कृती चड म्हत्वाची

भांगरभूंय | प्रतिनिधी

झगडपाक तुमी, खावपाक हांव अशी एक म्हण आसा. कितेंय घडलें काय, हें करपाक जाय, तें करपाक जाय, अश्यो सुचोवण्यो करपी, टिका, उपदेश करपी जायते जाण आसतात. सोशल मिडिया संवसार धवळटना हे बुदवंत पोस्टा पोस्टार आपटतात. हालींचो बेवारशी सुण्यांचो प्रस्न. ताचे वयल्यान सर्वोच्च न्यायालयाक पसून पांजऱ्यांत उबें करून प्रस्न विचारले. सुचोवण्यो केल्यो. मात, प्रत्यक्ष कृती करपी खूब थोडे. राज्य, देशाची परिस्थिती कशी इबाडल्या हें सांगपी मतदान करीनात, तसलोच हो प्रकार. प्रार्थना करपाक जोडपी हातां परस मजत करपी हात चड म्हत्वाचे. साबार प्रस्नांचेर भासाभास करपाक रुमडामळ- दवर्ले ग्रामसभा जाली. तीन म्हयने जाले प्रशासक ही पंचायत चलयता म्हूण जायत घडये सभेक णवां मदली फक्त एक पंच हाजीर रावली. गांवकार तरी कितले? आठां वयर नात. म्हत्वाचे ग्रामसभेक कोणेच हाजीर रावप ना, हाका कितें म्हणपाचें? वेंचणुकेक उबो राविल्लो उमेदवार हारतकच पांच वर्सां गायब जाता तशेंच हें जालें ना? ग्रामसभांनी उलोवपी लोक जाय पडटात. नशीब हाजीर आशिल्ल्यांनी प्रस्न मांडले.
गांवांतल्यो समस्या मांडपाक, ताचेर उपाय काडपाक ग्रामसभा जातात तेन्ना गांवांतल्या 18 वर्सां वयल्या सगल्यांनी हाजीर रावपाक जाय. तो तांचो हक्क. नाजाल्यार गांवांत अशें जाता, तशें जाता, म्हणपाचो तांकां अधिकार ना. सोशल मिडियाचेरुय समस्या, प्रस्न मांडू येतात. पूण राजकी फुडाऱ्यांक वायट दिसतलें, फाल्यां फावोर लावपाक वा हेर कसल्याय कामाक तांच्या पांयां कडेनूच वचपाक जाय, कोणाक जाय तीं वायटपणां… असलो सुवार्थी विचार भोवतेक लोक करतात आनी मनांत आसून पसून उलयनात, बरयनात. हें काम करपीय मेजकेच, तेच- तेच लोक. विरोधा खातीर विरोध नासचो, पूण कोण खंय चूक, अन्याय करता जाल्यार ताचेर बडी मारप हो संविधानीक हक्क.
रुमडामळ- दवर्ली पंचायतीन सुण्यांचें निर्बिजीकरण करपाचो निर्णय घेतला. आकें- बायश पंचायतीन ते विशीं एके एजन्सी कडेन कबलात करपाची प्रक्रिया सुरू केल्या. सुण्यांचें निर्बिजकरण वेगान जायना, तांकां लागून रातच्या वेळार अपघात जावं येतात, ते भोंकिल्ल्यान जाण्ट्यांक त्रास जातात, ल्हान भुरग्यांचेर तीं हल्लो करूं शकतात, तांकां अन्न घालपाक थारावीक जागे जाय, हाचेर विचार करपाची जापसालदारकी सगल्या स्वराज्य संस्थांची आशिल्ली. सुणेंमोगी, संस्थां कडेन उलोवन तांणी उपाय काडपाक जाय आशिल्लो. प्रत्येक पंचायतीन, पालिकेन मनार घेतल्यार सगले प्रस्न सुटावे जावपाचे. अर्थांत सरकाराचीय मजत जायच. न्यायालयान आवाज काडूंक नाशिल्लो जाल्यार आतां मेरेन जें चलतालें, तशेंच चलत रावपाचें काय? हेडग्या गोरवांचोय प्रस्न आसा. तोय सोडोवंक जाय. काय हाचेरुय न्यायालयूच आदेश दितलें हाची वाट पळयतात?
राय ग्रामसभेंत पंचायत वाठारांत रावपी बिगर गोंयकारांचें सर्वेक्षण करपाचो थाराव मंजूर जाला. कोण कसलें काम करतात, कोणाचो गांवाक उपद्रव जाता, तेंय पळोवपाक जाय. पूण बिगर गोंयकार म्हणल्यार कामगार वर्ग काय हेरांचेंय सर्वेक्षण जातलें? उपरांत कितें? प्रस्न हाताळटना, समस्या सोडयतना समाजीक संघर्श मात जावचो ना, हाची जतनाय घेवची पडटली. हें सर्वेक्षण करतना गांवांत कितले तरणाटे बेरोजगार आसात, कोण जाण्टो एकलो रावता, कोणाक मजतीची, सरकारी येवजण्यांची गरज आसा, ताचीय पळोवणी जावंची. गांवांतली लायट, उदकाची समस्या, रस्त्यांची अवस्था, भलायकेचो प्रस्न. सगलेंच पळोवपाची गरज आसा. रस्त्या कडेचो कोयर, बेकायदेशीर घरां, बांदकामांय आसात. वर्सांचीं वर्सां कांय प्रस्न सुटनासतना तशेच उरल्यात. हाचे मुखार राज्यांत खंयच तें जावचें न्हय. कोणेतरी सांगप आनी मागीरुच जागें जावप हें योग्य काय अयोग्य तें दरेकल्यान थारावचें!!