भांगरभूंय | प्रतिनिधी
आयज 8 ऑक्टेबर. दर वर्सा 8 ऑक्टोबर हो दीस भारतीय वायूसेना दीस म्हूण पुराय देशांत मनयतात. ह्या वर्सा आमी 93वो वायूसेना दीस मनयतात. भारतीय वायूसेनेचें म्हत्व लोकांक कळचें आनी लोकां मदीं लोकजागृताय जावची हे खातीर हो दीस मनयतात. भारतीय वायूसेना ही भारतीय संरक्षण दळाच्या पांच मुखेल विभागां पैकीं एक आसून तिचेर भारताच्या वायूक्षेत्राचें रक्षण करपाची आनी भारता खातीर हवाई झूज करपाची जापसालदारकी आसा. भारतीय हवाई दळ संवसारांतल्या पांच उत्कृश्ट दळांतले एक मानतात.
8 ऑक्टोबर, 1932 दिसा भारतीय वायूसेनेची स्थापणूक युनायटेड किंगडमाच्या रॉयल अॅरफोर्साची सहाय्यक कंपनी म्हूण केली. भारतीय वायूसेनेन पयलें स्क्वाड्रन तयार केलें आनी 8 ऑक्टोबराक तें मिशन पुराय केलें. उपरांत वायूसेनेन खूबशे पराक्रम केले. थोड्याच काळा भितर भारतीय वायूसेना संवसारांतली सगल्यांत बळिश्ट वायूसेना जाली. तेन्ना सावन 8 ऑक्टोबर हो दीस भारतीय नौसेना दीस म्हूण मनयतात. ह्या दिसा हवाई दळांत योगदान दिवपी दरेक मनशाचो भोवमान करतात. ह्या दिसा भारतीय वायूसेने कडल्यान परेड, अॅर शो सादर करतात. पोरूं वर्सा उत्कृश्ट कामगिरी केल्ल्या झुजाऱ्यांक ह्या दिसा पुरस्कार दितात. तांचो भोवमान करतात. सुब्रोतो मुखर्जी हे भारतीय हवाई दळांतले स्क्वाड्रनाचे पयले मुखेली आशिल्ले. 12 मार्च 1945 दिसा हवाई दळाचें नांव रॉयल इंडियन अॅर फोर्स जालें. सुरवातेक भारतीय हवाई दळा कडेन खूब कमी विमानां आनी साधनसामुग्री आशिल्लीं. 1947 वर्सा विमानांक पिस्टनाचेर चलपी इंजिनां बसयताले. जेट इंजीन आयले उपरांत ताची सुवात गतीन वचपी जेट विमानांनी घेतली.
पलयीं नॅट, हंटर, कॅनबेरा ह्या सारकी ब्रिटीश बनावटीची विमानां वायूसेनेंत वांटेकार करून घेतलीं. ते उपरांत तंत्रज्ञानाच्या बळार ताची सुवात फ्रेंच बनावटीच्या विमानांनी घेतली. भारताच्या विदेशी धोरणाक लागून आनी रशियेन बरें सहकार्य केल्ल्यान घटमूट बनावटीची रशियन झुजारी आनी म्हाल व्हरपी विमानां वांटेकार करून घेतलीं. तशेंच रशियन हेलिकॉप्टर्स वांटेकार करून घेतलें. सद्याच्या काळांत आधुनीक रडार यंत्रणा, क्षेपणास्त्रां, दळणवळण यंत्रणा, नॅटवर्क सेंट्रीक वॉरफेर सी-4 आय ही संगणक प्रणाली वायूसेने कडेन आसात. हवेंतले हवेंत इंधनाची पुरवण करपी विमानां, विमानांतल्यान रडार वापरून पयसुल्ल्या अंतरा वेल्या दुस्मानाच्या विमानांची टेळणी करपी यंत्रणा, कक्षे भायल्या दुस्मानाच्या ठिकाणाचो वेध घेवपी आदीं आर्विल्लीं शस्त्रास्त्रां सेनेंत वांटेकार करून घेतलीं.
आयज भारतीय हवाई दळ संवसारांतलें बळिश्ट हवाई दळ म्हूण समजतात. भारतीय हवाई दळ संवसारांत चौथ्या क्रमांकाचे सामर्थ्यशील हवाई दळ आसा. अमेरिका, रशिया आनी चीन हांचे फाटोफाट भारताचें हवाई दळ सगल्यांत व्हड वायू दळ आसा. भारतीय वायूसेना झूज वा आपत्कालीन परिस्थितींत हवाई मजत पावोवपाची आनी संरक्षण दिवपाची सामकी म्हत्वाची आनी जोखमेची जापसालदारकी पार पाडीत आसता. तेच बराबर हवाई मार्गान जावपाचो आशिल्ल्या हल्ल्यांचो प्रतिकार आनी प्रतिबंध करप, तशेंच ताचे पसून देशाचें आनी देशांतल्या नागरिकांचें संरक्षण करप ही भारतीय वायूसेनेची म्हत्वाची जापसालदारकी आसता.
भारतीय वायूसेनेचे अस्तंत विभागण दक्षीण विभाग, दक्षीण अस्तंत विभाग, पूर्व विभाग आनी मध्य विभाग हे म्हत्वाचे विभाग आसात. वायूसेनेच्या ह्या विभागांक कमांड अशें म्हणटात. भारतीय वायूसेनेचे दरेक विभाग/कमांडांत खूबशीं अॅर स्टेशन्स आसतात जांकां अॅर बसेस अशें म्हणटात. ह्या सगल्या विभागांनी मेळून एकवटीतपणान सुमार एक लाख 70 हजार वायूसेना जवान भारतीय वायूसेनेंत कार्यरत आसात.
भारतीय हवाई दळाची कामगिरी 145 कोटी भारतीयांक अभिमान दिसपी अशी आसा. ज्या ज्या वेळार देशा कडेन दुस्मानान वांकडे नदरेन पळयलें त्या त्या वेळा भारतीय हवाई दळान दोळे दिपकावपी कामगिरी करून दुस्मान राष्ट्राक मातयेभरवण केलां. 1947/48, 1962, 1965, 1971, 1999 वर्सा जाल्लें कारगील झूज, वा हालींच जाल्ली ऑपरेशन सिंदूर मोहीम ह्या सगल्या झुजांनी भारतीय हवाई दळान म्हत्वाची भुमिका वठयल्या. भारतीय हवाई दळ हो भारतीय संरक्षण दळाचो मानबिंदू आसा. भारतीय हवाई दळ दिसा निमतान सगल्यांक शुभेत्सा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
