक लागून म्हादय वाटावपाच्या आंदोलनाक बळगें मेळटलें अशें म्हणलां.
अभयारण्य जाहीर जाले उपरांत थंय बांदकामां करपाक मेळना. म्हादय, नेत्रावळी वेळार जांणी जमनी वगडायल्यो तांकां अजून भरपाय मेळूंक ना. म्हणटकच थळाव्यांचो वाग वाठाराक कायम विरोध आसतलो. म्हादय आनी भगवान महावीर ह्या दोनूय अभयारण्यांत सादारण 1200 घरां आसात. तो वगळपाची शिफारस केल्या. पूण मुखार ताचो आस्पाव जावं येता. अभयारण्यांनी जायत्या जाणांच्यो बागायती, शेती, पोरसां बी आसात. ह्या सगल्यांची पुनर्वसणूक करून वाग वाठार जाहीर करचो, अशीं पर्यावरणमोगींची मागणी. मात वाग वाठार विरोधकांच्या म्हणण्यां प्रमाण, हजारांनी लोकांक सगलें सोडचें पडटलें. ताचेर पर्यावरणवादी म्हणटात, हो आंकडो वाडोवन दाखयला.
गोंयांत एक पसून वाग ना, अशें जायते जाण म्हणटात. वागांची मेजणी जाल्ली तेन्ना पांचा परस चड वाग नात, अशें दिशिल्लें. एका लोकप्रतिनिधीन तर महाराष्ट्र, कर्नाटकांतले वाग हांगा येतात, असो दावो केल्लो. वाग दोन आसूं वा चार. योग्य वातावरण मेळ्ळ्यार तांचो आंकडो वाडूं येता. पर्यावरणमोगींच्या मतान, हे वाग मूळ गोंयांतलेच. रानां खात्याच्या कॅमेऱ्यांतूय ते दिशिल्ले. वागांची राखण करप म्हणल्यार पुराय रान, न्हंयो, वनस्पतीची राखण करप. अस्तंत घांटांतली जैवविवीधताय, सुकणी, सावदां सुरक्षीत उरतलीं. वाग वाठार जाल्यार रस्ते, रेल्वे विस्तार, खाजगी रिसाॅर्ट्स हांकां सोंपेपणी मान्यताय मेळची ना. राज्याक केंद्रा कडल्यान व्हडलो निधीय मेळटलो. विवीध रोजगार निर्माण जातले. इको टुरिझम वाडटलें. वांगडाच अर्थीक येणावळ. वातावरणांत थंडसाण उरतली. रानां जीव संरक्षण कायद्या खाला, लोकांचें योग्य पुनर्वसन करचें पडटा. लोकांची परवानगी घेनासतना कांय करपाक मेळना. तांचें शेत, घर, पोरसूं, रानां संसाधनां हक्क संरक्षीत उरतात. नाजाल्यार तांकां भरपाय दितात. कांय कडेन लोक आपूण जावन भायर सरतात. पूण योग्य ती भरपाय घेवनूच. कांय जाण वाग वाठार, अभयारण्यांचें नेटान समर्थन करतात, तें जमनीक लागून, अशेंय समाजीक वावुरप्यांचें मत. गोंयांतली चडांत चड जमीन वाग वाठाराच्या निमतान कांय जायना, तिगून उरची, अशी तांची इत्सा. कारण निवासी आनी वेवसायीक प्रकल्पांक लागून बरींच रानां नश्ट जाल्यांत. अभयारण्यांक, वाग वाठाराक लागून विस्थापीत जाल्ल्या लोकांक मात बेगोबेग न्याय मेळपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
