जिल्हो पंचायत वेंचणूक अस्तुरे खातीर म्हत्वाची

भांगरभूंय | प्रतिनिधी

जिल्हो पंचायत वेंचणुकेंत आरक्षणांतल्यान येवपी अस्तुरी उंचेलें शिक्षण घेतिल्ली आसची.

बिहार विधानसभा वेंचणूक तीन रंगी जाल्ल्यान मतदान पयल्या पांवड्यार चड जालां. दुसऱ्या पांवड्यार व्हड प्रमाणांत मतदान जावपाची शक्यताय आसा. वेंचणुकेंत आयिल्ली आधुनीकताय, राज्यांत जाल्ली उदरगत मतदारांक भायर सरपाक उपेगी. देशांत भाजपाक केंद्रांत सत्तेर हाडपा खातीर वेंचणूक वेवस्थापनांत आदार करपी प्रशांत किशोर. तांच्या फुडारपणा खाला राजकी पक्ष बिहार वेंचणुकेंत आसा. दोन व्हड राजकी पक्षां परस आपलो पक्ष वेगळो हें सांगपी तांचें राजकारण आम आदमी पक्षा वरी. बिहार वेंचणुकेचे निकाल भारताचे आदले प्रधानमंत्री पंडित जवाहरलाल नेहरू हांच्या वाडदिसा मेळटले. बिहारांतले सकारात्मक राजकी बदल देशाच्या राजकारणाक वेगळें मोडण मेळटलें. बिहाराचे, गोंयचे जिल्हो पंचायत वेंचणूक निकाल राज्यांतल्या फोंडें मतदारसंघ पोटवेंचणुकेक म्हत्वाचे.
13 डिसेंबर भाजपाचे गोंयांतले पयले मुखेलमंत्री, देशाचे आदले राखणे मंत्री मनोहर पर्रीकार हांचो वाडदीस. जिल्हो पंचायती ल्हानशा गोंयाक जाय किद्याक? हो प्रस्न विधानसभेंत विचारपी, तिसरो जिल्हो गोंयांत जावचो हे खातीर सरकाराच्या फाटल्यान लागपी गोंयचे दोन आदले मुख्यमंत्री आमचे मदीं नात. पंचायत ते विधानसभा वेंचणुकेंत घरा घरांनी वचपाच्यो, मतदारांक जागोवपाच्यो आदल्या मुख्यमंत्र्यांच्यो यादी आसात. जिल्हो पंचायत वेंचणूक फुडें धुकलपाच्यो खबरो पाताळावपाचें राजकारण साबार वेंचणूक मतदार याद्यो करपाक आरंभ जातना आयल्यो. जिल्हो पंचायतींच्यो मतदार याद्यो वेगळ्यो आसतात, राज्य वेंचणूक आयोग त्या वावरांत आसता. पंचायत, जिल्हो, नगरपालिका, म्हापालिका वेंचणूक राज्य वेंचणूक आयोग घेता. फुडली जिल्हो पंचायत वेंचणूक तीन जिल्ह्यांची आसतली ही आस्त आसा.
तिसऱ्या जिल्ह्याचें उतर आदले मुखेलमंत्री पर्रीकार हांणी रवीबाबांक दिल्लें. तिसऱ्या जिल्ह्याची गरज आसा तें तांकां राज्यांतले वाडपी मतदारसंख्ये वेल्यान कळिल्लें. दोन जिल्हो पंचायतींच्यो वेंचणुको जातनाच जिल्हो पंचायतींक अधिकार दिवपाचें कामकाजय सरकारान करचें. तेविशीं राज्य वित्त आयोगान वावर पुराय केला आसुये. गोंय ल्हान आसलें तरी उदरगतीच्या मार्गार फुडें गेलां. जिल्हो, तालुको, पंचायती, नगरपालिका एकामेकांक लागीं आयल्यात. गोंय मुक्त जाल्लें तेन्ना पणजे सावन काणकोणां बस येरादारी करपाक आठ वरां लागतालीं. आयज पांच वरां लागतात, खासगी गाडयेंतल्यान यो वच करप आठ वरांचें.
जिल्हो पांवड्या वेल्यान विधानसभे मेरेन पावपी आमदारां लागीं भासाभास करून जिल्ह्यांक अधिकार कशे दिवप हें थारावचें पडटलें. मुळावें शिक्षण, येरादारी, बांदकामां, कोयर वेवस्थापन, भलायकी खात्यांचे थोडे अधिकार जिल्हो प्रतिनिधीक दिवपाक जाय. दोन जिल्हो भवनां फुडल्या पांच वर्सां भितर उबारपाक जाय. कितल्योशोच सरकारी शाळा, इमारती रित्यो पडून आसात त्यो सरकारान आपले कडेन घेवच्यो पडटल्यो. भूंय वेवस्थापन आराखडो समितीन कामकाजांतल्यान पडंग शेता परस उपेगांत नाशिल्ल्यो इमारती, जमनी दाखोवन दिल्या आसतल्यो.
नवो राज्य प्रादेशीक आराखडो करपाक त्या आराखड्याचो उपेग जावचो.
सरकार आपल्या सगल्या वावराची जायरात करतलें अशें न्हय, केल्लो वावर, सुदारप मतदारांक दिसता, मतदार कुड्डे ना. जिल्हो, राज्य पांवड्यार नवे लोक – प्रतिनिधी येतात तेन्ना तांकां मतदारांचीं मतां मेळटलीं. नव्यांक वाट दाखयतना जिल्हो पांवड्या वेल्या लोकप्रतिनिधींक विधानसभे मेरेन व्हरतना पक्षाचें फुडलें नेतृत्व घडटा. भाजपान तो वावर केला, भाजपाचे देश, राज्यांतले फुडारी ताका जापसालदार. गोंयच्या फुडारांतल्या नेतृत्वाक अवेळार पावस किद्याक येता? थळावी सरभोंवतण मुखेल करून आदल्या येरादारीच्या साधनांचे परिणाम उबाळ वाडयतात?
देशांतले कायदे बदलतात तो बदल गोंयच्या कायद्यानी आयला? जेन्ना गोंय राज्य जालां तेन्ना राज्याचे उदरगतीचीं पावलां मुखार पडप अपेक्षीत आशिल्लें. फाटल्या पंचवीस वर्सांनी तीं चड पडटना लुकसाण खंय जालां? उदरगतीची दिका राज्याक बदलची पडटली? ह्या प्रस्नाच्यो जापो मतदारांक दिवच्यो पडटल्यो. मतदार चड शिटूक जाता, तो शिकला, अती बुद्धिमान नासलो तरी खोंपींतलो मतदारय दारांत आयिल्लो पयसो कित्याक सोडटलो? पयसोय विंगड विंगड रुपांनी सरकाराक येता, सरकार येवजण्यांतल्यान तो लोकां मेरेन पावयता, पन्नास वर्सां आदींची बांदावळ मोडटा तेन्ना नवें उबारपाचेर खर्च जाता ताची जाणविकाय मतदारांक जाल्या. नव्या मतदारांक आपले वरी आसचो अशें दिसल्यार अजाप दिसचें ना. लोकप्रतिनिधींच्या वावराक पयलीं वरी मर्यादा उरुंक ना, रातदीस तांकांय वावुरचें पडटा. मेळिल्ल्या पगारांतल्यान मतदारसंघांतल्या गरजेवंतांक पयसो दिवपी, तांचे खातीर वावुरपी लोकप्रतिनिधी आसात. उत्सवांचेर सरकारी पयश्यांतल्यान खर्च करतना तातूंतल्यान बरें वायट कितें मेळटलें तें लोकप्रतिनिधींक समजून घेवचें पडटलें.
कोयर वेवस्थापन शारां, गांवांनी मुखेल मार्गांनी, वेवसायांतल्या सुवातींनी जाता. नागरीक, मतदार पयलीं वरी कोयर रस्त्यार उडयत रावले जाल्यार लोकप्रतिनिधींक मतदारांच्या दारांत वतना कोयर वेवस्थापना विशीं सांगचें पडटलें. जेवण – खाण, वस्त्र, घरा इतलेंच येरादारी, नितळसाणीक म्हत्व येवपाक लागलां. जिल्हो पंचायत वेंचणुके खातीरय मतदारां मेरेन फुडारांतले लोकप्रतिनिधी, नवे उमेदवार वतले तेन्ना मतदारांक मोबायला वेल्यान ते पावचेआदीं म्हायती मेळिल्ली आसची. मोबायल म्हायती अचूक मेळटली जाल्यार फोटोचो उपेग करुं येता. म्हायती चार वळीनी दिवपाची कुशळटाय उमेदवारां मदीं आसपाक जाय. फातर हातांत घेवचे परस शिकल्यार, मेळटा तो वावर केल्यार चार पयशे मेळटात, दिसवडोय गोंयांत वाडला हें सांगपाची गरज उप्रासल्या. जिल्हो वेंचणुकेंतल्या नेमावळींत गोंयचे आस्पती प्रमाण बदलय जातले. जिल्हो वेंचणुकेंत विधानसभा वेंचणुकेंतले 25 – 30 टक्के मतदार नासतात, मतदार केंद्रांय बदलतात. उदरगत राज्याची आसली तरी वेंचणूक आचारसंहिता पुराय विधानसभा मतदारसंघाक, राज्याक नासता. आचारसंहिता उमेदवारान अर्ज दिले उपरांतच सुरू जातली.
जिल्हो पंचायतींतल्यान मुखार गेल्ल्यो अस्तुरी आमदार जेनिफर मोंसेरात हांच्या कर्तृबांत तांच्या घरकाराचो वांटो आशिल्लो. नगरपालिका, पंचायत, जिल्हो पांवड्यार अस्तुरी आरक्षणांतल्यान मुखार सरल्या, वेगळी अस्मिताय दाखयता. तातूंतल्यान 2027 चे विधानसभा वेंचणुकेंत गोंयच्यान 33 टक्के अस्तुरी आरक्षण चालीक लागपाची गरज आसा. विधानसभेच्या 33 टक्के अस्तुरी आरक्षणांत
गोंय पयलें राज्य जाल्यार फुडले लोकसभा, राज्यसभा वेंचणुकेचो मार्ग अस्तुरेक दिसतलो. 33 टक्के आरक्षणांतल्यान विधानसभेर अस्तुरी वचपा पासत सक्षम अस्तुरेक आरंभाक सगल्यांच्या तेंक्यान वेंचून हाडचें पडटलें.
जिल्हो पंचायत वेंचणुकेंत आरक्षणांतल्यान येवपी अस्तुरी उंचेलें शिक्षण घेतिल्ली आसची. शिक्षणांतल्यान राजकारणाचीं व्हड दारां अस्तुरेक उक्तीं जातात, संद घेवप तांचेर निंबून आसा.

सुहासिनी प्रभुगांवकार
9881099260