भांगरभूंय | प्रतिनिधी
22 शौर्य पुरस्कार जैतिवंतांचो भोवमान
पणजी: भारतीय सैन्य संवसारांतलो सर्वोच्च दर्जो राखत आसा अशें सांगून राज्यपाल पीएस श्रीधरन पिल्लई हांणी सशस्त्र दळांच्या शौर्याची तोखणाय केली. तांच्या शौर्याचें कृत्य तरणाटे पिळगेक सदांच प्रेरणादायी थारतलें आनी आमच्या तरणाट्यां मदीं देशभक्तीची भावना प्रज्वलीत करतली अशें तांणी म्हणलें.
गोंयचे राज्यपाल पीएस श्रीधर पिल्लई राजभवना वयल्या दरबार सभाघरांत आझादी का अमृत महोत्सवा निमतान गोंय नौदळा वतीन आयोजीत कार्यावळींत गोंयांत रावपी भारतीय सशस्त्र दळांतले 22 शौर्य पुरस्कार जैतिवंतांचो भोवमान केले उपरांत उलयताले.
सद्या सुरू आशिल्ल्या आझादी का अमृत महोत्सव सुवाळ्यांत उत्साहान वांटेकार जाल्ले खातीर आनी राष्ट्रीय संकश्ट आनी सैमीक आपत्तींच्या काळांत सशस्त्र दळांनी दिल्ल्या म्हत्वपूर्ण सेवे खातीर तांणी भारतीय सशस्त्र दळाची तोखणाय केली.
आझादी का अमृत महोत्सवा कडेन संबंदीत विवीध कार्यावळींनी समाजाच्या सगल्या पांवड्या वयले आनी दरेक घटकांतले लोक वांटेकार जायत आसात अशें पिल्लई हांणी सांगलें.
पूर्व पाकिस्तानांतल्या 1971च्या बांगलादेश मुक्ती झुजाऱ्यांची याद करून राज्यपालांनी म्हणलें, 13 दिसांच्या ह्या झुजांत मानवतेची सेवा करीत भारतीय नौदळ, लश्कर आनी हवाई दळ एकवटान झुजले आनी पाकिस्तानाच्या सशस्त्र दळांक शरणागती पत्करूंक लायली. शिमे पलडतचो आतंकवाद आनी बंडखोरी मोडून काडपाक सशस्त्र दळ म्हत्वाची भुमिका वठयता अशेंय तांणी म्हणलें.
ह्या वेळार माचयेर गोंय क्षेत्राचे ध्वजाधिकारी अॅडमिरल विक्रम मेनन, स्टेशन कमांडर (लश्कर) ब्रिगेडियर एएस साहनी, आनी हेर मानेस्त तशेंच 100 परस चड एनसीसी छात्रांच्या हाजिरेन ही कार्यावळ रंगली. राज्यपालांनी पुरस्कार जैतिवंतां कडेन संवाद सादलो, आनी राष्ट्रसेवा करपाची प्रतिज्ञा घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
