भांगरभूंय | प्रतिनिधी
लोकांनी प्रधानमंत्र्याक सहकार्य करपाची गरज; फर्मागुडयेर ‘मोदी @ 20’ विशयाचेर परिसंवाद
फोंडें: भारताक विश्वगुरू करपाचो यत्न करतना प्रधानमंत्री नरेंद्र मोदी हांणी ‘मन की बात’ हे कार्यावळींतल्यान देशांतल्या लोकां कडेन संवाद सादलो. स्वच्छ भारत मोहिमे खाला कोयर तशेंच विवीध मळा वयली नितळसाण करपाचो हावेस प्रधानमंत्र्यांनी बाळगिला. फाटल्या आठ वर्सांत प्रधानमंत्री नरेंद्र मोदी हांणी देशांत व्हड बदल घडोवन हाडला अशें मुख्यमंत्री डॉ. प्रमोद सावंत हांणी सांगलें.
फोंडें पीईएस शिक्षण संस्थेच्या फार्मासी म्हाविद्यालय सभाघरांत ‘मोदी @ 20’ पुस्तकाचेर उलोवप आनी परिसंवाद कार्यावळीचें उक्तावण मुख्यमंत्री डॉ. प्रमोद सावंत हांचे हस्तुकीं जालें. ह्या वेळार कृशी मंत्री रवी नायक, प्रदेश भाजप अध्यक्ष सदानंद तानावडे, कार्यावळीचे संयोजक प्रेमानंद म्हांबरो, नरेंद्र सावयकार, गिरीराज वेर्णेंकार, दत्तेश परुळेकार, संस्थेचे सचीव रितेश नायक आनी प्राचार्य विकास पिसुर्लेंकार आनी प्राचार्य एस. एन. मामले देसाय हाजीर आशिल्ले.
प्रधानमंत्री नरेंद्र मोदी हांणी प्रधानमंत्री म्हूण 8 वर्सां जाल्यार गुजरातचे मुख्यमंत्री म्हूण 12 वर्सां येसस्वी रितीन काम केलां. स्वताचो वेगळो ठसो निर्माण केल्ले प्रधानमंत्री नरेंद्र मोदी हांणी कोरोना म्हामारी वेळार अदमाशेक 25 कोटी लोकांच्या बँक खात्यांनी निधी जमा करून व्हड मजत केली. देशाचे उदरगती खातीर लोकांनी प्रधानमंत्री मोदी हांकां सहकार्य करपाची गरज आशिल्ल्याचें मुख्यमंत्री डॉ. प्रमोद सावंत हांणी सांगलें.
लोकां खातीर कार्य करपी प्रधानमंत्री म्हूण नरेंद्र मोदी हांणी संवसारभर नामना मेळयल्या. संवसारांतल्या लोकांचो आदर्श थारिल्ले प्रधानमंत्री मोदी हांचो तरणाट्या वर्गान आदर्श दवरून समाजांत कार्य करपाची गरज आशिल्ल्याचें कृशी मंत्री रवी नायक हांणी सांगलें.
फाटल्या 8 वर्सांत येसस्वी रितीन कार्य करपी मोदी निसुवार्थीपणान लोकांचे उदरगतीक चालना दिली. संवसारभर मान सन्मान प्राप्त जाल्ले प्रधानमंत्री नरेंद्र मोदी हांणी मुख्यमंत्री तशें प्रधानमंत्री म्हूण येसस्वी थारले अशें प्रदेशाध्यक्ष सदानंद तानावडे हांणी सांगलें.
ह्या वेळार आदले खासदार नरेंद्र सावयकार आनी हेर मानेस्तांनी आपले विचार उक्तावन प्रधानमंत्री नरेंद्र मोदी हांकां सहकार्य करपाचें आवाहन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
