भांगरभूंय | प्रतिनिधी
पा किस्तान शिमेर झुजाचें वारें व्हांवंक लागिल्लें आसतनाच केंद्रांतल्या नरेंद्र मोदी सरकारान निमाणें जाती प्रमाण जनगणना करपाचो निर्णय घेतिल्ल्यान विरोधी काँग्रेस आसूं वा राष्ट्रीय जनता दल वा समाजवाद्यां सयत हेर खूबशे राजकी पक्ष चक्रावन गेल्यात, आनी भाजपाचे हे खेळीक आतां कशी जाप दिवप हेंच तांकां कळनाशें जालां. काँग्रेस आनी तांच्या वांगडी पक्षांचें केंद्राच्या ह्या निर्णयाक लागून आतां सैरभर जावप हें समजुपा सारकें आसा. पूण प्रधानमंत्री नरेंद्र मोदी हांणी विरोधकांच्या तथाकथीत एकवटीचेर ह्या निर्णयान निमाणचो प्रहार केला हें मान्य करचेंच पडटलें. विरोधकांक भुंयसपाट करपी राजकी खेळी अशें ह्या निर्णयाचें जें वर्णन करतात तें अतिशयोक्तीपूर्ण म्हणूंक येवचें ना. केंद्र सरकारान तें करतना जी वेळ सादल्या ती मात कोणाकूच अपेक्षीत नाशिल्ली. विरोधकांच्या ‘हय क हय न’ जाप दिवपाचे हे खेळीन भाजप प्रणीत राष्ट्रीय लोकशाय आघाडीन एकाच फातरांत एक दोन न्हय जाल्यार खूबशीं सुकणीं मारल्यांत. राहुल गांधीच्या काँग्रेस पक्षाक आतां भारतीय जनता पक्षाचे कचेरेंत वचून लाडू वांटपाचें काम जें करचें पडटा ताचे वेल्यानय हो पक्ष जाती प्रमाण जनगणना करपाच्या निर्णयान कसो सैरभैर जाला हें कळून येता. बिहारांत जावपी विधानसभा वेंचणुके आदींच भाजप-जनता दल युनायटेड आदीं पक्षांनी विरोधकांक जाम केलें हें मान्य करचेंच पडटलें. जाती प्रमाण जनगणेंतल्यान नेमकें कितें साद्य जातलें हाचेर वेगळे वेगळे तर्क मांडीत आसले तरी आयची ती ‘राजकी’ गरज आशिल्ली होच निश्कर्श काडून ताचे कडेन पळोवचें पडटलें.
सत्ताधीश आनी विरोधी पक्ष परकी आक्रमणाची शक्यताय आसतना आनी पहलगामांतल्या आतंकवादी हल्ल्या सारके घडणुके उपरांत एकठांय येवप, एकामुखान ताचेर निर्णय घेवप हें सगलें समजूंक शकता. पूण जाती प्रमाण जनगणना हो विशय ताका आडवाद थारला. जाती प्रमाण जनगणनेचेर आतां सत्ताधीश आनी विरोधी पक्ष लेगीत एकामुखान उलयत आसतनाच एक वेगळेंच चित्र देशांत दिसून येता. सगल्याच राजकी पक्षांनी अशा एखाद्या प्रस्नाचेर अशें मतैक्य प्रदर्शीत करप म्हणल्यार निकोप लोकशायेचें लक्षण मानूंक जाय आसलें तरी तशें जातना दिसून येना, आनी शुल्लक कारणा वेल्यान सत्ताधीश आनी विरोधी पक्ष आतां ह्या निर्णयाचें स्रय मेळोवपा खातीर एकामेकांचेर आरोप-प्रत्यारोप करपाच्या यत्नांत दिसतात. सर्वसामान्य निर्णया उपयरांतूय आयज ह्या प्रकरणांत जें कितें प्रदर्शन जायत आसा ताची खरें म्हणल्यार कसलीच गरज नाशिल्ली. राहुल गांधी जाल्यार ह्या निर्णयाचें स्रय मेळोवपा खातीर खंयच्याय थरावक वचपाचे तयारेंत आशिल्ल्याचें दिसून येता. मान्य आसा की राहुल गांधी हांणी हालींच्या काळांत जाती प्रमाण जनगणनेचो मुद्दो बरें पैकी वयर काडून ताचे कडेन देशाचें लक्ष ओडून घेत अतिमागास, अतिदुर्बल गटांत येवपी लोकांची सहानुभुती मेळयली. पूण काँग्रेसीन आपले कारकिर्दींत ह्या प्रस्ना कडेन जी कायमची आडनदर केल्ल्याचो जो ठपको तांचेर आसा ताचे पसून तांकां पळ काडूंक मेळचो ना, हो मुद्दोय लक्षांत घेवप गरजेचो आसा.
देशांत 60 ते 65 वर्सां काँग्रेसीन सत्ता भोगूनय जाती प्रमाण जनगणना करपाचो विचार तसो केन्ना गंभीरतायेन केलो ना. जाती प्रमाण जनगणनेचें आस्वासन मात 2010 वर्सा तेन्नाच्या मनमोहन सरकारान दिल्लें खरें, पूण ताची अंमलबजावणी करपाचें धाडस तेन्ना सरकाराक जालें ना. हो सगलो इतिहास मुखार आसतना हें अपत्य आपलेंच आशिल्ल्याचो दावो करपी कितले मेरेन योग्य आसा हो प्रस्न उपस्थीत जातलोच. देशांत स्वातंत्र्या खातीर म्हणल्यार 1931 वर्सा जाती प्रमाण जनगणना जाल्ली आनी ताच्या आदारान मंडल आयोगान 1980 वर्सा आपलो अहवाल सादर केल्लो आनी खरें म्हणल्यार थंय सावनूच अतिमागास आनी उपेक्षीत जातीच्या लोकांची संख्या कितली आसा हाचें सर्वेक्षण करपाची मागणी नेट धरूंक लागिल्ली. आतां ताचें स्रय राहुल गांधी वा तांच्या काँग्रेस पक्षाक घेवंक मेळचें ना. आयची परिस्थिती वेगळी आसा. राजकी परिस्थितीक सामकार वतना अशें निर्णय सत्ताधीश पक्षाक घेवचें पडटात की ताका लागून विरोधी पक्षाची कोंयडी जावंक शकता. नरेंद्र मोदी सरकाराचो जाती प्रमाण जनगणना करपाचो निर्णय अश्याच प्रकारांत मोडटा आनी विरोधकांची ताका लागून जाल्ली कोंयडी जाल्यार सामकी स्पश्टपणान दिसून येता. बिहार आनी उपरांत उत्तर प्रदेशांतूय विरोधकांक ताचो फटको बसप सहाजिकूच आसा. नरेंद्र मोदी सरकारान आठ धा पावलां फाटीं वचून विचारपूर्वक आपल्या भक्ष्याचेर मारिल्ली उडी आशिल्ल्यान ते तावडेंतल्यान काँग्रेस, समाजवादी ह्या सारक्या भक्ष्यांची तातूंतल्यान आतां सुटका जावप कठीण दिसता.
जाती प्रमाण जनगणेचो मार्ग आतां केंद्र सरकारान घेतिल्ल्या निर्णयान सुकर जाला. जाती प्रमाण जनगणनेक लागून नेमकें कितें साद्य जातलें हाचेर आरते परते चर्चेक सद्या गती मेळिल्ली दिसत आसली तरी मानवी सुविधां पसूनच वंचीत आशिल्ल्या अतिमागास, वंचीत आनी गरीब घटकांतल्या लोकांकूय विकासाची गोड फळां चाखूंक मेळटली अशी अपेक्षा हाका लागून बाळगूं येता. जातीचें लेबल वा बंधन हेंच भारतीय समाजांतल्या एका मोट्या वर्गाच्या विकासाच्या मार्गांत आडखळी निर्माण करीत आसा अशें जें कितें म्हणटात तें खरेंच आसून जाती प्रमाण जनगणने उपरांत हो वर्गूय विकासाच्या प्रवाहांत एकरूप जालो जाल्यार चित्र बदलूंक शकता हातूंत दुबाव ना. जातीच्या आदाराचेर करतात त्या भेदभावाचो फटको अशाच वर्गाक बशिल्ल्यान ह्या भेदभावाक कायमचोच उपाय काडपाचो उद्देश आसत जाल्यार जाती प्रमाण जनगणनेक येवकारूच दिवंक जाय. ह्या निर्णया फाटल्यान कसलोच राजकी उद्देश ना अशेंय कोणूय म्हणटात आसत वा तसो दावो करीत आसत जाल्यार तो चुकीचोच आसा अशें हांव स्पश्टपणान म्हणन. विरोधकांचो हय क हय करपा सयत निमाणें जें धाडस दाखोवचें पडटा तें मोदी सरकारान दाखयलां. आतां फक्त वेंचणुको जिखपा खातीरूच ह्या अस्त्राचो वापर करपाचो आसत जाल्यार तो मात बुमरँग थारूंक शकता हें लक्षांत दवरूनच फुडलीं पावलां उबारचीं पडटलीं. विरोधकांक भुंयसपाट करपाची ही राजकी खेळी आसा हें आर्थांतूच सगल्यांकूच समजल्ल्यान निर्णयाची अंमलबजावणी करतना जातीच्या आदाराचेर जावपी भेदभाव पुरायपणान नानपयत कशे जातले हाची दक्षता सरकाराक घेवची पडटली.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
