मूड तुमचो आमचो

भांगरभूंय | प्रतिनिधी

गोंयकारांचो सांजवेळार कसलोय मूड अासूं, पूण गोंयकार सभ्य लोक हें सगल्यांनी मानचेंच पडटलें. मुडी आसत तो पूण तो केन्नाच कोणाचेर आक्रमण करचो ना.

सांजवेळ जाली म्हणजे गोंयचे लोक खंय एका वेगळ्याच मुडांत आसतात अशें केंद्रीय गृह मंत्री सांगतात. म्हणजेच गोंयचे लोक दीसभर एका मुडांत आसतात आनी सांजवेळ जाली म्हणजे तांचो मूड बदलता असो हाचो अर्थ जाता. आतां केंद्रीय गृह मंत्री सांगता म्हणटकूच हें फट कशें आसतलें? गृह मंत्र्या कडेन सगल्या देशांत कसलो मूड आसा हाची माहिती आसुंकूच जाय. नासल्यार गृह मंत्री पदार रावन कसलो फायदो? म्हणटकूच तांकां दिल्ली, गुजरात, बिहार ह्या राज्यांतल्या लोकांच्या मुडा विशींय खबर आसतलीच. सद्याक बिहारचे लोकूय एका वेगळ्याच मुडांत आसात म्हणपाचें आयकूंक येता. नितिशबाबून फाटले वेंचणुके उपरांत बिहारांत दारुबंदी केल्ल्याक थंयच्या लोकांचो मूड सामको गेला म्हणपाचें थंयचे कांय लोक सांगतात. मदीं बिहारी लोकांनी देशी देशी म्हणत विखारी बाटल्यांक हात घालो आनी आपलो जीव व्हगडावनूय बसले. जायते जाण अपंग जावन पडल्यात. गृह मंत्र्यांकडेन हीय माहिती आसतलीच म्हणटकूच थंयच्या लोकांक मूड येवपा खातीर कसलें आश्वासन दिलां आसतलें काय? तातूंत सरकाराक सगल्यांत चड येणावळ खंयच्यान येता तेंय कळ्ळां.
आतां कोणाचो मूड केन्ना आनी कसो बदलत सांगूक जायना. गृह मंत्र्यांक गोंयकारांचो मूड बदलता म्हणपाचें कळटा पूण केजरीवालाचें कितें? ताचो मूड कसो बदल्लो काय? गोंयांत आयलो आनी मूड बदल्लो? पळेयात न्ही ताका. सद्याक तो वेगळ्याच मुडांत आसासो दिसता. इतले दीस विरोधक एकठांय येवन सत्ताधाऱ्यांक हारोवया म्हणपी अकस्मात बदलिल्ले वरी जाला. आतां ताका काँग्रेस आपणाली दुस्मान दिसूंक लागल्या. गोंय भाजपाचे फुडारी म्हणटात, सत्ताविसांत सत्तावीस. केजरीवालाचो मूड पळेल्यार तो चाळीसूय दिवपाची तयारी करता काय दिसता. व्हरात तुमी चाळीसूय म्हणटा सो दिसना. हाचो मूड बदलपाक गोंयूच जापसालदार बी न्हय मूं? शेनवारा गोंयांत पावलो आनी मूड बदल्लो काय? सांगप कठीण. कारण बऱ्या बऱ्या लोकांचो गोंयांत पावतकूच मूड बदलता. तशे मूड बदलचो म्हणुनूच तर पर्यटक गोंयांत येतात. कांय लोक तर गोंयच्या सामके मोगांत पडिल्ले आसतात. दर सप्तकाक विकएंड मनोवंक ते गोंयांत येतात. तशे गोंयांत आप ना हें ताका कोणे तरी सांगूंक जाय. गोंयांत हांव आनी तूं. कळ्ळें मरे? हें ‘रे’ सामकें गरजेचें. ते बगर गोंयकार कळना.
हो जालो गोंयचो मूड पूण गुजरातचें कितें? गुजरातचे लोकूय आपलो मूड बदलपाक दमण वा दीवाक वतात. दर सप्तकाचो शेनवार पळोवपाचो. दीवाचे रस्ते भरिल्ले आसतात. कितें करतले बाबडे, गुजराताक दारुबंदी. एकूय बार म्हणटात तें ना. म्हणटकूच तांचो मूड कसो बदलतलो? हाका कारण गांधी हें सगलेच मानतले. गुजराताक जल्माक आयलो आनी पुराय राज्याक सुकें करून गेलो. ह्या बार्रां नाशिल्ल्या सुक्या राज्यांत सोरो मेळना अशें ना. सगल्यांत चड सोरो हांगाच खपता. गोंयच्यान लेगीत लिपचोरयां सोरो व्हरतात. हालींच कितलो तरी सोरो धरला म्हणपाचें वाचूंक मेळ्ळां. आनी हो सगलो खंय वतालो तर त्या राज्यांत जंय सोऱ्याचेर बंदी आसा. पूण हांच्या मुडा कडेन कोणाचेंच लक्ष आसना. सगले फक्त गोंय आनी गोंयकारांक थोमणायतात.
तशे गुजराती लोक शिवराक. तांच्या शेजरा कोणूय नुस्तें खावपी मनीस तांकां परवडना. शेजाऱ्यान नुस्तें तळ्ळें वा खारें भाजलें तर हांचेर बोवाळ पडलोच. बाबडे नुस्तें खायरे, पयलीं धूप जळयतात आनी उपरांतूच नुस्तें तव्यार उडयतात. पूण हेच गुजराती मूड बदल्लो म्हणजे खंयच्या तरी गाड्यार वा हॉटेलांत वचून तातयांच्यो आमलेटी खातात. गुजरातांत वेगळ्या वेगळ्या तरांच्यो आमलेटी मेळटात आनी त्यो खावपाक गर्दी पडिल्ली आसता. म्हणटकूच कोणाचो मूड केन्ना आनी कसो बदलत सांगूंक जायना.
वेंचणूक लागीं पावली म्हणजे आमच्या राजकारण्यांचोय मूड बदलता. कालमेरेन तांचे नदरेन देशद्रोही आशिल्ले अकस्मात देशभक्त दिसूंक लागतात. जांकां चोर फटींग म्हूण पाचारताले तांकांच ते वेंग मारतना दिसतात. मूड बदल्लो म्हणजे नदरूय बदलता. मतांची गरज आसता म्हणटकूच मूड बदलचोच पडटा.
सद्याक गृह मंत्री देशाच्या ज्या राजधानींत रावतात थंयच्या लोकांचो मूड तांणी केन्ना पळयला तर? दिल्लीक गोंयचेवरी बार्रां नात. आसात तीं रिटेल दुकानां. हीं दुकानां सांजवेळा पांचांक उगडटात. हांगा दीसभर शुकशुकाट आसता पूण सांजवेळ जाता म्हणल्यार लोकांचो मूड वेगळोच जाता. काम धाम सोडून ते दुकाना वटेन धांव मारतात. दुकानां उगडचे पयलींच दारांत लायनी लागिल्ल्यो दिश्टी पडटात. थंयच्या लोकांक अमकोच ब्रँड बी जाय अशें कांय ना. तांकां फक्त सोरो मेळटकूच जालो. ‘इधरसे टक किया, उधर ठक् होना चाहिये’ म्हणजेच घोंट मारतनाच तकलेक चडूंक जाय हें तांचें मत. अकलको ताला लगाता है वही अच्छी दारू है. तकलेक चडटा, मत ना करून उडयता तो सोरो बरो. म्हणटकूच दुकानांत जें कितें मेळटा तें घेवपाचें आनी धोकपाचें. बसूंक बार्रां नात म्हणटकूच गाडयेंत बसपाचें, कागदी वा प्लॅस्टीक ग्लास घेवपाचे आनी पतियाळा पेग भरून तोंडाक लावपाचें. एका घोंटांत ग्लास खालीं. मागीर मस्तकाक मारचें ना तर कितें जातलें? मागीर पळय तांचो मूड तयार जाता, सोसपाचो न्ही. आतांच इश्ट आशिल्ले खिणांत दुस्मान जातात.
गोंयकारांचो सांजवेळार कसलोय मूड अासूं, पूण गोंयकार सभ्य लोक हें सगल्यांनी मानचेंच पडटलें. मुडी आसत तो पूण तो केन्नाच कोणाचेर आक्रमण करचो ना. ताच्या सभावानूच ना तें. पियेवन रस्त्यार पडपी कोण हें सगले जाणात. आतां बेश्टोच एक दुबाव, कोणाचो मूड त्या वेळार बदलूंक लागिल्लो काय? चड सांगूक जाय?

अभयकुमार वेलींगकार
9423884687