भांगरभूंय | प्रतिनिधी
गोंयांत स म्हयन्यां भितर दोन दरोडे पडले. गुन्यांवाची पद्दत एक सारकीच आशिल्ली. म्हणटकच ही टोळी एकूच आसूंक जाय. हे दरोडेखोर बांगलादेशांत पळून वचपाक येशस्वी थारल्यात खंय! ते मुळचे थंयचेच काय भारतांतले ताची म्हायती पयलीं मेळोवची पडटली. ते उत्तर भारतांतले हिंदी उलयताले, अशीय म्हायती फाटीं उजवाडाक आयल्या. तरीय भाशे वयल्यान, भेसा वयल्यान तांचें नागरिकत्व, राज्य, देश थारावप चुकीचें वा समाजीक नदरेन धोक्याचें थारूं येता. सगलें कितें पुलीस तपासाचेर अवलंबून आसा. कांय जाणांच्या मतान, आतां तांकां धरप कठीण. तरीय गोंय पुलिसांनी केंद्रीय तपास यंत्रणां, बांगलादेशाच्या अधिकाऱ्यांचे मजतीन सोद घेवचो. तंत्रज्ञान, तांकां थंय व्हरून पावोवप्यांची चवकशी, फोन काॅल ट्रेस करून ते नेमके खंय आसात, तें बेगीन सोदचें.
भारतीय शिमांचेर कडक बंदोबस्त आसता. ‘यहाँ परिंदा भी पर नहीं मार सकता’ अशें जायते जाण अभिमानान सांगतात. मात आमची शीम इतली व्हड आनी बंदोबस्ता विणें आसा, की हांगां आतंकवादी पसून सहज 100 किलोमिटर भितर येतात. बांगलादेश शिमेचेर तर लश्कराची नदर चुकोवन दीसपट्टे विदेशी आमच्या देशांत घुसतात. ताचेर कांय वर्सां पयलीं एक खबरां व्हिडियो आयिल्लो. तातूंत ते कशे भितर येतात, ताचें सविस्तर वर्णन आशिल्लें! घुसखोरांक देशांत येवपाक मनाय केल्यार अर्दे प्रस्न सुटावे जातले. गोंयांत ‘रात पर्यटन’ प्रमाणा भायर वाडलां. नोव्हेंबर ते जानेवारी मेरेन ते तेंगशेर आसतालें, तशे, बाराय म्हयने पर्यटक आनी गोंयकार मध्यान रातीं मेरेन हेडत आसतात. ह्या निशाचरां मदीं गुन्यांवकार आसपाक शकतात. न्हय आसतात. म्हणटकच पुलिसांची जापसालदारकी वाडली. दोनूय दरोड्यांचो पुलिसांक तपास लागूंक ना, हें सरकारी यंत्रणेचें व्हडलें अपेस. बंदोबस्त, गस्त घालप्यांचीं नांवां कागदार आसलीं, तरी ते कांय वेळार थंय आसनात, असो म्हापशेंचे समाजवावुरपी अॅड. राणे हांचो दावो. म्हापश्यां मार्केटांत बंदोबस्ता खातीर सशस्त्र पुलीस आसतालो, तो कितलेशेच म्हयने दिसूंक ना, अशेंय तांणी म्हणलां. तेन्ना वरिश्ठ पुलीस अधिकाऱ्यांनी हाची दखल घेवन थंय दीसरात बंदोबस्त दवरपाक सांगचो. कारण आदलो आनी आतांचो काळ हातूंत व्हडलो फरक आसा. चोरयो, गुन्यांव, मारामारीचीं प्रकरणां वाडल्यांत. हातूंत फक्त भायलेच आसतात, अशें ना. आमीय फाटीं नात!!
फोना वयले काॅल, संदेश, आयएमईआय नंबर तपासल्यार दरोडेखोर खंय आसात, ते कोण ताची म्हायती मेळूं येता. तांणी बँक, युपीआय वेव्हार केल्याच आसतले. तांकां गाडयेन पावोवप्यांची चवकशी सध्या चलता. सीसीटीव्ही सारके चलतात काय नात, तें निदान सप्तकांत एकदां तरी तपासपाक जाय. गोंयांत बिराडां करून भायल्यांक दवरपाचो एक जोडधंदो सुरू जाला. तातूंत गुन्यांवकारूय आसतात. बिराडाक कोण रावतात, तांचें उलोवपाचो, गजालींचो कोणाक दुबाव आयल्यार तें पुलिशेक कळोवप बरें. पुलिसांनीय दुबाव आसल्यार फोन काॅलांची म्हायती भायले भायर काडपाक जाय. कायद्यान कोणाच्या खाजगी गजालींनी धवळाधवळ करपाक मेळना. तरीय देशाचे, समाजाचे सुरक्षे खातीर हें करचें पडटा. बिराडाच्या धनयांक सीसीटीव्ही कॅमेऱ्याची सक्ती करची. राज्यांचे शिमे वयले पुलीस, हेर विभाग कडक जावचे. थंय भ्रश्टाचाराक थारो मेळचो न्हय. शिमेरूय पासपोर्ट, आदार कार्ड, बायोमॅट्रीक्स यंत्रणे वरवीं बंदोबस्त दवरुंक फावो. भारतांत फक्त घुसखोरूच येतात, अशें ना. तर आतंकवादी, गुन्यांवकार, दरोडेखोरूय आयल्यात. गोंयांत जायते कडेन दुबावीत हालचाली जातात, थंय समाजानूय लक्ष दवरुंक जाय.
दरोडेखोर, ड्रग्स विकपी, चोरयो करपी अशें रातोरात, दिसा उजवाडांत गोंयच्यो शिमो हुपून पळपाक लागले जाल्यार, गोंय म्हणल्यार ‘आओ जाओ घर तुम्हारा’, हाचेर म्होर बसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
