भांगरभूंय | प्रतिनिधी
येणावळ मंत्री बाबूश (आतानासियो) मोंसेरात राष्ट्रीय स्वयंसेवक संघाचे बसकेक आझाद मैदानार हाजीर आशिल्ले. हे खबरेचेर खीणभर विस्वास बसलो ना. सरकाराचे एक प्रतिनिधी म्हणून ते गेल्ले यआसत. समेस्तां मदीं धा पंदरा मिणटां उपरांत तांकां बसकेंतल्यान वचूं येतालें. ते एक वरा वयर बसकेक रावले, संघाच्या शिस्ती विशीं उलयले ताका म्हत्व आसा. तांचे मदीं जाल्लो बदल केंद्रीय गृह मंत्री अमीत शहा हांचे सभे वेळारय दिसलो. आपल्या मतदारसंघाची उदरगत ही बाबूश हांची मोख. गोंयचें राजपाटण पणजी बाबूश हांचे परस भाजपा कडेन फाटलीं 30 वर्सां आसा. मतदारसंघांत जशीं आदले मुख्यमंत्री मनोहर पर्रीकार हांचे खासा मतदार आशिल्ले तशेच बाबूश हांचोय मतदारवर्ग आसा हें न्हयकारूंक येना. म्हजें घर येवजणेचो लाव पणजे परस ताळगांव मतदारसंघाक चड मेळटलो हातूंत दुबाव ना. पणजे जिखले तरी बाबूश हांची नदर ताळगांव मतदारसंघाचे उदरगतीचेर चड आसता. ते आपलो मूळ मतदारसंघ ताळगांवाक विसरुंक ना. पणजी स्मार्ट सिटीचो लाव ताळगांवांकय मेळ्ळा.
गोंय 2037 मेरेन उदरगतींत खूब फुडें गेल्लें राज्य आसतलें हो विस्वास केंद्रीय गृह मंत्र्यांनी दिला. 2027 विधानसभा वेंचणुकेची ती भाजपाची मोख आसतली, मुळावी येवजणय जाल्या हो रकाद केंद्रीय गृह मंत्र्यांनी धाडला.
चार आमदारां वयल्यान 27 आमदारां मेरेन पावपाचें गणीत सोंपें जातलें तें भाजपा आड एक मुखेल राजकी पक्ष नाशिल्ल्यान. पयले दीस एकठांय येवपाची, दुसरे दीस वेगळोचाराची भास जेन्ना भाजपा आड झुजपी राजकी पक्ष करतात तेन्नाच मतदारांची मनां सवकासायेन तयार जातात. प्रादेशीक पक्षांची तिसरी शक्त खंयच्या राजकी पक्षांक बळगें दिता ताचो अणभव मतदारांक आसा.
गोंयांत आतां उच्च शिक्षण घेतिल्ले मतदार वाडटा हें सत तितलेंच 10 वी 12 वी मेरेन शिक्षण घेतिल्ले मतदारय आसात हें खरें. मतदार शिकिल्ल्यान आपलें बरें वायट तांकां कळटा. आपुसुवार्था बराबरीन फुडार पळोवपाची जाणविकाय मतदाराक जाता तेन्ना तांचे कडेन आत्र्या पयऱ्यान कार्यावळींतल्यान जोडून घेवपी भाजपाय बदलता हें तांकां कळटा.
2027 त 27 आमदार मेळोवपाची मोख नवो प्रदेशाध्यक्ष वेंचणुकेच्या दोन वर्सां आदीं दितना भाजपान दवरल्या. उसरां मंत्रीमंडळ बदल जालो, प्रशासन फुडल्या तीन म्हयन्यांत व्हड बदला कडेन वतलें अशी आस्त आसा. 2022 विधानसभा वेंचणुके वेळार दिल्ल्या उतराक भाजपान पाळो कितलो दिला तें मतदार पळयतले.
2037 मेरेन गोंय
पुराय उदरगत करपाची नवी मुळावी येवजण करतना गोंयांत जावपी तापमान तशेंच हेर बदलांचो विचार जाला आसतलो. तिसरो ल्हान विमानतळ, सिने शिक्षण दिवपी अकादमी, कुशळटाय शिक्षण दिवपी विद्यापीठ, उंचेल्या तशेंच तंत्रीक शिक्षणाक तेंपा प्रमाण कुरपणे घालप, तीन दसकां आदलीं म्हामंडळां गुठलावप, अध्यात्मांतल्यान विसव, शांती पर्यटन थळ म्हणून राज्याक नामना जोडून दिवप, स्वयंपूर्णा 3 तल्यान अन्न प्रक्रिया उद्देग हाडप, दोंगर, शेतां राखून दवरप, दायज बिल्डिंगेंचो पुर्नविकास करप, मडगांव, म्हापसा स्मार्ट सिटी करप हे प्रकल्प मुखेल येवजणेंत आसचे.
2026 वर्स सोंपता मेरेन नवे कला अकादमीची बुन्याद घालची. खणींत उत्खननाचो वावर गांव, गांवकारांक त्रास करिनासतना चालीक लागचो. काडिल्ली खाणमाती भायर धाडपाक वेगळो मार्ग तो मेरेन जावपा पासत यत्न जावचे.
सोरो, कसिनो ड्रग्ज मेकळें गोंय ही फक्त घोशणा उरची न्हय. शाळा, विद्यालयां, म्हाविद्यालयांच्या वण्टींचेर तीं उतरां लुकसाणेचे म्हायती सयत आसचीं. मुख्यमंत्र्यांनीच न्हय सरकारांतल्या अधिकारी, मंत्र्यांनी सोरो, ड्रग्ज, कसिनो पसून गोंयकारांनी पयस रावचें हें कार्यावळींतल्यान सांगपाची गरज उप्रासल्या. कसिनो रेग्युरेलिटी कमिशन वा आयोगाची बांदावळ बेगीन करची.
2037 त आनीक कोयर वेवस्थापन प्रकल्प जावपाक जाय. नितळसाणीचें म्हत्व नगरपालिका पांवड्यार नगरसेवकांनी सांगून नागरिकांक जागें करचें. प्रदुशणा विरयत उच्च कुशळटायेच्या मनीसबळाक आस्पावन घेवपी उद्देग, नवें वैजकी म्हाविद्यालय 2028 मेरेन हाडपाक नेट लावचो.
गोंयांत न्हंय येरादारीच्या वेवसायाक संद आसा. सरकारान न्हंय येरादारी खात्याचो पांवडो वाडोवन वेवसायांत शिस्त हाडची. बार्ज येरादारी जाता त्यो न्हंयांतल्या बोटींगाचेर मर्याद कशी घालूंक मेळटली ताचो
अभ्यास जावचो.
भुगोलीक नदरेन गोंय ल्हान आशिल्ल्यान थळांतर चोंब्यांनी करतल्यांचेर कायद्यान कारवाय करप शक्य आसा? गोंयच्या साधनसुविधांचो लाव घेत गोंयकारांचें थळांतर करपी नांव इबाडटा आसत तर तांकां ख्यास्त जातलीच पूण फुडारांत तांच्या आलाशिऱ्याचो प्रस्न उप्रासतलो तेन्ना उपाय सोदचे पडटले. राज्यांत गोंयकारां परस गोंयां भायले अती जातात हाची भिरांत जाण्ट्यांक आसा. अशे वेळार गोंयची भूंय गोंयां भायल्यांक विकतना सादूर रावचें पडटलें. पर्यटनच न्हय जाल्यार हेर फेस्तां निमतान गोंया येवन गोंयांतच रावपी वाडत आसात. पंदरा वर्सां राबित्याच्या नेमावळीचो लाव तांकां मेळप गोंयकारांच्या मुळार येवचें ना ही जतनाय घेवची. 2027 त नासलो तरी फुडारांतले वेंचणुकेंत हो विशय हाता भायर वचपाची शक्यताय आसा. 2037 मेरेन गोंय पुराय उदरगतींत व्हरतना गोंयकारपण राखपाचें आव्हान आसा.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
