भांगरभूंय | प्रतिनिधी
सैमाचे रुतू चक्र अचूक आनी नेमांचेर आदारिल्लें आसा. रुतूंचो क्रम, तांचो बदल हाचो मनशाच्या जिविताचेर खूब परिणाम जाता. भारतांत परंपरेन स रुतू आसले तरी खास करून तीन रुतू चड स्पश्टपणान अणभवतात ते हिवाळो, गिमाळो, पावसाळो. पूण हालींच्या काळांत हें हंगामी चक्र इबाडलां. हाचें एक मुखेल उदाहरण म्हळ्यार हंगाम नाशिल्ल्या पावसांत नेटान जाल्ली वाड. परंपरीक पावसाच्या हंगामा भायर येवपी पावस म्हळ्यार बीन मोसमी पावस. आदीं विरळ आशिल्लो हो पावस आतां चड वाडत आसा. वारो गडगडा सयत हांचे वांगडा पावस पडटा, आनी हाचो भलायकी, येरादारी आनी सामान्य जिणेचेर गंभीर परणाम जाता. हवामानांत बदल, हरीत घर वायू वाडप, उद्देगीक प्रदुशण, रानां कापप, वाडत वचपी शारीकरण हाचें फाटलीं मोसमा पयलीं पडपी पावसाचीं कांय मुखेल कारणां आसात.
धर्तरेचें वाडत वचपी तापमानाचो परिणाम पावसाचे रुतूचेर जावपाक लागला. दर्यांतले उश्णतायेक लागून हवामानांत अस्थिरताय निर्माण जाता. हाका लागून कांय हंगामांत अपेक्षीत हवामाना परस अनिश्चीत आनी चड पावसाची घडणूक घडटा. बेमोसमी पावसाक लागून गोंयांतली भात शेतांतलीं कणसां कुसतात, आड पडटात. हाका लागून शेतकारांक व्हड अर्थीक लुकसाण जाताच ते भायर शेतां खातीर घेतिल्ल्या रिणांतूय वाड जाता. तेभायर आकांताचो पावस, वारो झाडां हुमटायता, घरांचे पाखें हुबून वतात आनी गडगडांतल्यान वीज पडून जिवी व्हगडावपा सारक्यो दुर्दैवी घडणुको घडटाता. हाचो भलायकेचेरूय वायट परिणाम जाता. तापमानांत उतार-चड जाल्यार थंडी, खोंकली, जोर, मलेरिया, डेंग्यू ह्या सारक्या रोगांचें प्रमाण वाडटा.
शारांनी उदक भरिल्ल्यान येरादारी जाम जाता, रस्ते इबाडटात आनी संपर्कांत व्यत्यय येता. अचकीत येवपी पावसाचो एक परिणाम म्हळ्यार शेतां पिकांचो नाश जाल्ल्यान पुरवण उणी जाता आनी सादारण नागरिकांचेर लेगीत ह्या संकश्टाचो परणाम जाता.
हे समस्येचेर उपाय म्हणून हवामान खात्याचे अचूक अदमास शेतकारां मेरेन वेळार पावप गरजेचें. हवामान अदमासाचे अॅप्लिकेशनां, संदेश, आनी प्रसारणांचो सरकारान चड प्रभावी वापर करचो. तशेंच शेतकारांनी सेंद्रीय शेती, उदकाची जतनाय, जमनीची पिकाळसाण सांबाळप अशे उपाय आपणावचे. तशेंच सरकारान पिकाची विमो येवजण प्रभावीपणान चालीक लावप, बेगीन मजत पावोवप, लुकसाण बेगीन भरपाय करप गरजेचें आसा.
पर्यावरणीय समतोल दवरपा खातीर व्हड प्रमाणांत झाडां रोवप, प्लास्टिकाचो वापर उणो करप, सैमीक संपत्तीचो टिकावू वापर, लोक जागृताय करप गरजेचें आसा. हवामान बदल हो संवसारीक प्रस्न आसलो तरी थळाव्या पांवड्यार सुरवात करूनच ताचेर मात करूं येता. निमाणें सांगपाचें जाल्यार हंगाम नाशिल्लो पावस आनी हंगामी चक्रांत बदल जावप ही सैमा कडल्यान गंभीर शिटकावणी. सैमाचेर अन्याय केल्यार ताचे परिणाम चड खर रुपांत परत येतात. ह्या कारणाक लागून सगल्यांनी पर्यावरणाची जबाबदारपणान राखण करपाची गरज आसा. फुडाराक येवपी धोको टाळपाक जाय जाल्यार आयज आमी पर्यावरणा कडेन सुसंगत जावपाची गरज आसा अशें म्हाका सांगन दिसता.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
