भांगरभूंय | प्रतिनिधी
भांगरभूंय । प्रतिनिधी
पणजीः कमी विद्यार्थी आशिल्ल्यो सरकारी प्राथमीक शाळा लागसर आशिल्ल्या दुसऱ्या शाळांनी विलीन करपाचें गोय सरकारान थारायल्लें आसतना ह्यो शाळा आमचे सुवादीन करात, शाळेचो निकाल आनी पटसंख्या कशी सुदारपाची तें आमी दाखोवन दितात, अशें आम आदमी पक्षान (आप) सांगून सरकाराक एके तरेन आव्हान दिलां.
आपचे गोंय प्रदेश अध्यक्ष अॅड अमित पालेकार हांच्या फुडारपणा खाला आप फुडाऱ्यांच्या शिश्टमंडळान मंगळाराक शिक्षण संचालक शैलेश झिंगडे हांकां एक निवेदन सादर करून विद्यार्थ्यांच्या हिता खातीर सरकारी प्राथमीस शाळाचें दुसऱ्या शाळांनी विलिनीकरण करपाचो निर्णय फाटीं घेवपाची विनवणी तांकां केल्या. सरकाराच्यान ह्यो शाळा चलोवपाक जायना जाल्यार तांची जापसालदारी घेवपाक आप तयार आसा अशें तांणी संचालकाक सांगलां.
गोंयच्या भुरग्यांक तांचे गरजेच्यो आनी दर्जेदार शिक्षणीस सुविधा दिवपाक दिवपाक आमच्यान जायना हें सरकारान मामून घेतल्यार कमी विद्यार्थी आशिल्ल्यो शाळा चलोवपाक घेवपाक आमी तयार आसात. दिल्ली मॉडेलाच्या पमाण शाळेंतली पटसंख्या कशी वाडोवप आनी शाळेचो निकाल कसो सुदारप हें आमी दाखयतात अशें पालेकार हांणी राज्य सरकाराक सांगलां.
चडशे गोंयकार गांवगिऱ्या वाठारांनी रावतात. शाळा तांच्या वाड्यारूच आशिल्ल्यान भुरग्यांक थंय सोपेपणान वचपाक मेळटा. शाळेचें दुसरे शाळेंत विलिनीकरण केल्यार ह्या भुरग्यांक सुमार 4 तें 5 किलोमीटर चलत वचून ते शाळेंत वच्चें पडटलें. बऱ्याच गांवांनी सारके रस्ते नाशिल्ल्यान शाळेंत वतना तांकां जायत्या आडमेळ्याक तोंड दिवचें पडटले अशें पालेकार हांणी सांगलें.
शिक्षण संचालकाक निवेदन सादर करपाक गेल्ल्या आपाच्या शिश्टमंडळान उपाध्यक्ष सुरेल तिळवे, वाल्मिकी नायक, राष्ट्रीय युवा विभागाची उपाध्यक्ष सेसिल रॉड्रिग्ज, मुख्य म्हणयारो राजदीप नायक आनी सुनील सिग्नापूरकार हांचो आसपाव आशिल्लो
“दरेका भुरग्याक शिक्षण घेवपाक मेळचें हें खातीर पयलो मुख्यमंत्री सर्गेस्त भाऊसायब बांदोडकार हांणी राज्यांतल्या दरेका गांवांत सरकारी प्राथमीक शाळा सुरू करून शिक्षणाचें मुळावण घातलें. तांच्या ह्या वावराक लागून साक्षरतेचे बाबतींत गोंयान देशांत उंचेली सुवात मेळयली. हालींसाराक राज्यांतल्या भाजपा सरकारान ह्या शाळां कडेन सामकी आडनदर केल्ल्यान तातूंत शिकपी भुरग्यांचो आंकडो कमी जायत आसा तशेंच प्राथमीक शिक्षणाचो दर्जो लेगीत देंवपाक लागला”- अमित पालेकार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
