बंगालांत नवें यूग सुरू

भांगरभूंय | प्रतिनिधी

डॉ. प्रमोद सावंत हांची सुवेंदू अधिकारी हांकां परबीं

डबल इंजीन सरकार वाडयतलें सर्वांगी उदरगतीची गती

अस्तंत बंगालांत जातली मुळाव्या साधन सुविधांची उदरगत

भांगरभूंय । प्रतिनिधी

पणजी : सुवेंदू अधिकारी हांच्या फुडारपणा खाला भाजपा सरकारान अस्तंत बंगालांत नव्या युगाची सुरवात केल्या, अशें मुख्यमंत्री डॉ. प्रमोद सावंत हांणी म्हणलें. अस्तंत बंगालचे मुख्यमंत्री म्हूण सोपूत घेतले उपरांत सुवेंदू अधिकारी आनी हेर मंत्र्यांक मुख्यमंत्री डॉ. सावंत हांणी परबीं दिलीं.

अस्तंत बंगाला खातीर ही नव्या युगाची सुरवात आसा अशें मुख्यमंत्र्यान सांगलें. सुवेंदू अधिकारी हांच्या गतीशील फुडारपणा खाला आनी मानादीक प्रधानमंत्री नरेंद्र मोदी हांच्या मार्गदर्शना खाला आनी आदारान ‘डबल इंजीन सरकार’ राज्यभर समावेशी आनी सर्वांगी उदरगतीची गती वाडयतलें अशें तांणी सांगलें. अस्तंत बंगालांत नवी संद, घटमूट प्रशासन, मुळाव्या साधन सुविधांची उदरगत, वंचितांचें सक्षमीकरण आनी अंत्योदयाचे दिशेन जावपी उदरगत पळोवपाक मेळटली, अशेंय मुख्यमंत्री डॉ. सावंत हांणी सांगलें. तशेंच सुवेंदू अधिकारी हांच्या येसस्वी कार्यकाळा खातीर शुभेत्सा दिल्यो.

सुवेंदू अधिकारी अ. बंगालांत पयलेच खेपे भाजपचो मुख्यमंत्री

खबरां संस्था

कोलताका : सुवेंदू अधिकारी हे अस्तंत बंगालांतले भाजपाचे पयले मुख्यमंत्री जाले. तांणी देवाच्या नांवान बंगाली भाशेंत सोपूत घेतलो. सोपूत घेतले उपरांत, सुवेंदू प्रधानमंत्र्याक वचून पांया पडलो.

सुवेंदू हांचे भायर बंगालचे राज्यपाव आर. एन. रवी हांणी हेर पांच आमदारांक मंत्रीपदाचो सोपूत दिलो. तातूंत दिलीप घोष, अग्निमित्र पॉल, अशोक कीर्तनिया, खुदीराम टुडू आनी निशीत प्रमाणीक हांचो आस्पाव आशिल्लो.

प्रधानमंत्री नरेंद्र मोदी, गृह मंत्री अमीत शाह आनी एनडीए तशेंच भाजप शासीत राज्यांचे 20 मुख्यमंत्री ह्या सोपूत सुवाळ्याक हाजीर राविल्ले. मोदी हांणी माचयेर रवींद्रनाथ टागोर हांचे 165 वे जयंती निमतान तांकां आर्गां ओंपलीं.

ते परांत प्रधानमंत्र्यान माचयेर 98 वर्सां पिरायेचे भाजप कार्यकर्ते माखनलाल सरकार हांचो सत्कार केलो. माचयेर आयले उपरांत प्रधानमंत्री थेट सरकार हांचे कडेन गेले आनी तांकां शाल घातली आनी उपरांत तांच्या पांयांक स्पर्श केलो.