भांगरभूंय | प्रतिनिधी
अादल्या तेंपार रासवळ कुटुंबां आसतालीं. घरांतल्यांक मार्गदर्शन करपाक, ल्हान भुरग्यांचो अभ्यास घेवपाक, दुयेंतींची सेवा करपाक मनीस आसताले. आतां घोव- बायलां दोगांय नोकरी करतात. म्हणटकच सगलींच काम वावराडेक करचीं पडटात. तीय बी गोंयकार आसताच अशें ना. दुयेंतींची सेवा करपाक मनीस दवरतात. तांकां पगार दिवपाची ऐपत बऱ्याच गोंयकारां कडेन आसा. पूण, आपलो घरचो अशें समजून काम करपी मनीस आतां मेळप कठीण जालां. जीएमसींत काल पॅलेटीव्ह केअर सेवेचें उक्तावण जालें. राज्यांतल्या सगल्या हाॅस्पिटलांनी अशी सेवा सुरू करपाचो हावेस भलायकी मंत्र्यान उक्तायला. ही सेवा दिवपी गोंय हें पयलें राज्य थारलां. दिल्लीच्या डिफीट एनसीडी इंडिया फावंडेशना वांगडा हे विशींची समजिकाय कबलात जाल्या.
पॅलेटिव्ह केअर ही मुळांत विदेशी संकल्पना. गंभीर, चड तेंपाच्या वा जीवघेण्या दुयेंसांनी जे त्रासल्यात, तांच्यो वेदना, त्रास, मानसीक तणाव उणो करपाक ही भलायकी सेवा दितात. दुयेंतीचे जिणेचो दर्जो सुदारचो, हो ताचे फाटलो उद्देश. दुयेंसाचीं लक्षणां दिसतात तीं उणीं करप, ताका आनी ताच्या कुटुंबाक मानसीक, भावनीक आदार दिवप, उपचारा विशीं योग्य निर्णय घेवपाक मार्गदर्शन करप, दुयेंतीच्या जतनायेच्या काळांत कुटुंबाक मजत करप, अशीं कामां ही सेवा दिवपी करतात. तीं करपाक परोपकारी वृत्तीचे दयाळ, मोगाळ मनीस जाय.
ही सेवा फक्त जिणेच्या निमण्या टप्प्यांतूच दिनात, तर उपचार चलतना पसून दितात. दुयेंसाच्या खंयच्याय टप्प्याचेर ती दिवंक मेळटा. कॅन्सराचेर केमोथॅरेपी चलतना वेदना उणी करपाक पॅलेटिव्ह केअर दिवं येता. हाॅस्पिस केअर ही सेवा निमण्या टप्प्याचेर सुसेग आनी मानान जीण जगपाक दितात. घरच्या घरा वा हाॅस्पिटलांतूय ह्यो सेवा मेळटात. दोतोर, नर्स, मानसोपचार तज्ञ, धर्मीक सल्लागार, फिजिओथेरपिस्ट असो पंगड हें काम करता. जीएमसींत म्हणटकच पॅलेटिव्ह केअर सेवा मुफत आसतली. मात घरांत ते खातीर पयशे दिवचे पडटले. होम नर्स ही संकल्पनाय जायते कडेन आसा. गोंयकार ती घेतातूय बी. पूण दुयेंतीची सगली जतनाय घेवपाक चडशे दादलो वा बायलेक दवरतात. हे खातीर 10 ते 20 हजार रुपया म्हयन्याक दिवचे पडटात. कांय जाण तितले पयशे दिवन वृद्धाश्रमांत दवरतात. मात, सगल्यांकूच हें परवडपाचें ना. उपचारा बाबतींत प्रशिक्षीत आशिल्ल्या होम नर्सींचो आंकडो वाडप गरजेचें. भलायकी खात्यान सुरू केल्ली पॅलेटिव्ह केअर सेवा घरांतूय दिवपाचो विचार आसा. ती बेगीन चालीक लागपाक जाय. कारण जायत्या येवजण्यांच्यो घोशणा जातात, मात कांय कारणांक लागून मागीर त्यो चालीक लागनात. गोंय हें आंवाठान ल्हान राज्य आशिल्ल्यान ही सेवा सगल्याक दिवप तितलेंशें कठीण न्हय. दिल्लींत पॅलेटिव्ह केअर सेवा दिवपी केंद्रां आसात. तीं दिसाक साडेतीन ते स हजार रुपया घेतात. म्हणटकच सगल्या हाॅस्पिटलांनी ती मुफत वा उण्या मोलांत सुरू केल्यारूच सामान्य भौसाक परवडटली. फक्त सरकारूच न्हय, तर समाजसेवी क्लब, मंडळांनीय हे तरेची सेवा दिवपाक फुडाकार घेवचो.
हाचेच वांगडा जीएमसी वयलो ताण उणो जातलो, हे खातीर पावलां उखलपाक जाय. तालुको पांवड्या वयलीं हाॅस्पिटलां आधुनीक उपचार करपाक सज्ज जायत जाल्यार दुयेंतींक ह्या हाॅस्पिटलांतल्यान त्या हाॅस्पिटलांत व्हरपाची गरज पडची ना. पयसुल्ल्या वाठारांत अपघात जालो जाल्यार ताका हाॅस्पिटलांत व्हरता म्हणसर वेळ लागता. देखून हेलिकाॅप्टर सेवा सुरू करपाक जाय. कांय राज्यांनी ती आसा. ते खातीर थारावीक जाग्याचेर हेलिपॅड उबारचे पडटले. हेर कांय राज्यांचे तुळेन गोंयांत उपचार बरे मेळटात. खाजगी दोतोरूय आसात. पूण उण्या शुल्कांत वा मुफत उपचार मेळत जाल्यार बरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
