सोऱ्याची तस्करी वाडटा

भांगरभूंय | प्रतिनिधी

धरुंक नाशिल्ले कितलेशेच ट्रक, गाडयो आसतल्यो. सरकाराक लुकसाण करपी हे बेकायदेशीर येरादारीचेर चड खरायेन नदर दवरपाचो वेळ आयला.

गुड्डीभर सोरो घेतल्यार पोटांत गुडगुडपाचें थांबता, मात आतां तो अर्थीक नदरेनूय फायदेशीर अशें दिसून आयलां. तो तयार करून भरपूर जोडूंक मेळटाच, पूण लिपचोरयां भायल्या राज्यांनी, देशांनी व्हरून करोडांनी दुडू मेळोवं येतात. हांगाच्यान सदांच सोऱ्याची बेकायदेशीर येरादारी जाता. कांय फावटी शिमेचेर अबकारी कर्मचारी, पुलीस तो धरतात. लोक मात समाधानी नात, ते म्हणटात, धरता ताचे परस तिपेटीन सोऱ्याची तस्करी जाता. भिवकुरे लोक रानांतल्यान बी वचून राज्या भायर सोरो विकतात, पूण थोडे बेधडक गाडयांनी तो घेवन वतात. म्हाखाजन- धारगळे मंगळारा उजो लागिल्ल्या कंटेनरांतल्यान 62 लाखांच्या सोऱ्याची येरादारी जाताली, हें उजवाडाक आयलें. पूण, तो सोरो खंयचो, कोण व्हरतालो, अबकारी खात्याची ताका परवानगी आशिल्ली काय ना, तें तीन दीस जाले तरी कळूंक ना. ताचो बेगोबेग तपास जावप गरजेचें. कारण, सोरो तस्करीक लागून सरकाराक वर्साक सात हजार कोटीं परस चड लुकसाण जाता.
काँग्रेसीन कांय गंभीर आरोप केल्यात. ताचीय चवकशी केल्यार बरी. ह्या कंटेनरांतलो म्हाल पुलिसांनी अबकारी अधिकारी येवचे पयलींच दुसरे कडेन व्हेलो असो दावो काँग्रेसीन केला. असल्यो उण्योच 10 गाडयो गोंयांतल्यान बेकायदेशीर पद्दतीन सोरो व्हरतात. ह्या वेव्हारांत सरकाराची म्हयन्याक 600 कोटीं परस चड येणावळ बुडटा. सोऱ्याचे बाटलेचेर जे कंपनीचें नांव आसा, ती गोंयांत नाच्च अशेंय काँग्रेस म्हणटा. अबकारी खात्याच्या म्हणण्या प्रमाण, त्या नांवाचे कंपनीची गोंयांत नोंदणीच ना. ह्यो सगल्यो बाटल्यो पणजे विकत घेतल्यात खंय. हो सोरो शुद्ध काय भेसळ केल्लो, तेंय सोदचें पडटलें. प्रत्येक डिस्टिलरीच्या, कंपनीच्या येरादारीचेर एक- एक अबकारी निरिक्षक लक्ष दवरता. तरीय हो कंटेनर कसो गेलो? उजो लागूंक नाशिल्लो जाल्यार तो मेळचोच नाशिल्लो. ह्या कंटनेराच्या धनयाची चवकशी केल्यार सत्य कळूं येता. ह्या प्रकरणाची पाळां मुळां सरकाराक खणून काडचींच पडटलीं. दुबावितांक धरचेच पडटले. कारण सरकाराची येणावळ बुडटा. आमी तपास करतले, अशें अबकारी अधिकाऱ्यांनी जाहीर केलां. सध्या सोऱ्याचो सांठो पुलिसां कडेन आसा. तो ताब्यांत घेतकच, तपासाक गती येतली, अशेंय तांचें म्हणणें.
पत्रादेवी चेक नाक्यार पोरूं 2 कोटींचो सोरो जप्त केल्लो. धरतात ते सोऱ्याचे सांठे उणेच पांच लाखांच्या वयर आसतात. मे म्हयन्यांत हरयाणांतल्यान आयिल्लो अडेज कोटींचो सोरो धरिल्लो. तो खुद्द सरकारी यंत्रणेनूच मागयला, असो दावो ट्रक धनयान केल्लो. सध्या हें प्रकरण न्यायालयांत आसतलें. अदीं मदीं गोंयच्या शिमांचेर ट्रक धरतात. कर्नाटक सरकारूय धरता. धरुंक नाशिल्ले कितलेशेच ट्रक, गाडयो आसतल्यो. सरकाराक व्हड लुकसाण करपी हे बेकायदेशीर येरादारीचेर चड खरायेन नदर दवरपाचो वेळ आयला. हो सोरो हांगाच्यान वता म्हणजे तो गोंयांतूच तयार करतात आसतले. काय बोटींतल्यान, रेल्वेंतल्यान बी तो हाडटात? तशें आसल्यार तो तपासणी यंत्रणांक सांपडूंक जाय आशिल्लो. पुलीस, अबकारी खातें हांचेच वांगडा समाजूय ही सोरो तस्करी आडावपाक मजत करपाक शकता. खबऱ्यांचो आंकडो वाडोवन तांकां दर म्हायती फाटल्यान इनाम दिवंक जाय. शिमेर जावपी तपासणी कडक करपाक जाय. थंयचे अधिकारी, कर्मचारी अदीं मदीं बदलपाक जाय. सीसीटीव्ही आसात, जीपीएसा वरवीं गाडयांचेर नदर दवरप जाता? सोऱ्यांच्या बाटल्यांचेर क्यूआर कोड सारकी एखादी ट्रॅकिंग प्रणाली लावप शक्य आसा? ह्या विशयाचेर ग्रामसभांनी चर्चा जावची. सोरो आनी ताची तस्करी कडेन आडनदर जाल्यार फुडाराक ताचें प्रमाण वाडटलें, हें मतींत दवरल्यार बरें. गोंय हें पर्यटन राज्य म्हणटकच हांगा कितेंय केल्यार चलता, अशें कोणाक दिसना मूं?