जिखिल्ल्या इनामाचेर कर कित्याक?

भांगरभूंय | प्रतिनिधी

सालांत

इनाम म्हणल्यार सर्तींत जिखून घेतिल्ली वस्तू, जाल्यार भेट म्हणल्यार परत येवपाची कसलीच अपेक्षा नासतना स्वेच्छेनूच दिल्ली वस्तू. मुखेल फरक म्हणल्यार सर्तींतल्यांन इनाम मेळटा, जाल्यार भेट ही सद्भावना, कदर वा मोगाची चिन्नां म्हणून दितात. म्हज्या एका इश्टान वॉशिंग मशीन घेतना स्क्रॅच कार्डाचेर लॉयड्स बँकेचें गिफ्ट कूपन जिखलें. पूण कंपनी डिलिव्हरी पयलीं ₹ 9000/- टीडीएस मागता. खरें म्हणल्यार ही मशिनाचेर मेळिल्ली एक भेटवस्तू? ती दिवपाची परंपरा वेवसायांत रुपांतरीत जावपाक लागल्या. हें थांबोवंक जाय. कारण फॅसिनो दुचाकी गाडी जिखपी मनशाक गणेश मंडळाक ₹ 25000/- कर भरचो पडलो.

भारतांत इनामाच्या पयशांचेर आनी भेटवस्तूंचेर, हेर स्रोताचेर कर कपात (टीडीएस) लायतात. कारण अशें जिखप आयकर कायद्या खाला येणावळ म्हणून मानतात. ह्या ‘अवास्तव फायद्याचेर’ आगाऊ कर एकठांय करपा खातीर सरकार स्रोताचेर कपात करपाची सक्ती करता, जे सादारणपणान अनियमीत आसतात आनी मनशाच्या नेमान येणावळीचो भाग न्हय. पूण हो कर वा कितेंय आसूं, आयोजकांनी वा प्रायोजकांनी भरचो. लावार्थी कित्याक? कर भरपाची गजाल येता तेन्ना भेट वा इनामाचो अर्थ शून्य आसता.

कर चोरी आडावपा खातीर आनी येणावळ निर्माण जातकच सरकार कर एकठांय करता हाची खात्री करपा खातीर इनामां आनी भेटवस्तूंचेर कर कपात (टीडीएस) करप गरजेचें आसता. ह्या जिखपांक येणावळ कर कायदो, 1961 खाला उत्पन्न म्हणून मानतात आनी कराच्यो कांय तरतुदी आसतात. पूण भेटवस्तू आनी इनामां करमुक्त आसूंक जाय.

टीडीएस यंत्रणेचो मुखेल हेतू म्हणल्यार, मेळोवप्याचेर आदारून, अर्थीक वर्साच्या निमाणें ही अनियमीत, अनिश्चीत उत्पन्न जाहीर करप. ही गणना मध्यमवर्गीय आनी सामान्य मनशा खातीर न्हय तर गिरेस्त लोकां खातीर. मनशाच्या जिवितांतलें भेट वा इनाम हें एक बरें ‘नशीब’ अशें आमी मानतात. देखून भेटवस्तूचेर कर लावचो न्हय. सक्तीचें आसल्यार कायद्यांत दुरुस्ती करची. गरीब कर खंयच्यान हाडटलो?

तेल खावचें सोडात

40 वर्सां आदीं पारंपरीक गोंयकाराचे जिणे पद्दतीत कालून संरक्षणात्मक घटक मेळटाले. खोबरेलाच्या चड वापराक लागून जावपी संभाव्य धोके तेन्ना नासले. देखून आयचे जिणेपद्दतीचे तुळेंत काळजाच्या दुयेंसांचें प्रमाण उणें आसतालें. आमचे पूर्वज 90 वर्सां वयर जियेताले आनी तेंय वखदां नासतना. देखून काळजाचे दुयेंस आडावपाक जिणे पद्दतीचे फरक ‘सोदप’ म्हत्वाचें जालां. आयज आहारांत खूब बदल जाला. 

हालींचो काळजाचो आताक चड करून सुदारीत जिणे पद्दतीच्या घटक (देखीक चुकीचो आहार, वायट संवयी आनी चिरकालीन ताण) आनी ताचे मुळावी वैजकी परिस्थिती (उच्च रगतदाब, कोलेस्टेरॉल आनी गोडेंमूत) हांच्या संयोगाक लागून जाता. ह्या घटकांक लागून तरणाट्यां मदीं काळजाचो आताक भिरांकूळ वाडत आसा. पूण, तेल सगळ्यांत धोक्याचें.

काळजाच्या दुयेंसाचे सगळ्यांत व्हडलें कारण म्हणल्यार कोरोनरी आर्टरी डिजीज, जंय रक्तपेशींत चरबी  जमून त्यो आंवुळटा आनी रगताच्या प्रवाहाक आडमेळीं येतात. प्लेक फुटल्यार रगताच्यो गुठल्यो तयार जावन शीर बंद जावं शकता आनी ताका लागून काळजाचो आताक येवंक शकता. चडशा लोकांक हें खबर आसता, पूण कोण आहारांत बदल करिनात. प्रक्रिया केल्लें अन्न, ट्रान्स चरबी, मीठ आनी साकर चड प्रमाणांत घेतल्यार स्थूलताय, कोलेस्टेरॉल चड आनी उच्च रगतदाब जाता हें लोकांक खबर आसा, पूण जतनाय घेवपा कडेन ते आडनदर करतात.

शारिरीक क्रियाकलाप उणावाक लागून चयापचय मंद जाता, रगत प्रवाह उणो जाता आनी शिरांनी प्लेक तयार जावपाक संद मेळटा. धूम्रपान आनी सेकंड हॅंड धुंवराचो संपर्क आयल्यार शिरांचें नुकसान जाता. सिगरेट, कोकेन सारकिल्या उत्तेजक पदार्थांचो वापर केल्यार कोरोनरी आर्टरी बावून चेंपपाक शकता. पूण तेल हो काळजाचो खरो दुस्मान. सावूद सांबाळपा खातीर आमी आमच्या पूर्वजांच्या जिणे पद्दतीचो नियाळ घेवचो पडटलो. तेल सोडून पळयात. काळजाचो आताक ना जातलो.

– राजेश बाणावलीकार,

विएगसवाडो, हडफडें