भांगरभूंय | प्रतिनिधी
पावस तेंकलो. तयारी खंय पावल्या? गटारां नितळ केलीं, न्हंयांतलो चिखल काडलो, घरांच्या पाख्या वयले झाडांचे खांदे कापले, उदक जिरपाक दोंगरांचेर चर खणले, झाडांचे रोपे तयार केले, रस्त्यांचेर डांबर घालें, गटारां, सिवरेजीचीं कामां सोंपलीं…..!! शेतकी, पर्यटन मळांय माॅन्सुना खातीर तयार जावंक जाय! उड्डाण पुलाचें काम पर्वरी वाठारांत चलता, थंयचे सर्व्हिस रोड डांबराची वाट पळयतात. कांय कडेन तें पडलां. मात टांकी ते सकयल खाप्रेश्वराच्या मूळ घुमटे कडलो रस्तो सामको इबाडला, तो पावसांत त्रास करपाक शकता. थंयच जमीन दोन माड खोल खणून इमारत उबी करपाचें काम चलता. तिचे धडेर रस्तो आसा. थंय सुरक्षा वेवस्था जाय. पुराय राज्यांतले रस्ते पावसाच्या दिसांनी धोक्याचे जातात. खास करून ताचे वयलीं फोंडकुलां. रस्त्यार एकूय ‘खड्डो’ दिसचोना, अशी घोशणा कांय वर्सां पयलीं जाल्ली. पूण तशी कृती मात जावंक ना. माॅन्सुनाचीं कामां करीत तितलीं थोडीं.
सरकारी यंत्रणांनी फाटीं बसका घेतिल्ली. नेमकें कितें करपाचें ताचो नियाळूय जाल्लो. ती तयारी खंय पावल्या? कारण पणजेच न्हय, तर मेळत थंय हाॅटमिक्स पद्दतीन डांबरी केल्ले रस्ते फोडपाचें काम अजून चालू आसा. बेगीन विकास जावंक जाय म्हूण नागरीक सगलें सोंसतात. मात, पावस चालू जालो तरी सरकारी कामां सोंपनात आनी ताचे त्रास सामान्य लोकांक जातात. तांकां जीव पसून वगडावचो पडटा. पंचायती आनी पालिकांक आतां नेटान कामाक लागचें पडटलें. कारण फक्त 15 ते 20 दीस उरल्यात. तसो ताचेय पयलीं पावस कोसळपाक शकता. आतांच कुपां दाटून येवपाक लागल्यांत. पावसाच्या दिसांनी सगल्यांत व्हडली समस्या आसता ती झाडां पडपाची. उजो पालोवपी दळा खातीर हे तीन म्हयने चड कश्टाचे. प्रत्येक गांवांतले स्वराज्य संस्थेन माॅन्सून खातीर स्वताचो असो एक सुसज्ज मजत पंगड तयार करपाची गरज आसा, जो उजो पालोवपी दळाक पावसाच्या दिसांनी दुर्घटनां वेळार मजत करतलो! दळाक झाड पडटकच तें शक्यतो बेगीन कुशीक काडपाक मेळटलें, असली अत्याधुनीक यंत्रां, आवतां मेळपाक जाय. वीज कर्मचाऱ्यांक पावशी म्हयन्यांनी रातदीस धांवचें पडटा. तांकांय सगल्यो सुविधा मेळूंक जाय. वीज खात्यान लायटीचे दर वाडयल्यात, म्हणटकच लाखांनी रुपया जमतले. ते ह्या कामगारांक सुविधा दिवपाक आनी वीज यंत्रणा अत्याधुनीक करपाक वापरचे. फाटलीं 25 वर्सां लायटीचे केबल अंडरग्रांवड घालपाचें काम चलता. 2047 मेरेन पुराय राज्याक वीज जमनी पोंदच्यान मेळची!
लोकांच्या घरांचेर झाडां, तांच्यो खांदयो आयल्यात. मात कायदो त्यो कापपाक दिना. पंचायतींत अर्ज व्हरून दिल्यार तो संबंदीत खात्यांची भोंवडी करून येता म्हणसर पावस सोंपून शिंयाचे दीस सुरू जातात. अर्ज व्हरून दितकच आठ दिसां भितर पंचायतीन स्वता फुडाकार घेवन झाड कित्याक कापचें न्हय? कायद्या परस मनशाचो जीव मोलादीक हें आमच्या प्रशासनाक केन्ना कळटलें? झाडां फक्त घरांचेरूय पडनात, तर रस्त्यांचेरूय पडटात. फाटल्या वर्सभराक दुचाकी चलोवपी 2- 3 जाणांक झाडाचो खांदो पडून मरण आयलां, खूब जाण जखमी जाल्यात. पयरूच एक तरणाटो गेलो. स्वराज संस्थांनी आपापल्या वाठारांत भोंवून पडपाक पाविल्ल्या झाडांची पळोवणी करपाचो वेळ आयला. नागरीक तांकां आपखोशेन मजत करपाक शकतात. रानां खात्यान हे खातीर फुडाकार घेतल्यार बरो.
पावसांत हुंवार येवप, उदक तुंबून उरप हें सदचेंच. गोंयांत सगल्याकूच हें जाता. पणजे शारांत तर व्हेनिसा परस चड उदक भरता, तेंय बी अर्दवर दडक पडल्यार. गटारां नितळ केल्यार ही समस्या कांय प्रमाणांत सुटूं येता. प्लास्टिकाचो वापरूय शक्य थंय उणो जावचो. खरें म्हणल्यार जिरपाक जागो नाशिल्ल्यान उदक तुंबता. आतां दोंगर, शेतां, मैदानां, जाग्यांनी इमारती उब्यो रावल्यात, म्हणटकच आमकां हुंवाराची आनी ताका लागून जावपी दुर्घटनांची संवय करून घेवची पडटली वा दुसरो कितें तरी पर्याय सोदचो पडटलो. न्हंयांनी, व्हाळांनी चिखल साचून उरला. कांय आडवाद सोडल्यार तीं कामां सुरू जावंक ना. मागीर ऐनवेळार कोणाक तरी ताची याद जातली. चिखलाक लागून उदकाक वचपाक वाट मेळना, रेंव उस्पिल्ल्यान दर्याचें उदक मेळत थंय घुसता, हाचो परिणाम लोकांक भोगचो पडटा, हें वेगळें सांगपाक नाका. गटारां, न्हंयो नितळ दवरपाची जापसालदारकी कोणाची? स्वराज्य संस्थांची. पूण समाजानूय आपले परीन चानयेचो वांटो उखलूंक जाय.
पावसा पसून मनीस, मोनजातीची राखण करपाक जाय, तेच भशेन पर्यावरणूय जाग्यार घालपाक जाय. गोंय बोडकें जायत चल्लां, थंय झाडां, तण कोणें रोंवपाचें? शारांनी ग्रीन लंग्स करचेच, ताचेच वांगडा गांवांनी, दोंगरांनीय ते जाय. एका काळार आमचें गांव, सरभोंवतणचो सैम सगल्यांकूच मोनेळ घालतालो. आतां पावसाचे दीस सोडल्यार हरशी तो पळयतना दोळे भगभगतात. तो जाग्यार घालप हेंय माॅन्सुना आदलें एक कामूच!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
