भांगरभूंय | प्रतिनिधी
भ्रश्टाचार करप्याक साथ दिवप म्हणल्यार गुन्यांवाक उर्बा दिवप… जेन्ना नागरीक प्रामाणीक आसतात, तेन्नाच राष्ट्र बळिश्ट जाता… लांच दिवं नाकात, देशाचो मान वाडयात… जायत्या म्हालगड्यांनी हें उलोवन, बरोवन दवरलां. तशे खरेंच कोण वागतात, जाल्यार तें अजाप म्हणचें पडटलें. कारण आयज कसलेंय काम करपाचें आसल्यार उतर घालचेंच पडटा, दुडू वा आनीक कितें दिवचेंच पडटा खंय!! गुणवत्ता, हुशारेक मान मेळटलोच, हाची खात्री दिवंक मेळची ना. भ्रश्टाचार समाजाच्या शिरंतरांनी घोळपाक लागला, अशें म्हणल्यार तें चुकचें ना. भ्रश्टाचार चड खंय जाता, तर तो सरकारी यंत्रणेंत. सगलेच सांगतात. म्हणटकच तें बंडल, अशें म्हणपाक मेळचें ना. सगलेच कशे फट उलयतले?
फाटल्या 40 म्हयन्यांत 107 पुलिसांक निलंबीत केल्यात. तातूंतल्या 12 जाणांक सेवेंतल्यान. 80 जाणांक विभागीय चवकशी जातकच सेवेंत परत घेतल्यात. पोरूं बार्देशांत एका कुटुंबाक घरांतल्यान भायर काडपाचो प्रकार गाजिल्लो. मागीर कारवाय जाल्ली. हातूंत एक वरिश्ठ पुलीस अधिकारी आशिल्लो. ताची बदली जाल्ली. सध्या 15 पुलीस निलंबीत जाल्यात. एप्रील 2022 ते जुलय 2025 ह्या काळांत हीं सगलीं निलंबनां जाल्यांत. लांच घेवपाचे आरोप तर सदचेच, पूण पबांत बायलेच्या अब्रूक धक्को लावपा सारके प्रकार घडल्यात. पर्यटकां वांगडा वाद, खंडणी, गैरवर्तन, अवेवसायीक वागप, शिस्तभंग… जायत्या कारणांक लागून ही कारवाय जाल्या. पांच वर्सांत पुलिसां आड 119 कागाळी आयिल्ल्यो. 51 चो निकाल लागलो. 68 प्रकरणांचो अजून तपास चलता. आतां हाचेर गोंय पुलिसांनी वेवसायिकताय आनी जनसंपर्क सुदारपाक पावलां उखल्ल्यांत. बरी गजाल. पूण मनशाचो सभाव बदलप तशें कठीण. जल्माची बुद्द शिकून पसून जायते जाण परत त्याच मार्गाचेर गेल्यात. हांगा एका न्हय, सगल्याच धर्मांच्या देवांक फटोवपी लोक आसात, थंय तांकां वांगडच्या मनशांचो भंय दिसतलो, अशी आस्त बाळगप पिशेंपण!
जांच्या हातांत अधिकार आसतात. तांचो ते वैयक्तीक फायद्या खातीर वापर करतात. फटाफट दुडू, गिरेस्तकाय मेळोवपाची हाव जायत्या वसवश्यांक आसता. वाडटी म्हारगाय, समाजांतली सर्त, चंगळवाद अशे मानसिकतायेक लागून खर्च वाडटा आनी चुकीच्या मार्गाचेर नकळटां पावलां पडपाक लागतात. वयल्या अधिकाऱ्यांक, फुडाऱ्यांक ‘पावयलें’ काय ते सांबाळून घेतले, अशेंय थोड्यांक दिसता. ‘सगलेच करतात’, ही भावनाय समाजांत चरतें कशी पातळ्ळ्या. कागाळ आयली काय रोखडीच चवकशी जावंक जाय. दोशी सिद्ध जाल्यार फक्त बडतर्फी उपकारना, तर मालमत्ता जप्तीचीय कारवाय गरजेची. राजकी चेंपण येवचें ना, असो चवकशी आयोग स्थापन जाल्यार बरो. बाॅडी कॅमेरे, स्टेशनांत सीसीटिव्ही कॅमेरे आसप गरजेचे.
गोंयांत कांय जाण काम, धंदो करीनासतना अचकीत कोट्यांनी रुपयांची उलाढाल करतात. दुबाव आसा, तांची मालमत्ता, बँक बॅलन्स, जिणेशैली हांचें स्वतंत्र आॅडिट कित्याक जावचें न्हय? पुलीस वा हेर सरकारी अधिकारी चुकीचो वागता जाल्यार ताचेर समाजानूय लक्ष दवरचें. तांचे आड कागाळ करपाक आॅनलायन सुविधा आसची. खास करून पुलीस म्हणटकच सगलेच उलोवपाक भियेतात. बरे पुलीस अधिकारी, कर्मचारी आसात. तांची वळख समाजाक करून दिवप सरकारी यंत्रणेची जापसालदारकी. तांकां बडटी, पुरस्कार दिवन तें करूं येता. आयज नैतिक, संस्कारक्षम शिक्षण ही सगल्यांची गरज. प्रामाणीकपणां कितलीं म्हत्वाचीं तेंय पुलिसां सामकार येवपाक जाय. सगल्यांत म्हत्वाचें, राजकी हस्तक्षेप सोंपोवप. कांय गुन्यांवकारांचे बाबतीत राजकी फुडारी संवेदनशील आसतात. ते तांच्या मतदारसंघातले वा तांचे वावुरपी आसतात. म्हणटकच गुन्यांवाची घडणूक घडटकच पत्रकार पावचे पयलीं लोकप्रतिनिधीचो फोन पुलिसांक वता आनी प्रकरण चेंपता. पुलिसांचेर चेपण आसता, तें उणें जाल्यार सगलें जाग्यार पडटलें. दुबाव ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
