भांगरभूंय | प्रतिनिधी
2027 विधानसभा वेंचणुके खातीर जिल्हो पंचायत, फोंडें मतदारसंघ विधानसभा पोटवेंचणूक म्हत्वाच्यो. 2027 त 27 आमदार आशिल्ल्या भाजपा सरकारान मंत्रीमंडळ बदला उपरांत म्हामंडळांची फेररचणूक केल्या. आमदार मायकल लोबो, आमदार संकल्प आमोणकार हांकां मंत्रीपदां मेळटलीं अश्यो खबरो फाटल्या कांय दिसांनी येताल्यो. दोगांय आमदारांक म्हामंडळां दिलीं तरी ते धादोशी आसतले अशें ना. विधानसभा वेंचणूक लागीं आयिल्ल्यान मंत्रीपद तांकां दिवन व्हडलोसो वावर जावचो ना हाची जाणविकाय सरकाराक आसा. 2025 वर्स सोंपपाक दोन म्हयने आसतना म्हामंडळांतलो वावर वेगीं जावपाची शक्यताय उणी आसा. कांय म्हामंडळांची गरज कितली आसा ताचो अभ्यास केल्यार लुकसाणेंत आशिल्लीं म्हामंडळां चड मेळटलीं. म्हालेखापालांनी तेविशीं सरकाराक नियाळांतल्यान दाखोवन दिलां. कांय म्हामंडळां बंद करचीं अश्यो सुचोवण्योय केल्ल्यो आसात. म्हामंडळांत कर्मचारी उणे आशिल्ल्यान तीं खात्यांत आस्पावन घेवपाचो विचार दोन वर्सां भितर करचो.
सरकारी पांवड्यार म्हायती तंत्रज्ञानांतल्यान कंप्युटर आयल्यात. कागदा विरयत फुडें वचपाची मोख सरकाराक दवरची पडटली. मोबायल, कंप्युटरांतल्यान प्रशासनाचो पांवडो सुदारला? नागरिकांचीं कामां बेगीन जातात? ताचो नियाळ सचिवां परस संचालकांनी केल्यार सरकाराक फुडारांत तो उपेगी थारतलो. त्या नियाळा प्रमाण नवें मनीसबळ खंयचें जाय तें सरकाराक कळटलें. खातीं, संचालनालयां, येवजण्यांची फेररचणूक करप 2027 त मुखार वतना राज्याची उदरगत नियोजना पासत गरजेचें. फेररचणूक, बदलांतल्यान सरकारी नोकऱ्यो घेवपाक तयार नाशिल्ली पिळगी सरकारा वटेन येवपाची शक्यताय आसा.
एका खात्यांत धा पदां रितीं आसात थंय सात पदांचेर भरती केल्यार खात्याचो वावर जाग्यार पडटलो? कंत्राटी शिक्षक, कर्मचारी मना काळजांतल्यान सरकारा खातीर वावुरतात? तांचे दुसरे वेवसाय आसात हें सोदून काडल्यार कंत्राटाचेर भरती पासत नवी नेमावळ, धोरण करूंक मेळटलें. व्हड प्रायवेट कंपनींनी उंचेल्या कुशळटायेंतले कंत्राटी अधिकारी, कर्मचारी व्हड प्रमाणात आसात. तांचे पासत सरकारी नेमावळींतल्यान नोकरेंत राखण करपाचें उतर मेळटा म्हणून.
उंचेल्या तांकीचें मनीसबळ सरकारांत गोंय लोकसेवा आयोगा वरवीं येता? कुशळ कर्मचारी एकचित्तान कामकाज करता? कामकाजांत आसतना आपल्या आवडीनीं चड घुस्पून घेतल्यार खात्यांतल्या वावराक तो, तें न्याय्य दिता? पिराय वाडिल्ले, भलायकी इबाडटा म्हणून दांडयो चड मारपी कर्मचारी कितले आसात? प्रशिक्षणांतल्यान सरकारी कर्मचारी, ज्येश्ठ आनी वरिश्ठ नवें तंत्रज्ञान, गिन्यान वाडोवंक शकतात. प्रशिक्षण दिवपी खासा शिक्षण घेतिल्ले, सरकारी पांवड्या वयले आसल्यार कर्मचारी प्रशिक्षणाक, प्रशिक्षण दिवप्यांक गंभीरतायेन घेतात. मेळिल्ल्या प्रशिक्षणांतल्यान बदल चालीक लागप शक्य जाता. तज्ञ म्हणून नेमणूक करतना अणभवा परस शिक्षणाक हाचे फुडें म्हत्व दिवपाची गरज आसा.
सरकार निर्णय घेता, विधेयकां करता पूण नेमावळ करून निर्णय, कायदे चालीक लावपाक कळाव लागता. प्रशासनांत उंचेल्या पांवड्यार आशिल्ल्या थळाव्या अधिकाऱ्यांची समिती करून प्रशासन सुदारपाक खासा बदल हाडप 2027 खातीर म्हत्वाचे.
पर्यटन खातें सवकासायेन पर्यटकांक वेगळे वाटेन व्हरता, धोरणांत बदल हाडटा, दर्यादेगां वयलें चेपण देंवोवपाक सोदता हें पावल फुडाराचें बळगें. भौशीक बांदकाम खात्याचे बांदकाम, उदका पुरवण आनी वेवस्थापन हीं दोनूय खातीं फुडाराचे उदरगतीची दिका थारावंक बरी. कोयर वेवस्थापन खात्याक बळ मेळपाक जाय, अस्तुरी आनी भुरगीं, युवा कल्याण खातीं वेगळीं करपाचो विचार फुडारांत जावचो.
अस्तुरी आयोगाची पयली बांदावळ जाल्ली ती गोंयच्या कायद्यांतल्यान. उपरांत केंद्रीय अस्तुरी आयोग कायदो आयिल्ल्यान गोंय अस्तुरी आयोग बदल्लो. अस्तुरेची उदरगत उंचेल्या शिक्षणान गोंयांत जाल्या. भलायकी सांबाळप, मानसीकताय बदलपाचो तिका आनीक घटाय दिवपाचो वावर नेटान जावपाक जाय. गरज पडल्यार प्रशासकी नेमावळ बदलांतल्यान अस्तुरेक अर्थकारण, भलायकी, उद्देगाचे नवे मार्ग दाखोवचे पडटले.
बदलेचे नवे सुवातेर कर्मचारी, पुलीस कित्याक गेले ना? खात्याच्या, विभागाच्या मुखेल्यांक तेविशीं म्हायतीच नाशिल्ली? प्रशासन, पुलिशेंत शिस्त हाडप, रित्या पदांचो पांवडो वाडोवन भरती करप, पुलिशेंत कुशळ थळावे अधिकारी हाडपाची व्हड जापसालदारकी आसा. गुन्यांव वाडटात, गुन्यांवांचो सोद बेगीन लागता. गुन्यांवकारांक बेगीन खर ख्यास्त मेळपा पासत पुलीस खात्यांत कायदो विभाग गरजेचो.
दुसरें गोंय वैजकी म्हाविद्यालय सरकारी पांवड्यार फुडल्या पांच वर्सांत हाडप आयआयटी परस गरजेचें आसा. सेवा वाडीचेर आशिल्ल्या, रिटायरमेंट लागीं पाविल्ल्या अधिकाऱ्यां कडल्यान बरे सेवेची अपेक्षा करची न्हय.
मंत्र्यांचे कचेरेंत 65 वर्सां वयले पिरायेचे अधिकारी, कर्मचारी घेवचे न्हय.
आदले शेतकी मंत्री रवी नायक हांचीं खातीं मुख्यमंत्री सांबाळूंक शकतात. भौशीक बांदकाम, उदका पुरवण खातीं, कला अकादमी मंत्री, पक्षाधिकाऱ्यां कडेन दिल्ल्यान मुख्यमंत्र्यांचें वजें कमी जालां.
आमदार निलेश काब्राल, आमदार गोविंद गावडे आपल्या मतदारसंघांतच न्हय कार्यावळींनी समेस्तां मेरेन पावल्यात. मंत्रीपदा विणे ते मेकळेपणान उलोवंक, लोकांची कामांय करून घेवंक शकतात. ज्या अधिकाऱ्यां आड गावडे हाणी बोवाळ घाल्लो तांच्यो बदल्यो जाल्यात, तांच्या विस्वासांतल्या अधिकाऱ्यांक प्रमोशनां मेळ्ळ्यांत. 2027 खातीर आपले मतदारसंघ सांबाळपाक ते उणे पडचे ना. भाजपाचे प्रदेशाध्यक्ष, मुख्यमंत्र्यांनी जाय तेन्नाच तांकां मतदारसंघांत एकचित्तान वावुरपाक मेकळें केलां. आमदार काब्राल हांकां फाटले विधानसभा वेंचणुकेंत अपेक्षे प्रमाण मतां पडूंक नात. वेंचून येवन मंत्री जाले तेन्ना खातें जाग्यार घालपाचे येत्न फळादीक जातना तांचेर नोकऱ्यो दिवंक पयशे घेतिल्ल्याचे आरोप जाले. तांकां मंत्रीपद सोडचें पडलें. पूण विधानसभेंत ताणी सरकाराक सुचोवण्यो केल्यो, चुकीय दाखोवन दिल्यो. भौशीक बांदकाम खात्यांतलो गोंदळ सोंपोवप, दक्षीण गोंयांत उदरगतीच्या मार्गार व्हरपाक भौशीक बांदकाम मंत्री दिगंबर कामत वावुरतात. दिगंबरबाबांक तेंच खातें वर्सभरआदीं मेळिल्लें जाल्यार भौशीक बांदकाम खातें खूब सुदारपाचें.
मंत्रीपदां नासतना आमदार संकल्प आमोणकार, आमदार कृष्णा साळकार सरकारी येवजण्यो लोकां मेरेन पावोवपाक उदरगतींतली आडमेळीं पयसावपाक वावुरतात. भाजपाचे पयलींचे आमदार कांय मतदारसंघांनी क्रियाशील जावपाक लागल्यात. तांकां उमेदवारी दिवपाक दुसरे राजकी पक्ष फुडें आयले तरी अणभवी मुख्यमंत्री, प्रदेशाध्यक्ष, केंद्र सरकार, राज्य सरकाराची थिराय 2027 त 27 उमेदवार जिखून हाडपाक उपेगी.
सरकाराच्या कांय येवजण्यांचेर विरोधी आमदार बडी मारतात, कायद्यान आडमेळीं हाडटात तेन्ना मुख्यमंत्री जाप दितात. फोंडें मतदारसंघांतले विधानसभा वेंचणुकेंत 2022 वर्सा भाजपाच्या उमेदवारांक झुजचें पडलें. उपरांत जाल्ली उदरगत सरकाराक लावाची.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
