भांगरभूंय | प्रतिनिधी
अामच्या सुपुल्ल्या गोंयांत अपघात हे सदचेच जाल्यात. दिसाक कोण ना कोण तरी मरताच. अपघात जावचे न्हय, म्हूण सरकारी यंत्रणां साबार उपाय चालीक लायता, पूण अपघात बंद जावपाचें नांव घेनात. भौशीक येरादारी जाग्यार पडना, तो मेरेन हें मरणचक्र चालूच उरतलें, अशी भिरांत आतां सगल्यांकूच दिसपाक लागल्या. अक्षरशा दरेका कुटुंबांतलो वा तांचो सोयरो अपघातांत सोंपला वा दिव्यांग जाला. हें फकत त्या कुटुंबाचेंच दुख्ख वा लुकसाण न्हय, तर राज्य, देशाचीय ती व्हडली हानी, हें दरेकल्यान मतींत दवरचें. तरणाट्यांनी जाणकारांचें, घरांतल्या जाण्ट्यांचें आयकूंक जाय, येरादारीचे नेम पाळपाक जाय. कारण अपघात हो चुकून जाता, तुजी चूक नासली तरीय तो जांव येता!!
‘किलर स्टेट’ म्हूण नामना मेळिल्ल्या आमच्या गोंयांत दरवर्सा 250 ते 300 च्या आसपास लोक मरतात. चडशे तरणाटे. दुचाकी चलोवपी. पुलिसांचे आंकडेवारी प्रमाण, फाटल्या एप्रीलांत राज्यांत 26 जाणांक अपघाती मरण आयलें. भितर 17 दुचाकी चलोवपी आसात, तर 93 जाण जखमी जाल्यात. जखमीं मदल्या 17 जाणांक गंभीर दुखापत जाल्या. वट्ट अपघात 198. भितरल्या 116 अपघातांनी कोणाक कांय जावंक ना. फक्त 24 अपघातांनी वयल्या 26 जाणांक मरण आयलां. हे नोंद जाल्ले अपघात. ‘तुमचे मदीं मिटयात, काय पंचनामो करुंया?’ अशी भाशा आयकूंक येवपी अपघात कितले ताचें कोंत आनी हिशोब आसचो ना. एप्रीलांतली आंकडेवारी पळयल्यार दक्षीण गोंयाक अपघातांचो चड फटको बशिल्लो दिसता. सगले कडेन तांचो आंकडो चड आसा. 115 अपघात दक्षीणेंत जाल्यात. 76 नेण्टे भुरगे जखमी जाल्यात, तातूंत 58 दक्षीण गोंयांतले. ह्या अपघातांनी दुचाकींचो चड आस्पाव आसा. अपघातांचो वेळ पळयल्यार ते सांजचे स ते णव मेरेन जाल्यात. मरप्यां मदीं विदेशी पर्यटकाचोय आसपाव आसा…. आनी ही खबर इंग्लंडांतल्या दिसाळ्यांनी छापून आयिल्ल्याचें इंटरनेटार खबरो धवळीत जाल्यार दिसता. ही गजाल सरकारान गंभीरपणान घेवंक जाय. कारण म्हायती तंत्रज्ञानाचो स्फोट जाल्ल्यान आतां बारीक सारीक गजाली संवसाराच्या खाचीं- कोनशांनी पावतात. खास करून पर्यटक हातूंत घुस्पल्ले आसल्यार. तातूंत गोंयांक बदनाम करपी काय शकुनीय आसात. पर्यटनाचेर हाचो परिणाम जावं येता.
फाटल्या चार म्हयन्यांत (एप्रील मेरेन) गोंयांत 981 अपघातांनी 113 जाण सोंपल्यात. ह्याच काळांत पोरूं 982 अपघात जाल्ले आनी 127 जाणांक मरण आयिल्लें. जाणकारांच्या मतान, चडशे अपघात खंय गांवांनी वा शारा भायर जाल्यात! पर्वरी, वेर्ण्यां चड. हालींच्या वर्सांनी गोंयकारांचें भोंवप वाडलां. नोकरी, वेवसाया खातीर वच्चें पडटा, तें समजू येता, पूण हेडपाक, खेळपाक, खावपाक, मनोरंजनाचे कार्यावळींक (इव्हेंट धरून) वचप्यांचो आंकडो खूब वाडला. रातच्या वेळार हेडप, खेळप, पार्टे खातीर तरणाटे दुचाक्यो धोफरायतना दिसतात. भौशीक येरादारी भरंवशाची उरूंक नाशिल्ल्यान लोक स्वताच्यो गाडयो वापरतात. आयची भौशीक येरादारी पळयल्यार (जी रातची आठ उपरांत बंद जाता) कोणूच कोणाक गाडी वापरूं नाका, अशें सांगपाक शकना. पूण तरीय दरेकल्यान नेम पाळून ती चलोवंक जाय. सरकारी यंत्रणांनी रस्ते निटायेर घालपाची, शाॅर्ट कट मार्गाचेर खाजगी, भौशीक येरादारी थंय वळोवपाची गरज आसा. उदका येरादारीय चड सक्रीय करपाक जाय. नेम पाळप, हेल्मेट घालप, बेल्ट लावप ह्यो गजाली आयल्योच. शालेय पांवड्याचेर जागृताय करपाचो निर्णय पुलिसांनी घेतला. जूनांतल्यान तो चालीक लावचो. म्हयन्यांत एकदां!! ब्लॅक स्पाॅट सोदप म्हत्वाचें. वेगान गाडी, दुचाकी चलोवपी आसात, तांचे नदर दवरपाची गरज आसा. सीसीटीव्ही फुटेज नेमान तपासल्यार ते सांपडू येतात.
वाडट्या अपघातांचेर नियंत्रण दवरपाक येरादारी पुलीस आनी येरादारी खात्यान देड वर्सां पयलीं साबार उपाय सुचयिल्ले. ते चालीक लायतले, अशें सरकारान जाहीर केल्लें. स्पीड ब्रेकर, बेरिकेड्स, डिव्हायडर घालीत जाल्यार अपघातांचो आंकडो देंवतलो अशें आयजूय सरकारी यंत्रणांक दिसता. देंवत घडये, पूण गाडयेकारांनी स्वताचेर नियंत्रण दवरल्यार अपघात सहज उणे जातले. सगल्यांत पयलीं येरादारीची कोंयडी ना करपाक जाय. म्हापशें- पणजी मार्गार फाटलीं पांच वर्सां पर्वरे वाठारांत येरादारीची समस्या सोंसची पडटा. घडये उड्डाण पूल जातकच ती ना जावंये. पूण पेडणें, वाळपय, म्हापशेंच्यान येवपी बसींक हो पूल वापरूंक मेळटलो काय ना तें कळना. कारण पर्वरी वाठारांत 5- 6 कडेन देवपी शेंकड्यांनी प्रवासी आसात. म्हणकच तांकां घडये सदच्याच रस्त्यान बस व्हरची पडूं येता. परत सुरु केल्ले म्हजी बस येवजणे वरवीं बसींचो आंकडो वाडपाक जाय, रातच्यो 10 मेरेन तरी पणजेच्यान सगले कडेन वचपी बसी जाय. सरकारी कर्मचाऱ्यां खातीर 2 ते 8 अशी शिफ्ट सुरू केल्यार रस्त्या वयली येरादारी बरीच उणी जातली.
फाटलीं 40 वर्सां आमी शेंकड्यांनी गोंयकार अपघातांनी वगडायल्यात. निदान हाचे मुखार तरी हें घडयें न्हय. खाजगी गाडयांचो वाडटो आंकडो उणो जाल्यार अपघातांचेर नियंत्रण येतलें, मोलादीक जीव वाटावतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
