हें बऱ्याचें लक्षण न्हय

भांगरभूंय | प्रतिनिधी

धर्म म्हणल्यार लोकांची अफू, अशें कम्युनिस्ट विचारवंत कार्ल मार्क्स (1818- 1883) हांणी म्हणिल्लें. आपली सत्ता तिगोवपा खातीर आनी कामगार वर्गाक फटकिरी आशा दाखोवन भौतीक दुख्खां पसून तांचें लक्ष दुसरे कडेन वळोवपाचें धर्म हें एक शस्त्र, असो तांचो दावो आशिल्लो. धर्म हो तात्पुरतें सांत्वन करून वा लक्ष दुसरे कडेन व्हरून शोशीत, पिडेस्तांच्यो खऱ्यो समस्या आनी कश्ट विसरपाक लायता, अशेंय तांकां दिसतालें. आयज धर्म याद जावपाचें कारण म्हणल्यार पहेलगामांत जाल्लो हल्लो. अतिरेक्यांनी खंय एका पर्यटकाक ताचें नांव विचारलें. ताचो धर्म तांकां जाणून घेवपाचो आसतलो. तो कळटकच तांणी ताका फारान मारलो. उपरांत आशिकुशीच्या पर्यटकांचेर फारपेट करपाक सुरवात केली. मेळिल्ले म्हायती प्रमाण 26 पर्यटकांक मरण आयलां. तर थळाव्यां सयत 20 जाण जखमी जाल्यात. मरप्यां मदीं दोग विदेशी नागरिकूय आसात. बैसरन देगणांत पर्यटक घोड्या वयल्यान वतना हो प्रकार घडलो. हल्ल्याची जापसालदारकी लश्कर ए तैबान घेतल्या. पुराय देशाक धपको दिवपी ही घडणूक. 2019 त पुलवामा जाल्ल्या हल्ल्या उपरांतचो हो सगल्यांत भिरांकूळ हल्लो. नांव विचारून हल्लो केल्ल्यान ह्या प्रकाराची गंभीरताय आनीक वाडल्या. मनीसजात नेमकी जे दिकेन वचपाक लागल्या, तें पळयल्यार फुडाराक ताटांत नेमकें कितें वाडून दवरलां, तें कळटा आनी त्या विचारान भावी पिळग्यांचो हुस्को दिसपाक लागता.
लश्कर ए तैबा ही पाकिस्तानी जिहादी आतंकवादी संघटणा. हरशीं काश्मीरांत जैश ए मुहंमद ही संघटणा वावुरता. आपल्या मनशां सयत दुसऱ्यांचोय जीव घेवपी हे आतंकवादी! कायम धर्माक वेंग मारून आशिल्ले आनी ‘खून का बदला खून’ तत्वाचेर चलपी हे नराधम सुरवेक सावन मनीसपणाक खतां लायत आयल्यात. धर्माच्या आदाराचेर स्थापन जाल्ल्या आपल्या देशाक पसून तांणी भिकेक लायला. विशेश म्हणल्यार सत्ताधारी सरकारांनी, खास करून अदीं मदीं सत्तेर येवपी लश्करान भस्मासुराची ही पिलावळ कायम जागृत उरतली हाची खबरदारी घेतल्या आनी ताचे परिणाम लोकांक भोगचे पडल्यात. आमच्या देशाक तर पयलीं सावन ताचो त्रास जायत आसा. पाकिस्तान निर्माण जालो तेन्नाच्यान बंडखोर, आतंकवादी काश्मीरांत घुसखोरी करीत आसात. फाटल्या 75 वर्सांच्या काळांत ह्या राज्याचे सुरक्षेचेर करोडांनी डाॅलर खर्च जाल्यात. हो पयसो उदरगतीच्या कामांचेर खर्च केल्लो जाल्यार देशांतलें सगल्यांत मागास राज्य अमेरिके कडेन सर्त करतलें आशिल्लें, अशें म्हणल्यार अतिताय थारची ना! ह्या हल्ल्याची सगल्याच पक्षांनी, फुडाऱ्यांनी निंदा केल्या. पूण हें इतल्याचेरूय उरचें न्हय. संबंदीत आतंकवाद्यांक बुद्द शिकोवपाक सरकारान खर पावलां उखलचीं. कारण ते परत सक्रीय जावपाची भिरांत न्हयकारपाक येना. हे घडणुकेची मुळावी म्हायती मेळ्ळ्या, ती पळयत जाल्यार धर्मीक दुस्वास मनशाक खंयच्या पांवड्यार व्हरपाक शकता, तें होलमता.
केंद्र सरकारान काश्मीरांतली राजकी परिस्थिती बदलपाक साबार उपाय घेतले. राज्याक विशेश दर्जो दिवपी 370 वें कलम रद्द केल्लें. नोटबंदी केली, केंद्रशासीत प्रदेशाचो दर्जो दिलो. थंयचो हिंसाचार उणो जालो, मात आतंकवादी कारवायो बंद जावंक नात. हल्ल्याच्या भंयान राज्य सोडून गेल्ले थोडे पंडित परत आयले, पर्यटन थळांय चालू जालीं. हांगाचो हो मुखेल वेवसाय. पर्यटक वाडपाक लागिल्ले. पूण हो खुद्द पर्यटकांचेरूच जाल्लो हल्लो जम्मू, काश्मीराक मारक थारूं येता. पाकिस्तानाक, थंयच्या आतंकवाद्यांक नेमकें हेंच जाय. भारताचो सर्ग अशी नामना आशिल्ल्या जम्मू- काश्मीरांत 2015- 16 त 21 जवान शहीद जाल्ले, 41 जखमी जाल्ले. 2019 त पुलवामांत 40 जवान शहीद जाल्ले. पोरूं गंदेरबलांत सात जवान. दरवर्सा थंय जवान, सामान्य लोक मरत आसात. देशाचें हें कितलें व्हडलें लुकसाण? तरणाटे पिरायेचेर हजरांनी बायलांनी घोव व्हगडायला. भुरग्यांचो बापूय, भयणींचो भाव, आवय- बापायचो पूत ना जाला. शेंकड्यांनी कुटुंबांक मानसीक त्रास, मनस्ताप सोंसचो पडला. आतांकवादाचे वाटेर चलपी लोकांनी हाचो विचार करुंक फावो. मनीसपणाचे दुस्मान आशिल्ल्या ह्या राकेसांनी आपली विचारसरणी मार्गाक लागची, आपल्या मना सारकें जावचें म्हूण कल्पनाय करपाक जावची ना, इतलें समाजाचें लुकसाण केलां. बरें, इतलेंय करून तांचो उद्देश साध्य जाला? तांकां जाय तशें जालां? उरफाटें तांकां स्वताचो जीव व्हगडावचो पडला. तांच्या देशाचें भरून येवचें ना, इतलें लुकसाण जालां. तरीय नव्या – नव्या लोकांक तांणी माड्डिल्ले गुन्यांवकारी वाटे वयल्यान चलपाची उमळशीक लागल्या. थोडे चलपाकूय लागल्यात. मनीसजातीचे दुस्मान आशिल्ल्यांचो सासणाचो बंदोबस्त करता म्हणसर हें चालूच उरतलें.
फुडाराचीं सपनां पळोवपी जायत्या जोडप्यांनी आपलो वांगडी कालचे घडणुकेंत व्हगडायला. हातूंत गुजरात, महाराष्ट्र, कर्नाटक, ओडिशा राज्यांतले पर्यटक आसात. सगल्या भारतीयांनी मतभेद विसरून एकठांय येवपाचो हो दीस. आतंकवाद, नक्षलवाद, बंडखोरी, हिंसा, दुस्वास, तिडक, दंगल. कितलीं वर्सां हें चलपाचें? सुशिक्षितांचो आंकडो वाडलो तरी जात, धर्म, भाशा, प्रांता वयल्यान किजिलां उणीं जावंक नात. हें बऱ्याचें लक्षण न्हय.