भांगरभूंय | प्रतिनिधी
दुयेंतींची संख्या 957 वयर; लोकांची मात आडनदर
पणजी: गोंयांत परतून कोरोनाच्या सक्रीय दुयेंतींची संख्या वाडत आसा. सोमार आनी मंगळार ह्या 24 वरांनी 174 कोरोनाचे सक्रीय दुयेंती सांपडिल्ल्यान दुयेंतींची संख्या 957 वयर गेल्या. फाटल्या कांय दिसां सावन सक्रीय दुयेंतींची संख्या वाडत आसा. पूण लोकांची हाचे कडेन आडनदर जायत आसा.
गोंयांत फाटल्या 24 वरांत 1 हजार 632 कोरोनाच्यो तपासण्यो जाल्यो. हातूंत 174 सक्रीय दुयेंती सांपडले. फाटल्या 24 वरांत 163 कोरोना दुयेंती बरे जाले. कोरोना बरो जावपाचो दर आतां 98.6 वयर गेला. गोंयांत आतां मेरेन कोरोनाक लागून 3 हजार 955 जाणांक मरण आयलां. मरण आयिल्ल्यांची संख्या उणी आसली तरी कोरोना सक्रीय दुयेंतींची संख्या मात वाडत आशिल्ल्यान भलायकी खात्या मुखार व्हड अडचण निर्माण जायत आसा.
फाटल्या 15 दिसांनी पंचायत वेंचणुकेचो प्रचार आशिल्लो. आतां ल्हवू ल्हवू परबो सुरू जायत आसात. वातावरणांत व्हड बदल जायत आशिल्ल्यान थंडी, खांक, जोर सारकीं दुयेंसां जायत आसात. तरिपूण कोरोना नेमाक पाळो मात कोणूच दिनात. लोकांनी कोरोना कडेन पुरायपणान आडनदर केल्या. समाजीक अंतर ना, मास्काचो वापर ना ते खातीर कोरोना दुयेंतींनी वाड जायत आसा अशें भलायकी अधिकाऱ्यान सांगलें.
तेच प्रमाण लोकां कडल्यान बुस्टर डोसा खातीर प्रतिसाद जायतसो मेळना. भलायकी खात्यान फुकट बुस्टर डोस सुरू केल्लो आसलो तरी लोक डोस व्हड प्रमाणांत घेतना दिसनात. भलायकी खातें बुस्टर डोसा खातीर आवाहन करीत आसा अशेंय भलायकी अधिकाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
