रोहित – कोहलीचेर अन्याय जाता ?

भांगरभूंय | प्रतिनिधी

भारतीय पंगडांत एकाच वेळार रोहित आनी विराट अशे दोन खेळगडे आसप म्हणल्यार भारता खातीर व्हड गजाल.

भारतीय दादल्यांचो क्रिकेट पंगड बदलता. तशें पळोवंक गेल्यार व्हड प्रमाणांत बदल जावपाचो हो दुसरो प्रसंग म्हणूं येता. पयलो मॅच फिक्सिंगेक लागून भारतीय पंगडांत होलसेल बदल जाल्लो, त्या वेळार सचीन तेंडुलकर उपरांत सौरव गांगुली कॅप्टन जाल्लो. आनी आतां.
2000 वर्सा मॅच फिक्सींग प्रकरण उक्तडार आयिल्लें. त्या वेळार कॅप्टन मोहम्मद अझरुद्दीन, अजय जडेजा, मनोज प्रभाकर, अजय शर्मा हांचे वांगडा फिजियो अली इराणी हांचेर बंदी घाल्ली. ते उपरांत हेर कांय खेळगड्यांकूय घरचो रस्तो दाखयिल्लो. ह्या प्रकरणा उपरांत भारतीय पंगडांत तसो होलसेल बदल जावंक नाशिल्लो.
जवागल श्रीनाथ, सौरव गांगुली, अनील कुंबळे, राहुल द्रवीड, व्हीव्हीएस लक्ष्मण हे कांय थारावीक अंतरान निवृत्त जाले. (कांय जाणांक केलें म्हणल्यार जाता). ते उपरांत क्रिकेट पिळगीय थारावीक अंतरान निवृत्त जाली. सचीन तेंडुलकरूय भारतीय पंगडांत बरे खेळगडे आसतना सन्मानान गेलो. महेंद्रसिंग धोनीय सन्मानान गेलो. युवराज सिंग, सुरैश रैना हांकां पंगडांत घेनासतना भायर घाले. आतांय कांय खेळगडे पंगडांत नाशिल्ल्यान भायर उरपाक लागल्यात.
जसप्रीत बुमराक मुखार हाडटना इशांत शर्माक काय न्हय कसो भायर दवरलो. झहीर खानाच्या तोडीचो बॉलर म्हूण इशांत शर्माचो रिकॉर्ड आसा. इशांत आनी झहीर खानान टॅस्टींत 311 विकेटी घेतल्यात. मात, झहीराक जो सन्मान मेळ्ळो, तो इशांताक मेळूंक ना. 2011 वर्ल्ड कप जिखून दिवपी युवराज सिंगाची खेळपाची इत्सा आसून लेगीत ताका परत खेळपाक जाय तशी संद मेळूंक ना. काळ फुडें वता तसो ताका फाटीं उडयलो. अश्टताशी सुरेश रैनाय अाडवाद ना. अजिंक्य रहाणे, चेतेश्वर पुजारा हांचेंय अशेंच जालें.
सौरभ गांगुली आनी चॅपेल वादा उपरांत सौरभ गांगुलीक कॅप्टनशीप व्हगडावची पडिल्ली. चॅपेल म्हणटा तें खरें, अशी त्या वेळार परिस्थिती आशिल्ली. गांगुलीक पंगडांतल्यान भायर दवरपाचोय प्रकार जालो. गांगुलीन परत-परत बरो खेळ करून कमबॅक केलें. निमाणें मॅन ऑफ दी सिरीज घेवन निवृत्त जालो.
आतां हें सांगपाचें म्हणल्यार, सध्या अश्योच घडणुको जायत आसात. वन डे वर्ल्ड कपांत आपल्या खेळान पुराय पंगडाची मानसीकता बदलपी, थंडपणान आक्रमक कॅप्टनशीप करपी रोहित शर्माक मेळटा ती वागणूक पळयल्यार पोरण्यो यादी मेंदवांतल्यान भायर येवपाक लागल्यात. रोहितान वन डे वर्ल्ड कपांत भारताक फायनलींत व्हेलो. थंय खेळपट्टी कॉत्र जाली. तशेंच ट्रेवीस हेड नांवाचो ऑस्ट्रेलियन दैत्य (आक्रमक बॅटींग करपी) अकस्मात तयार जालो. जंय कोणाचेंच बॅट चलना थंय हेडान खेळाचें समिकरणूच बदल्लें आनी त्यावेळार बळिश्ट आशिल्लो भारतीय पंगड हारलो.
मात, ह्या हारींतल्यान आनीक कोण कितें शिकला ना शिकलो खबर ना. मात, रोहित शर्मा आनी विराट कोहली एक गजाल शिकले. तें म्हणल्यार म्हत्वाचें मॅचींत हेर खेळगड्यांचेर पातयेवन उपेग ना. जमता तितलो वेळ खेळपटयेर उबो रावपाक जाय, जैत खंयच वच्चें ना. परिणाम म्हणल्यार टी-20 वर्ल्ड कप. ह्या वर्ल्ड कपाचे फायनलींत विराट कोहली जे पद्दतीन खेळ्ळाे तें पळयत जाल्यार तो फॉर्मांत ना अशें कोणूच म्हणचो ना. तशेंच रोहित शर्मान आपल्या कॅप्टनशिपीन सगल्यांचीं मनां जिखलीं. हार्दीक पांड्याचो ताणें हुकुमी एको कसो वापर केलो. जसप्रीत बुमराचेर सगल्यांची नदर आसतना ताणें पांड्याक छुपे अस्त्र कशें वापरलें. हातांतली गेल्ली फायनल ओडून हाडली.
चँपियन्स ट्रॉफी सर्तीचे फायनलींत खेळपटयेर उबो रावपाची जबाबदारी रोहित शर्मान घेतली. निकाल कितें? 9 म्हयन्यां भितर दोन आयसीसी ट्रॉफी भारताच्या नांवार जाल्यो. हे मॅचींत रोहित शर्मान पोरणो रोहित शर्मा दाखोवन दिलो. तो आपल्याक जाय तसो खेळपाक शकता. खेळ घुंवडावंक शकता, हें ताणें दाखोवन दिलें. भारतीय पंगडांत एकाच वेळार रोहित आनी विराट अशे दोन खेळगडे आसप म्हणल्यार भारता खातीर व्हड गजाल. जशें एका वेळार सचीन आनी गांगुली आशिल्ले, तशें रोहित आनी विराट. ह्या चौगांय खेळगड्यांची खाशेली गजाल म्हणल्यार देशा खातीर ते पुराय मनान खेळ्ळे. स्वताचो खेळ बलिदान केलो. सचिनान जायते फावटी आपल्या खेळांत बदल केलो. परिस्थिती प्रमाण खेळ केलो. गांगुलीन आक्रमक खेळ करीत एक देख घालून दिली. तशेंच सेहवागाक खेळोवपाक लागून स्वताची ओपनींग सुवात लेगीत सोडली. हो निर्णय घेवंक नाशिल्लो जाल्यार ताच्या नांवार आनीक कितल्योश्योच धांवड्यो आनी शेंकडे आसपाचे.
विराटानूय भारतीय टॅस्ट क्रिकेट बदलपा खातीर खूब मेहनत घेतली. स्वताच्या खेळान आदर्श घालून दिलो.
रोहित शर्मान तर आपल्या खेळाचो सभावूच बदल्लो. वन डे क्रिकेटींत 3 दोट्टी शेंकडें काडपी रोहितान शेंकड्यां खातीर, अर्दशेंकड्यां खातीर खेळपाचे सोडून दिलें. पयल्या धा ओव्हरींत बऱ्यो धांवड्यो आयल्यो जाल्यार उरिल्ल्या 40 ओव्हरींनी मात्सो सुसेगाद खेळत जाल्यार लेगीत जिखपा सारक्यो धांवड्यो येतल्यो, असो खेळ करपाक सुरवात केली. तातूंत तो जायते फावटी चाळीशींत बाद जालो. मात, भारतीय पंगड जिखत रावलो. ताणें आपल्या खेळा विशीं उलोवनूय दाखयलें. स्वता खातीर खेळत जाल्यार जाय तितल्यो धांवड्यो काडूं येतात. पंगडा खातीर खेळटना वेगळो विचार करचो पडटा. ताणें वेगळो विचार केलो, देखून आयज भारतीय पंगड ऑस्ट्रेलिया, दक्षीण आफ्रिका, इंग्लंडाक आक्रमकतायेन जाप दिवपाक शकता.
टॅस्ट क्रिकेटींत प्रशिक्षक द्रवीड गेले उपरांत गंभीर आयलो आनी भारतीय पंगड डब्ल्यूटीसींत अव्वल सुवाते वेल्यान तिसरे सुवातेर पावलो आनी भायर पडलो. दिस्त त्या वेळार रोहित-विराटाच्यो धांवड्यो जावंक ना म्हूण टॅस्टींतल्या हारींक दोगांकूय जापसालदार धरले. उपरांत तांकां भायर दवरतले अश्यो खबरो येताल्यो. मात, इंग्लंड भोंवडें आदी दोगांयनी टॅस्टींतल्यान निवृत्ती जाहीर केली. तांकां तशें करचें पडलें, अशें म्हणूं येता. ते आदीं वर्ल्ड कप जिखले उपरांत दोगांयनी टी-20तल्यान निवृत्ती घेतिल्ली. आतां वन डे क्रिकेटींत तरी सन्मानान खेळटले म्हूण विराट-रोहित मोगींक दिसतालें. मात, अचकीत तिनूय प्रकारच्या क्रिकेटींत एकूच कॅप्टन आसचो, 2027 वर्ल्ड कपा वेळार रोहित खेळत आसतलो वा नासतलो खबर ना अशें म्हणीत रोहिता कडल्यान कॅप्टनशीप काडून घेतली. आतां रोहित आनी विराटाच्या कामगिरीचेर नदर दवरतले. खेळ जायना जाल्यार भायर धावडटले, अशी परिस्थिती आसपाक शकता. व्हडल्या खेळगड्यांचेर अशी परिस्थिती येता, हें पळोवन भारतीय क्रिकेट योग्य दिकेन वता काय? असो प्रस्न पडटाच.

अमर पाटील
7507495151