भांगरभूंय | प्रतिनिधी
पेडणेंच्या आंबिये महाविद्यालयान हालींच एक राष्ट्रीय चर्चासत्र दवरिल्लें. इतिहास आनी कोंकणी विभागान तें दवरिल्लें. इतिहास विशयाची तुमकां आवड आसा, जाल्यार हातूंत करियर जावंक शकता? एखाद्या चर्चासत्रांत जर वांटेकार जावपाक जाल्यार त्या विशयाचेर, भाशेचेर शेक जायच. इतिहासा भितर करियर करपा सारकें कितें आसा तें पळोवया. तुमच्या शिक्षकांनी हाची म्हायती तुमकां दिल्याच आसतली, हातूंत दुबाव ना. पयले सुवातेर शिक्षक जावपाक हो फांटो तुमी घेवपाक शकता. आयज शिक्षकांक बरो पगार मेळटा, समाजांत मान मेळटा. तेन्ना शिक्षक जावपाक तुमकां उच्च माध्यमिक पांवड्याचेर बरे गूण घेवन पास जावंक जाय. मागीर बीएडा सारकी पदवी घेवपाक जाय. निदान सेकंड क्लास तरी. जितले चड गुण घेतात, तितलें बरें.
जर तुमकां काॅलेजींतल्यान विद्यार्थ्यांक शिकोवपाक जाय जाल्यार तुमकां नेट परिक्षा पास जावंक जाय. तशेंच तुमी एससी, एसटी, ओबीसी आसा जाल्यार कितलें आरक्षण आसा, तें जायरातींत पळोवपाक जाय. थंय तें सविस्तर दिल्लें आसता. हें पयलींच कळत जाल्यार बऱ्याक पडटा, संशोधन जावपाक चिकाटी, संयम जाय. वेळ पळोवन हें काम जावचे ना. हे खातीर रात दीस काम करपाची तयारी जाय. तुमकां नवो सोद लागूं शकता. वाचनालयांत वचून अभ्यास करपाची तयारी जाय. आड सुवातींचेर वच्चें पडूं येता. कोलवाळे मुशीर वाठारांत फादर हॅरीस हांकां बुद्धाची मुर्ती मेळ्ळी. ती तांणी मुंबय व्हरून संग्रहालयांत दवरली. दुसरें उदाहरण, रत्नागिरीच्या कातळ चित्राचें. तें फातराचेर आसा. तें सोदपाक इतिहासकारान मेहनत घेतली. आयज तीं चित्रां पळोवपाक लोक गर्दी करतात.
फक्त शिक्षकूच न्हय, तर हेर फांट्यांनीय तुमी वेगवेगळें करियर करपाक शकता. हे काॅलेजींत शिकोवपी साक्षी कुबेर हांणी धडाधड वळेरीच सांगलीं. ‘ह्या फांट्याचें करियर फक्त अध्यापना पुरते मर्यादीत ना. आर्ट हिस्टोरियन, रिसर्च असिस्टं, कंटेन्ट रायटर, ब्लाॅगर, अनुबोधपटा खातीर लेखन, प्रवासवर्णन करपाक शकतात. तुमच्या ब्लाॅगाचेर तुमी इतिहासीक लेखक म्हूण संद घेवपाक शकतात. एक मतींत घेवपाक जाय, असलें लेखन करतात, जाल्यार तुमचे कडेन पुरावे जाय. ओगीच मनात येता तो अदमास करीत जाल्यार लोकांची दिशाभूल जावंक शकता. इतिहासाचो विद्यार्थी केन्नाच फट सांगचो ना, तर्क सांगचो ना. भाशेचेरुय शेक जाय.’
साक्षी कुबेर इतिहास विशय घेवन पदव्युत्तर जालां. ताका सोद निबंदां भितर रुच आसा. ताणें कोलवाळ गांवाचेर लिखाण करून 26 व्या राष्ट्रयूी चर्चासत्रांत सादर केलो. ताची तोखणायूय जाल्या. दुसरें अध्यापक जावन आसा. अंजली गांवस. ते हेच काॅलेजींत इतिहास शिकयता. तें म्हणटा, ‘जायते खेपो विद्यार्थ्यांक इतिहास फांट्याची म्हायती नासता. म्हूण घडये ते लोकप्रीय फांट्यांकूच चड म्हत्व दितात. शिक्षकी आनी पत्रकारिता हे तशे लोकप्रीय फांटे. पूण हाचे भितर इलेक्ट्राॅनिक पत्रकारिता आयली आनी संदी खूब वाडल्यात. आयज गांवांतल्या विद्यार्थ्यांक पसून संगणकाचें गिन्यान आसा, अशें म्हजें निरिक्षण.’ अंजली हें केरी- वाळपयचें.
धावे, बारावेचे अर्ज
धावेची परिक्षा सगल्यां खातीर म्हत्वाची. मागीर ती खंयच्याय मंडळाची आसना. गोंय शालांत मंडळाची धावी, बारावेची परिक्षा केन्ना जातली तें विद्यार्थ्यांक खबर आसा. बारावेची 10 फेब्रुवारीक तर धावेची 2 मार्चाक. चार ते पांच म्हयने उरल्यात. आतांच तयारेक लागचें. ते खातीर तुमी आॅनलायन अर्ज करपाक शकतात. शाळाय नांवा धाडटली. ते विशीं तुमी शिक्षकां कडेन चवकशी करात.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
