हिंदी- जपानी भाई भाई?

भांगरभूंय | प्रतिनिधी

स्मार्ट फॅक्टरी, रोबोटिक्सा खातीर एआय तंत्रज्ञान हाडटले. म्हणटकच उत्पादन तांक वाडटली.

चडश्या भारतीयांक अस्तंतेचें आकर्शण आसा. उदेंते विशीं म्हायती सोडात, पूण थंयच्या देशांचीं नांवांय खबर नात. अर्थांत प्रसिद्धी हें एक ताचे फाटलें कारण. पश्चिमी राष्ट्रां वेगवेगळ्या मार्गांनी जितली प्रसिद्धी करतात, तितली उदेंतेचीं राष्ट्रां करीनात. तातूंत इंग्लिशीची पयलीं सावन संवकळ आशिल्ल्यान इंग्लंड, अमेरिका आमकां प्रिय. चीन, जपान, कोरिया, मलेशिया आनी हेर राष्ट्रांची आमकां सादारण वळख आसा. कालूच भारत- जपाना मजगतीं मनीसबळा विशींचे कबलातीचेर निशाणी जाली. पांच वर्सांत दोनूय वटांनी पांच लाख विद्यार्थी, अधिकाऱ्याचें दिवप- घेवप जातलें. 50 हजार कुशळ कामगारांकूय जपानाक वचपाक मेळटलें. अमेरिकेन भारताचेर 50 टक्के शुल्क लागू केलां. ताचो भारताक धपको बसतलो. म्हणटकच भारतान चीन, जपान, कोरिया कडेन इश्टागतीचे संबंद (अर्थांत शिटूक रावन) वाडोवपाक जाय. चीनाची भारता आड आशिल्ली दुस्मानकाय इल्ली- इल्ली उणी जायत आसा. आतां जपान लागीं आयला.
भारतीयांनी इंग्लीश शिकचीच, पूण चीनाचे मंदारिन भाशेकूय प्राधान्य दिवचें, अशें 25 वर्सां पयलीं आंतरराष्ट्रीय पांवड्याचेर जायते जाण म्हणटाले. कारण चीन वयर सरता, म्हणटकच थंय चडांत चड नोकऱ्यो तयार जातल्यो, अशेंय सांगताले. चीनाची लोकसंख्या चड आसली तरी हेर देशांतल्यान थंय नोकरी, वेवसाया खातीर वचपी लाखांनी लोक आसात. पूण, ते खातीर पयली गजाल जाय ती म्हणल्यार थंयची भाशा शिकपाची.
जपाना वांगडचे कबलातींत भाशेचेरुय विचार जाला. कुशळटाय मळाक लागतलें तें जपानी भाशेंतलें शिक्षण भारतांत मेळपाक जाय. सरकारी आनी खाजगी मळाच्या पालवान हें शक्य आसा. हे कबलातींत जपानी भाशा प्रशिक्षण दिवपी देशी- विदेशी संस्थांक, शिक्षकांक पुराय सहकार्य दिलां. एआय ह्या एकाच विभागांत व्हडली संद आसा. ताचोय कबलातींत आस्पाव आसा.
जपान फुडल्या पांच वर्सांत भारतांत 68 अब्ज डाॅलर गुंतवणूक करतलो. अर्थीक सुरक्षा, बुलेट ट्रेन, अंतराळ, नितळ शाश्वत उर्जा, तंत्रज्ञान, सायबर सुरक्षा, दर्या राखण, संरक्षण मळाचेरुय दोनूय देश एकमेकांक पालव दितले. उर्जे खातीर जपान भारताक 35 हजार कोटींचें रीण दितलो. खास करून इथेनाॅल इंधनाच्या मळा वयल्या संशोधना खातीर.
हे कबलातीक लागून भारतीय तरणाट्यांक जपानांत शिक्षण घेवपाक आनी कंपनींनी काम करपाक मेळटलें. जपान हो तंत्रज्ञानांत मुखार आसा, हें कोणें सांगपाक नाका. हाचो फायदो भारताक जातलो. दर्या सुरक्षेकूय बऱ्याक पडटलें. संवसारीक राजकारण बदलता तशें सगलेंच बदलता. अमेरिकेन चड ताणून धरिल्ल्यान जपान आनी चीन लागीं आयल्यात. आशियाई खंडांतल्या सगल्या मुखेल देशांची एक शक्त एकवटपाचो यत्न चल्ला. अमेरिकेच्या सगल्या विरोधी देशांक एकठांय हाडपाचेय गुपीत यत्न चालू आसात. तेन्ना कांय तेंपान वेगळेंच चित्र दिसू येता.
एआय मनशाक धपको दितलें काय ना, ताचेर सध्या भासाभास चल्ल्या. मात तें सगल्यांकूच स्विकारचें पडटलें. जपानी कंपनी आनी भारतीय संशोधन संस्था, स्टार्ट अप्सां मदीं संशोधन प्रकल्प सुरू जातले. स्मार्ट फॅक्टरी, रोबोटिक्सा खातीर एआय तंत्रज्ञान हाडटले. म्हणटकच उत्पादन तांक वाडटली. मात हाचो रोजगाराचेर परिणाम जावचो ना, हेंवूय पळोवचें पडटलें. भलायकी मळाचेर वखदां उत्पादना खातीर एआय फायदेशीर थारूं येता. ‘डिजीटल इंडिया’कूय फायदो जातलो. मात एआय खातीर जपानी भाशा शिकची पडटली. कारण आमचे सारकी थंय इंग्लिशीची दादागिरी ना. मनोरंजन मळाचेरुय जपानीच न्हय, तर उदेंते कडल्या हेर देशांचेंय सहकार्य घेवंक जाय. कारण बऱ्याच देशांत बौद्ध संस्कृताय आसा. ती आमकां लागींची. थंयचे लोक भारतात मानतातूय बी. निदान संगीत, नाट्य, कृशी, तंत्रज्ञान चॅनलांक भारतांत वाव मेळचो. भारत- जपाना मदली ही कबलात बेगीन प्रत्यक्षांत येवं!