भांगरभूंय | प्रतिनिधी
मध्य प्रदेशांत जें घडलें, ताका लागून ह्या वखदा वयलो लोकांचो विस्वास उडला. हाचो परिणाम….
चार पयशे करपाक कोण कितें करीत ताचो नेम ना. युरिया, शांपू मिस्तुराद करून दूद विकपी फातरा काळजाचे मनीस आमच्या देशांत आसात. आतां मध्य प्रदेशांत सिरप दिल्ल्या 16 भुरग्यांक मरण येवपाची घडणूक घडल्या. हाचे पयलींय हे प्रकार जाल्यात. मात, तातूंतल्यान आमी बोध घेवंक ना. ह्या सिरपांत बंदी घाल्ले घटक सांपडल्यात. प्रोपिलीन ग्लायकाॅल आसाच, पूण भितर डायथिलीन, इथेलीन ग्लायकाॅल सारकीं विखारी रसायनांचे अंश मेळ्ळ्यात. धपको दिवपी गजाल. हें चुकून जालां काय मुद्दाम, ताचो तपास करचो पडटलो. सिरपांत 48 टक्क्यां परस चड डायथिलीन आशिल्लें. वखद करतना तें सॉल्व्हंट म्हूण वापरतात. शिफारस मर्यादा 0.1 टक्के. प्रोपिलीन सौंदर्य प्रसाधना, पेंटांनी वापरतात. थंड पेयांत किडनाशकांक वापरतात, असो बोवाळ जाल्लो. गोंयांत नुस्तें ताजें उरचें म्हूण फाॅर्मेलीन वापरतात, अशें म्हणटाले. तसलो हो प्रकार काय आनीक कितें? सिरप चेन्नयचे एके कंपनींत तयार केल्लें. फक्त गुन्यांव दाखल करून वा दोतोराक अटक करून उपकारचें ना. खऱ्या दोशींक सोदचे पडटले. आरोप सिद्ध जाल्यार तांकां गोळाकूच लावचे पडटले. भारतीयांच्या जिवा कडेन खेळपी ह्या भारतीयांची दया- माया करची न्हय. कारण 16 जाणांक मरण आयलां. हो आंकडो वाडपाक शकता.
महाराष्ट्र, राजस्थान, मध्य प्रदेशांत मरणाक जापसालदार थारिल्ल्या कफ सिरपाची विक्री आनी वापराचेर महाराष्ट्रान, गोंयान बंदी घाल्या. खावपाचे जिनस जावं वखदां कंपनी, तांणी उत्पादन करतना सादूर रावंक जाय. कोणूय अतिशाणो, आळशी कामगार, कर्मचारी मुद्दाम वा नकळटां वखदांत रसायनांचें प्रमाणा भायर अंश मिक्स करूं शकतात. कारण बरेच लोक भावनाशुन्य आसतात. जिनसाचो दर्जो, प्रमाण चुकल्यार कोण दुयेंत पडूं शकता, हो विचार तांच्या कट्टुलांत येना. कायलीन माती उडयिल्ले सारकें काम केलें, फक्त पगाराचेर नदर दवरली… मागीर दुसरें कितें जातलें? हें सिरप 1 ते 7 वर्सां पिरायेचीं भुरगीं पियेतात, हाचें तरी तांणी भान दवरपाचें! ह्या सिरपाक लागून किडनी, नर्व्ह, लिवराचेर परिणाम जावं येता, हें तांकां खबर आसपाक जाय.
कसलेंय वखद घेतना दोतोराचो सल्लो जायच. आयली खोंकली काय सिरप घेवपाकूच जाय अशें ना. वखदां घेतना फार्मासींतल्यानूच घेवपाक जाय. तांची एक्स्पायरी तारीख, भितर कितें आसा, तें तपासूंक जाय. लोकप्रीय ब्रॅण्डांचींच वखदां घेवप बरें. वखदांच्या कारखान्यात गुणवत्तेचेर नियंत्रण जाय. तें नासल्यार कसलोय म्हाल भायर वचूं येता. फाॅर्म्युलेशन आॅडीट जाय. प्रयोशशाळेंत तपासणी जाय. पुरवणदारांचीय तपासणी करची. वखदांचे नमुने अदीं मदीं तपासप बरें. चुकीचीं, प्रमाणाक धरून वखदां तयार करिनात, तांचेर कारवाय जाय. प्रत्येक बाटलेचेर क्यूआर कोड आसल्यार तपास करप सोंपें जातलें. वखदांचेर कितें बरयिल्लें आसता, तें वक्ल लावन पसून दिसना. निदान म्हत्वाची म्हायती वाचपाक मेळटली, अशें लेबल नाका? मध्य प्रदेशांतल्या भुरग्यांक दिलीं तसलीं कोल्ड्रीफ कफ सिरप गोंयांतूय आशिल्लीं. हेर कडेनूय आसतलीं. मध्य प्रदेशांत जें घडलें, ताका लागून ह्या वखदा वयलो लोकांचो विस्वास उडला. हाचो परिणाम हेर सिरप कंपनींचेर जावंक शकता.
असल्यो घडणुको टाळप समाजाच्या हातांतूय आसा. हालींच्या तेंपार लोक आॅनलायन वखदां मागोवपाक लागल्यात. दोतोरान सांगिल्लीं वा हाचे आदीं घेतिल्लीं, खात्रीचे कंपनींचीं वखदां मागयल्यार समजूं येता. पूण कोण तरी सांगता आनी लोक बेधडक तीं मागयतात हें धोक्याचें थारूंक शकता. वखदांच्या कंपनींनीय वखदां बाजारपेठेंत हाडचे पयलीं तांची प्रयोगशाळेंत चड बारीकसाणेन चांचणी करूंक जाय. अन्न आनी वखदां प्रशासनानूय दरेके फार्मा कंपनींत वचून वखदांची तपासणी करची. नाजाल्यार मध्य प्रदेश घडणुकेची पुनरावृत्ती जायत रावतली!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
