भांगरभूंय | प्रतिनिधी
तूं शांतपणान काम करीत राव, आवाज तुज्या येसाक करुंदी- एक सुविचार. कोंकणीच्या मळार पयलीं सावन थोडे निश्ठावंत सेवक आसात. ते पड्ड्या आड रावन काम करतात. तांकां कसलें पद नाका, ना कसलो पुरस्कार. ते मोन्यानी वावुरतात, पूण तांचें काम उलयता. बाबली नायक हे खऱ्या अर्थान कोंकणीचे प्रामाणीक, निसुवार्थी सेवक. तांच्या मरणान कोंकणी चळवळींतलें एक वादळ शांत जालां. कोंकणी सामकार आव्हानां येत रावलीं, आमच्याच भावा- भयणांनी तीं हाडलीं. बाबलीबाबान धिटायेन तीं हड्ड्यार झेलयत कोंकणीमायेक जैताची तेंगशीं दाखयली. काळजांत फक्त मायभाशेचो मोग, निश्ठा, तिची सेवा करपाची तळमळ, दुसरे कांयच ना. स्वता काम करून ओगी रावले नात. हेरांकूय मुखार काडले. एकवटान वावुरल्यार येस मेळटाच, हें तांच्या कार्यांतल्यान दिसलें. तांचे सारक्या जायत्या निर्मळ वावुरप्यांच्या वावराक लागून कोंकणीमायेचो मुकूट मानाच्या पिसांनी सजत गेलो. बाबलीबाबांचो वावर नदरे मुखार दवरून तांचे सारके वावुरपी तयार करपाची आयज (आनी फाल्यांय) गरज आसा. सगल्यांनी मतभेद, मनभेद विसरून निसुवार्थीपणान, एकवटान कोंकणी सर्वांगान फुलोवप, हींच बाबलीबाबाक खरीं आर्गां थारतलीं.
कोंकणी हो तांचो स्वास, ध्यास. आवयभाशेचेर संकश्ट आयलें तेन्ना लढपाक ते सगल्यांत मुखार दिसले. कोंकणी राजभाशे संबंदीचें खाजगी विधेयक सरकारान भायर मारलें, तेन्ना लोकचळवळी बगर पर्याय ना, हें बाबलीबाबाक होलमलें. तांणी (आनी भरत नायक) कोंकणीभाशकांच्या घराघरांनी वचून तांकां जागे केले. आंदोलना खातीर उबे केले. साहित्यकार पुंडलीक नायक हांच्या फुडारपणा खाला कोंकणी प्रजेचो आवाज संघटणा स्थापन जाली. 555 दीस आंदोलन पेटलें तें कोंकणीक राजभाशा करूनच शांत जालें. हो इतिहास नवे पिळगे मेरेन पावपाक जाय. हे चळवळीची कीट पेटयली बाबलीबाबान. सुरवातीक ते राष्ट्रीय स्वयंसेवक संघाचे खांपे वावुरपी. मात कालांतरान ते तातूंतल्यान भायर सरले आनी तांणी सर्वधर्मसमभाव मानपी कोंकणीचे सेवेक ओंपून घेतलें. कोणाक पुस्तकां व्हरून दी, कार्यावळी घडोवन हाड…. साबार कामां तांणी केलीं. तींय बी पदरमोड करून. अर्थांत ह्या वेळार आनिकूय काय निसुवार्थी वावुरपी तांचे वांगडा वावुरताले. भाशा मंडळाची इमारत आयज उबी आसा, ती ह्या वावुरप्यांच्या घामा, कश्टांचे बुन्यादीचेर. बाबलीबाबाचेंय हातूंत योगदान आसा.
कोंकणीची राखण करपांत ते सदांच एका पांयांर तयार. कोंकणीक हिणसावपाचे प्रकार जाले, गोंय शेजारच्या राज्यांत विरघळावन उडोवपाचो यत्न जालो, कोंकणीक भाशा म्हूण दर्जो दिवपाक विरोध, माध्यम प्रस्न… म्हालगड्यांनी ज्या- ज्या वेळार क्रांतीची ज्योत पेटयली, तेन्ना- तेन्ना ती धगधगती मशाल उंच उबारपाक बाबलीबाब मुखार आशिल्ले. सगल्याच चळवळींनी तांचो चानयेचो वांटो आसा. तांचे लागींचे सोडल्यार कोणाक हें खबर आसचें ना. बाबलीबाब प्रसिद्धी पसून पयस. पुरस्काराक ते सदांच न्हयकार दिताले. आपले विचार, तत्वां घेवन शांतपणान काम करीत रावपी बाबलीबाब संन्याशी वृत्तीचे. काळखे रातीं मंद पेटपी पणटे भशेन. तांचें वाचन अफाट. धर्मीक ग्रंथ, आपजीण… तांच्या उलोवपांतल्यान तांची प्रगल्भ विचारसरणी, गिन्यान झळकतालें. ताका सोब सारकें तांचे चारित्र्य. दानी वृत्ती, नमळायेन उलोवप. कोंकणीचे बाबतींत मात ते संवेदनशील जाताले. कशेंच मारतें घेनाशिल्ले. मुखार आयिल्ल्या कोंकणी विरोधकाक कोंकणीची बाजू पटोवन दिले बगर ते शांत जायनाशिल्ले.
सुनापरान्त दिसाळें सुरू जालें तेन्ना स. चंद्रकांत केणी हांणी तांकां शुद्धलेखन, व्याकरण तपासपाचें काम दिलें. जिद्द, मेहनतीन प्रुफ रिडर ते संपादक पदार पावपी ते घडये पयलेच पत्रकार आसतले. सुनापरान्त हो बाबलीबाबाचो जीव की प्राण. सत्व आनी तत्व सांबाळपी हो ‘कोंकणीबाब’ आयज अनंताच्या प्रवासाक गेला. भांगरभूंय परिवारा वतीन तांकां नमळायेचीं आर्गां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
