भांगरभूंय | प्रतिनिधी
एक राष्ट्र एक वेंचणूक कायदो सगल्यांचे मान्यतायेन फुडें गेल्यार मतदार वळेरेचो आयज जाल्लो घुस्पागोंदळ नासतलो अशी आस्त बाळगुया. राष्ट्रीय वेंचणूक आयोगाचे नेमावळींत तेंपा प्रमाण बदल जाल्यात. मतपत्रिका अजूनय कांय राज्यांनी वेंचणुकेंत आसल्यो तरी गोंयां वरी सुपुल्लें राज्य पंचायत ते राज्यसभेची वेंचणूक मतदान यंत्रा वरवीं घेवपाचे तांकीचें जालां. गोंयची लोकसंख्या वाडल्या तेप्रमाण मतदारसंघांची नवी रचणूक जावपाची गरज आसा. दोन ते चार मतदारसंघ विधानसभा आनी एक लोकसभे खातीर जाय. स्थलांतरणातल्यान गोंय लोकसंख्येन व्हड जाता तेन्ना गोंयांत रावपी गोंयां भायले तांच्या राज्यांत मतदानाक वतात? गोंय हीच आपली भूंय तांणी मानून घेतल्या? ह्या प्रस्नांच्यो जापो मेळोवपाची गरज उप्रासल्या. 2027 चे विधानसभा वेंचणुकेचे तयारे पासत ती म्हायती म्हत्वाची. लाखांनी गोंयकारय गोंया भायर देशांत, विदेशांत आसात. ते मतदानाक गोंयांत येतात, तांचीं मतदार वळेरेंत नांवांय आसात. एक राष्ट्र एक वेंचणूक कायद्या खाला जी यंत्रणा जातली तातूंत देशा भायर, राज्या भायर आशिल्ल्यांक मतदान करपा पासत खासा तजवीज जावची.
2027 त गोंय विधानसभा वेंचणुकेंतल्यान 33 टक्के अस्तुरेक विधानसभेर धाडपाची गरज आसा. गोंयांत लागीं लागीं 50 टक्के स्त्रीशक्ती मतदार आसा तशेंच उंचेल्या शिक्षणांत गोंय बरेंच मुखार पावलां. तेखातीर 33 टक्के अस्तुरेक विधानसभेर 2027 धाडपी गोंय हें पयलें राज्य जावप शक्य आसा.
अस्तुरेक राजकी नदरेन निर्णयक्षम करपाच्यो कार्यावळी तेआदीं जावच्यो.
गोंयाक मुक्ती उपरांत पयल्यो अस्तुरी मुख्यमंत्री शशिकलाताई काकोडकार मेळ्ळ्यो. ताई बापायच्यो उत्तराधिकारी म्हणून मुख्यमंत्री जाल्यो, उंचेलें शिक्षण घेतिल्ल्यान निर्णय घेवपाची तांक तांकां आशिल्ली. आपलें वेगळेंपण राखपाक त्यो जैतवंत जाल्यो, सरकारांत कमी तेंप आशिल्ल्यो तरी तांचे कर्तृब आयजय यादींत आसा. तांच्या आदर्शांतल्यान गोंयची अस्तुरी उंचेल्या शिक्षणा इतलीच स्वंयपूर्णा, स्वयंसिद्धाय जाल्या. ताईंच्या तेंपार नासत पूण आयज राजकारणांत पिराय, शिक्षण, अर्थीक बळग्याक, तळागाळांतल्या वावराक म्हत्व आसा. पंचायत, नगरपालिका, जिल्हो पांवड्यार गोंयची अस्तुरी 33 टक्के राखीवतेंतल्यान वेंचणुकेंत उणी पडूंक ना. सुरवेक घरकाराच्या बळग्यार पंच, सरपंच, नगरसेविका अस्तुरी थळाव्या स्वराज यंत्रणाचो वेव्हार पळयताली. तिका उणाक लेखपाचेय दीस आयज सोंपल्यात, तिचो निर्णय आयज ती घेवंक शकता, एकली भोंवता. लोकसभा, विधानसभा, राज्यसभेंत 33 टक्के अस्तुरी राखीवता विधेयक मान्य केलां, राष्ट्रपतींनी त्या विधेयकाचेर म्होर मारल्या. सगले राजकी पक्ष इत्साशक्त आसल्यार 2027 सावन लोकसभा, राज्यसभा, विधानसभेर 33 टक्के अस्तुरेक धाडटले अशें दिसता. 33 टक्के राखीवता अस्तुरेक दिवपा खातीर अस्तुरी आयोग, अस्तुरी शक्तीक गरज पडल्यार चेपण हाडचें पडटलें.कार्यान व्हड अस्तुरेक आपसां मदीं कबलात करून 33 टक्क्यां खातीर राजकी पक्षांनी एकवटान वेंचून हाडपाक जाय.
देशाच्यो आदल्यो प्रधानमंत्री इंदिरा गांधी हांचे उपरांत देशाक अस्तुरी प्रधानमंत्री मेळूंक नाशिल्ल्यान इंदिरा इज इंडिया अशें म्हणपी, मानपी आयजय आसात. खरेपणी पळयल्यार इंदिराजींची इंडिया आमचो भारत देश आयज उरूंक ना. इंदिराजी इतल्याच तांकीच्यो राजकारणीच न्हय हेर मळांनीय अस्तुरी देशांत आसात. महासत्ता जावपाचे वाटेर आशिल्ल्या भारतांतली अस्तुरीय देशाच्या दर एका जैतांत वांटेकार आसा. राजकारणा पसून अस्तुरी पयस रावली ती दादल्यां आड वेंचणुकेंत झुजतना भुजांबळ, अर्थकारणांत उणी पडटा म्हणून. कालचे दीस आयज उरूंक ना, लोकसभेर, राज्यसभेर, विधानसभेर पाविल्ले अस्तुरेन आपूण बरो वावर करुंक शकता हें दाखोवन दिलां. कांय वेळार ती जांचांतल्यान भ्रश्टाचार, गैरवेव्हारांत घुस्पल्या, बंदखणींत पावल्या. बंदखणींतल्यान भायर येवन जे तांकीन दादले वेंचणुकेंत देंवतात तेचवरी अस्तुरीय देंवता. राजकारणांतले बरें वायट तिका कळ्ळां तें शिक्षणांतल्यान. राजकी वारें तिचे वटेन व्हावंतलें तेन्ना तिकाय राजकारणांत सिद्ध करून दाखोवचें पडटलें. गोंयचे अस्तुरेक ती संद 2027 त मेळटली अशी आस्त दवरुया.
गोंय प्रदेश काँग्रेसीक कालच्या अस्तुरी अध्यक्षांनी जैत मेळोवन दिलें. आयज जेन्ना प्रदेश काँग्रेस अध्यक्ष बदलतलो अशो खबरो येतात तेन्ना एकेय अस्तुरेचें नांव प्रदेश अध्यक्षपदा पासत कित्याक ना? ते तांकीची अस्तुरी गोंयांत प्रदेश काँग्रेसी कडेन ना? पयशांनी गिरेस्त नाशिल्ले उंचेलें शिक्षण घेतिल्ले गोंयचे अस्तुरेक देश पांवड्या वयले काँग्रेसमन अध्यक्षपदा खातीर कित्याक तेंको दिवंक शकना? 33 टक्के अस्तुरी आरक्षण 2027 त गोंय विधानसभा वेंचणुकेंत चालीक लागचें हेखातीर काँग्रेसचो अस्तुरी फांटोच न्हय राज्यांतलो मुखेल विरोधी पक्ष म्हणून प्रदेश काँग्रेसीन झुजपाची गरज आसा. ती तांक आदल्या काँग्रेस प्रदेशाध्यक्ष, विरोधी पक्ष मुखेल्यां मदीं आशिल्ली. पयल्या राज्य अस्तुरी आयोगाची बांदावळ काँग्रेस सरकाराच्या तेंपार गोंयांत जाल्ली. उपरांत आयोगाची दिका केंद्रीय अस्तुरी आयोगा बराबरीन बदल्ली. आयोग आयज अस्तुरे विशींचे समाजीक प्रस्न व्हड प्रमाणांत सोडोवपाचे यत्न करता.
33 टक्के राखीवतेंतल्यान अस्तुरी गोंय विधानसभा ते संसदे मेरेन पावल्यार अस्तुरे विशींच्या समाजीक प्रस्नांचेर आवाज वाडटलो. देशाच्या अर्थकारणाक बळगें मेळ्ळां, थिराय मेळ्ळ्या ती भारताच्यो अर्थ मंत्री निर्मला सितारमण हांच्या निर्णयांतल्यान, उंचेलें शिक्षण तांकां उपेगी थारलें. देशाच्यो फुडारांतल्यो प्रधानमंत्री त्यो कित्याक जावच्यो न्हय? राखीवते बगर त्यो वेंचून आयल्यो, भारताक महासत्ते कडेन व्हरपाक तांचें अर्थकारणांतलें गिन्यान जापसालदार आसा. देशांतल्याच न्हय विदेशांतल्या बदलां कडेन पळोवपाची नदर तांचे कडेन आशिल्ल्यान भारताचें अर्थकारण बळिश्ट करुंक त्यो शकल्यो. गिरायक केन्ना भायर सरता, कितें घेता तें तिचे बगर चड कोणाक खबर आसतलें?
तिचे विणे हो संवसार ना, ती देवता, तीच नारायणी, तीच लक्ष्मी, तीच सरस्वती. तिका सत्तेर 33 टक्क्यांनी विधानसभा, राज्यसभा, लोकसभा मतदार जेन्ना पावयतले तेन्ना मतदारांक ती मोलादीक दिसतली. भारताक महासत्ता जालो हें सांगपाचो अधिकार तिका मेळपाक जाय.
देशाच्यो अर्थ मंत्री राखीवतेंतल्यान संसदेंत पाविल्ल्यो अर्थ मंत्री न्हय. तांकांय झुजचें पडलां, पक्षा पासत वावुरले उपरांत कर्तृब सिद्ध करुन दाखोवनच त्यो अर्थ मंत्री पदा मेरेन पावल्यो. अर्थ मंत्र्यां कडल्यान अस्तुरेचें राजकी सक्षमीकरण संसदेंत पावपा पासत शिकचें पडटलें. तीच तर 33 टक्क्यांनी विधानसभा, राज्यसभा, लोकसभेची वाट.
33 टक्क्यांचे राखीवते पासत उतरांनी झगडपी, अस्तुरेचो एकवट घडोवन हाडपी, अस्तुरेक अर्थीक बळगें मेळचें म्हणून तिका भायर काडपी क्रांतीकारी अस्तुरी आयजय आमचे मदीं आसा. तांकां खोस दिवपाचो, भारत बदलता हें दाखोवपाचो मार्ग 33 टक्के राखीवता चालीक लावप.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
