भांगरभूंय | प्रतिनिधी
नागरी विमानसेवा कांय काळा खातीर उरली बंद
वास्को: काल (बिरेस्तारा) दनपारा नेमान सरावा खातीर हंस नौदळाचे धांवपट्टेर येवपी भारतीय तटरक्षक दळाच्या विमानाचो टायर फुटून उजो लागलो. हाका लागून धांवपट्टी कांय काळा खातीर बंद दवरिल्ल्यान नागरी विमान उड्डाणा खातीर आनी देंवपा खातीर आडमेळीं आयिल्ल्यान विमानसेवेक कळाव जालो. सुमार 40 मिनटां उपरांत धांवपट्टी विमानांच्या उड्डाणा खातीर उक्ती केल्ल्यान सगलें सुरळीत जालें.
हंस नौदळाचे धांवपट्टीचो वापर भारतीय तटरक्षक दळ आपल्या विमानां खातीर करता. काल दनपारां नेमान सरावा खातीर भारतीय तट रक्षक दळाचे डॉनीयक डो 228 हें विमान धांवपट्टेर येता आसतना विमानाचो दावे वटेनचो टायर फुटून ताका उजो लागलो.
हे संबंदी म्हायती मेळटकूच नौदळाचो उजो पालोवपी दळ, बचाव पंगड ताकतिकेन थंय पावून तांणी परिस्थिती नियंत्रणांत हाडली. उपरांत हें विमान धांवपट्टी वयल्यान कुशीक काडलें.
मजगतीं, दाबोळी विमानतळार येवपी नागरी विमानां धांवपट्टेर देंवूंक शकलीं नात. धांवपट्टी नितळ केले उपरांत नागरी विमानसेवा परतून सुरू जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
