भांगरभूंय | प्रतिनिधी
मोदी सरकाराच्या काळांत फकत विश्रांती खातीर न्हय तर रोजगार, उदरगत आनी संस्कृतीक दिवप- घेवप करपा खातीर भारताचें पर्यटन मळ एक प्रभावी साधन जालां. मोदी स्वता सांस्कृतीक राजदूत जावन ‘ब्रँड इंडिया’ क जागतीक पांवड्याचेर प्रतिश्ठा मेळोवन दित आसात.
भारताची गिरेस्त संस्कृताय, आध्यात्मिक दायज, सैमीक सोबीतकाय आनी इतिहासीक म्हत्व हाका लागून संवसारभरांतल्या भोंवडेकारां खातीर भारत हें ‘सपनाचे थळ’ जालां. तरीय सध्याच्या मोदी सरकाराच्या काळांतूच ह्या क्षेत्राक अर्थवेवस्थेचो मुखेल चालक आनी उर्जेचो स्रोत म्हूण प्राधान्य मेळ्ळां. प्रधानमंत्री मोदीन गुजराताचे मुख्यमंत्री आसतना लेगीत ही तांक वळखली. भारतांत पर्यटन आतां फकत विश्रांती पुरतें मर्यादीत उरुंकना. आयज तें रोजगार निर्मितीचें साधन, राश्ट्रीय अभिमानाचो स्रोत आनी संवसारीक नकाशांत भारताक म्हत्वाची सुवात मेळोवपी म्हत्वाचो क्षेत्र जालां.
फाटल्या दशकांत भारताच्या येरादारी मुळाव्या साधनसुविधांचो बरोच विस्तार जाला. हायवे, रेल्वे आनी हवाई येरादारीचें जाळें पयसुल्ल्या वाठारांनी पावलां. स्वदेश दर्शन (संकल्पना आदारीत पर्यटन) आनी प्रसाद (तीर्थयात्रा पुनरुज्जीवन आनी आध्यात्मिक संवर्धन मिशन) ह्या येवजण्यांनी ल्हान शारांनी आनी गांवगिऱ्या वाठारांनी रोजगार निर्माण करतना श्रद्धा आनी संस्कृतायेचे पुर्विल्ले मार्ग परतून जिवीत केल्यात. फाटल्या दशकांत बांदिल्लो दरेक म्हामार्ग, विमानतळ आनी तीर्थमार्ग फकत मुळावी बांदावळ न्हय, तर भारताक ताच्या दायजाक जोडपी पूल आसात.
मोदीच्या दृश्टीकोनान अतुल्य भारत 2.0 त नवो जीव घाला, तातूंत अध्यात्म, निरोगीपण, साहस आनी वेवसायीक पर्यटन हांचेर लक्ष केंद्रीत केलां. बौद्ध सर्किट, रामायण सर्किट, वाराणसींतली काशी विश्वनाथ सर्किट आनी गुजरातांतली स्टेच्यू ऑफ युनिटी अशे खाशेले मार्ग हे लाखांनी लोकांक आकर्शीत करपी म्हत्वाचे प्रकल्प आसात. एक फावटीं शोकांतिकेक लागून नश्ट जाल्लो केदारनाथ 2024 वर्सा 16 लाखां वयर यात्रेकरुंक येवकार दिवपाचो आसा, जंय एक दशका आदीं फकत 40 हजार यात्रेकरु भेट दिताले.
महाकाल शार म्हणून परतून जिवीत जाल्ल्या उज्जैन शाराक 2024 वर्सा 7.32 कोटी पर्यटक आयले. काशींत 11 कोटी यात्रेकरुंक येवकार दिलो, जाल्यार बोध गया आनी सारनाथ हांगा 2023 वर्सा 30 लाखां वयर साधकांक आकर्शीत केले.अयोध्यांत राम लल्लाचें उक्तावण जाले उपरांत फकत स म्हयन्यांत 11 कोटी वयर भक्तांनी भेट दिली. संवसारांतलो सगळ्यांत व्हडलो आध्यात्मिक मेळावो महाकुंभ 2025 त 65 कोटी वयर यात्रेकरुंक वांटो घेतलो. केदारनाथाचें पुनरुज्जीवन, काशीचें रुपांतर आनी अयोध्याचो पुनर्जल्म, श्रद्धा आनी मुळावी बांदावळ एकठांय येवन प्रवासाची नवी व्याख्या कशी करूं येता तें दाखयता!
डिजिटल इंडिया आनी स्मार्ट सिटीचेर लक्ष केंद्रीत केल्ल्यान मुळावी बांदावळ आनी सुलभताय आनीक सुदारल्या. आधुनीक विमानतळ, सुदारीत म्हामार्ग, सुदारीत रेल्वे जोडणी आनी अखंड डिजिटल बुकींग पद्दत हाका लागून प्रवास चड सोयीचो आनी विस्वास दवरपा सारको जाला. डिजिटल अॅप्लिकेशनां, बहुभाशी हेल्पलायन आनी निमाण्या मैलां मेरेनची जोडणी हे ल्हान ल्हान बदल दिसूं शकतात, पूण तांणी सगल्यांनी मेळून भारताक संवसारांतलें प्रवासाक अनुकूल अशें थळ केलां. तेच बरोबर व्हिसा नेमांत सदळसाण आनी ई- व्हिसा धोरण वाडयिल्ल्यान विदेशी पर्यटक खूब येवपाक लागल्यात. सरकारान पर्यावरण पर्यटन, निरोगीपण (वेलनेस) पर्यटन आनी साहसी खेळांचो प्रसार केला. ह्या उपक्रमांनी भारतीय पर्यटनाची उदरगत टिकावूपणा वांगडा संतुळीत जाला. दायज सांबाळून मुळावी साधनसुविधा उबारप आनी परंपरेक आधुनिकते कडेन जोडिल्ल्यान पर्यटन मळाचो फुडार चड सक्षम आनी समावेशक जाला.
जी-20 शिखर परिशदे सारकिल्ल्या उच्च दर्ज्याच्या जागतीक कार्यावळी भारतान आयोजीत केल्ल्यान फकत सरबरायूच न्हय तर सांस्कृतीक तीव्रताय दिसून आयल्या.अशा प्रसंगांक लागून चड भोंवडेकारांक उर्बा मेळ्ळ्या. धोरणां भायर वचून मोदीजी भारतीय संस्कृताय आनी थळांक कशी उर्बा दितात हाका एक वैयक्तीक आयाम पसून आसा. फकत भाशणां वरवीं न्हय तर संवसारभर योगाक लोकप्रियता दिवप ते केदारनाथांत उक्त्या पांयांनी चलप ते अंदमान आनी निकोबार जुंव्यांच्या उदकांत बुडपा मेरेन तांणी भारताची संवसाराक परतून वळख करून दिल्या. अशें करतना ते स्वता सांस्कृतीक राजदूत जाल्या, ब्रँड इंडिया फकत बोर्डरूमांत वा धोरणात्मक दस्तावेजांतूंच न्हय, तर वाराणसीच्या घांटांचेर, हिमालयाच्या तेंमकांचेर आनी केरळाचे देगेर आकार घेता, हे कल्पनेक बळगें दिता.
प्रधानमंत्री मोदी फकत पर्यटनाक चालना दिना; ते ताचें मूर्तरूप. सोशल मिडियाचेर भारतीय थळांचें परत परत प्रदर्शन, भाशणांत थळाव्या उत्सवांचो आनी परंपरेचो उल्लेख करप आनी भारतीयांक ‘पयलीं भारताक जाणून घेयात’ अशें तांणी केल्लें आवाहन हाका लागून लोक देशी पर्यटन एका अभिमानान करपाक लागल्यात. अधिकृत भेटी वेळार तांचो भेस, तो नागा शाल आसूं, हिमाचली तोपी आसूं वा तमिळ वेश्टी आसूं, प्रादेशिक अस्मिताय आनी परंपरेचो आदर करता, हें विविधतायेंतल्या एकचाराचें प्रतीक.
एक राश्ट्रीय फुडारी आनी जागतीक राजकारणी म्हूण मोदी भारताची मोवसार शक्त, संस्कृताय आनी अध्यात्म हांचें मोल वळखतात. संयुक्त राश्ट्रां, संवसारीक अर्थीक मंच आनी जी-20 शिखर सभेंत तांणी केल्ल्या भाशणांतल्यान भारताच्या दायजाचेर खूबदां अभिमानान उजवाड घालतात. योग आनी आयुर्वेद हांचे खातीर तांणी केल्ल्या संवसारीक यत्नांक लागून भारत समग्र भलायकेचें केंद्र जालां. आयज देशभरांतल्या रिट्रीटांक भेट दिवपी 120 परस चड राश्ट्रांतल्या साधकांचो आंकडो संवसारभरांतल्या आधुनीक जिणे पद्दतीक कसो आकार दिता हाचो पुरावो! अशे तरेन ताच्या फुडारपणा खाला पर्यटन वेवसाय हो रोजगार, उदरगत आनी संस्कृतीक दायजाचो स्रोत जाला.
भारतीय पर्यटन हें एक बळिश्ट चालक म्हणून उदेला.
भारतांत 2024 वर्सा 294.76 कोटी देशी पर्यटक आयले. ताच्या फाटल्या वर्सा परस ही वाड 17.36% आशिल्ली. जशें जशें हें मळ वाडत वता तसो तसो भारत फकत आपलो भूतकाळ मनयना पूण संवसारीक नकाशांत दरेका प्रदेशाक आपली सुवात मेळटलो असो फुडार तयार करपाक लागला. दर एका राज्याक, शाराक आनी गांवाक आतां आपली काणी सांगपाची संद मेळ्ळ्या आनी मोदीजींच्या फुडारपणा खाला ह्यो कथा संवसारांत पावपाक लागल्यात.
‘ब्रँड इंडिया’ च्या बळग्याचेर विस्वास दवरपी फुडाऱ्या वांगडा भारतीय पर्यटनाचो फुडार घटमूट, वेगवान आनी टिकावू आसा.
(लेखक प्रिझम हे सरबराय कंपनीचे संस्थापक, सीईओ आसात.)
रितेश अग्रवाल
@riteshagar
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
