भांगरभूंय | प्रतिनिधी
उचेलें शिक्षण घेवचें आनी व्हडल्या पगाराची नोकरी करची अशें सगल्यांकूच दिसता. ते खातीर कांय विद्यार्थी विदेशांत वतात, थंय रावन शिक्षण पूर्ण करतात. स्थायीक जातात. थोड्यांक तर विदेशांत वचपाचें पिशेंच लागिल्ले पळोवंक मेळटा. अमेरिकेंत डोनाल्ड ट्रम्प सत्तेर येत सावन कोणाक व्हिसा सहसा मेळनात. तांणी तो दिवपाचे पद्दतींत बदल केल्यात. अमेरिकाच न्हय, तर भोवतेक देशांनीय हो कायदो बदल्ला. ताचो फटको भारतीयांक बसतलो. कारण विदेशांत वचपांत भारतीय (फाटोफाट चीन, कॅनडा) पयल्या क्रमांकाचेर आसात.
आॅस्ट्रेलियेक वतलो जाल्यार खर्चाक पयशे कितले हाडल्यात ताचे पुरावे तांकां दिवचे पडटले. कांय काळा खातीर येवप्यांक परिक्षा दिवची पडटली. विद्यार्थी नोंदणेचेर मर्यादा घाल्यात. अमूकच नवे विद्यार्थी घेवपाक मेळटले. व्हिसा शुल्क वाडयलां. युकेंत अभ्यास पुराय केले बगर ग्रॅज्युएट व्हिसा मेळचो ना. व्हिसा, इमिग्रेशन हेल्थ व्हिसा शुल्क वाडयलां. कॅनडांत भारतीयांचो व्हिसा न्हयकाराचो प्रसंग येवं येता. तपासणी कडक केल्या. अमेरिकेंतूय होच प्रकार. थंय तुमी सोशल मिडियाचेर कितें दिवे लायल्यात, तेंय दाखोवप बंधनकारक केलां. म्हणजे खरो अकावंटूच दाखोवचो पडटलो. खरें म्हणल्यार भारतीयांचेर आयिल्ल्या ह्या बंधना आड आमच्या सरकारान आवाज काडपाक जाय. नाजाल्यार थंयच्या दर्ज्याच्या लागीं पावपी शिक्षण, संशोधनाची हांगां तजवीज करपाक जाय. विदेशी शिक्षण मळा वयल्या ह्या बदलांक लागून व्हिसा न्हयकारपाचें प्रमाण वाडपाक शकता. कॅनडा हे बाबतींत पयल्या क्रमांकाचेर आसा. आमकां भारतीयांक तें वेगळो न्याय दिवपाक लागल्यात. शुल्क वाडयिल्ल्यान खर्च वाडटलो. पयशांची पोटली तयार दवरची पडटली. ते विशीं थंयच्या सरकाराक कळोवचें पडटलें. व्हिसा मेळपाक कळाव लागलो जाल्यार शिक्षणीक वर्स चुकपाक शकता. अमेरिकेंत वचपी विद्यार्थी अर्थांत गिरेस्त आसतात. उरिल्ले रीण काडून पयसो उबो करतात. मात व्हिसा बदलाक लागून विद्यार्थी जर्मनी, फ्रान्स आनी सवाय शुल्क आशिल्ल्या देशांनी वचपाक शकतात. कितेंय जालें तरी हाचे मुखार विदेशांत शिक्षण घेवपाचो निर्णय भारतीयांक विचार करूनच घेवचो पडटलो. अभ्यासक्रम पूर्ण जातकच 99 टक्के विद्यार्थी थंय काम करतात, स्थायीक जातात. पूण आतां थंयूय नवे नेम चालीक लागिल्ल्यान भोवतेकांक मायदेशांत परत येवचें पडूं येता. भारतीय चड करून अमेरिका, युके, कॅनडा आनी आॅस्ट्रेलियेक वतात. येवपी काळांत विद्यार्थी ह्या देशां पसून पयस रावल्यार अजाप न्हय.
विद्यार्थी भारतांतूच रावतले, हे खातीर सरकारान विद्यापिठांचो शिक्षणीक दर्जो वाडोवपाक जाय. तरीय कोण विदेशांत वचपाकूच सोदतात जाल्यार, तांकां व्हिसा धोरण, बदल हाचे विशीं म्हायती दिवची. विदेशांतल्या संदीं विशींची वॅबसायट केल्यार चड बरी. विद्यार्थ्यांक रीण, अनुदान दितात, तें वाडोवचें. जपाना कडेन केल्या तशी भोवतेक देशां कडेन शिक्षणा संबंदी कबलात जावप गरजेचें. जंय आमचे विद्यार्थी शिकतात, थंय तांकां शिक्षणाचे बाबतींत मजत करपी केंद्र जाय. संदींची वॅबसायट अशें वयर म्हणलां. त्यो आसात, विवीध देशांच्योय वॅबसायटी आसात. तरीय बऱ्याच विद्यार्थ्यांक कांयच खबर नासता. खंयचे देश नेमकी कसल्या शिक्षणाची संद दितात, तें विद्यार्थ्यां मेरेन पावोवप, तांकां अर्ज भरून दिवप गरजेचें. ते खातीर स्वराज्य संस्थांक कामाक लावचें. एच 1 बी व्हिसाचेर भारतीय अमेरिकेक नोकरेक वतात. तांकां आतां लाखूच भायर काडचे पडटले. भायले कर्मचारी कामाक दवरपी कंपनिंकूय वाडिल्लें शुल्क भरचें पडटा. म्हणटकच ते सवाय शुल्काचे उमेदवार सोदतले, हातूंत दुबाव ना.
शुल्क वाडयिल्ल्यान अमेरिका आनी हेर देशांचे हाल जातले, असो अदमास कांय ‘विचारवंत’ उक्तायतात, पूण ताचे पयलीं आमच्या विद्यार्थ्यांचें, नोकरदारांचें कितें जातलें, ताचो आमी विचार करूंक जाय, उपाय काडूंक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
