भांगरभूंय | प्रतिनिधी
नेव्हील आल्फान्सो: गोंयची वाटचाल स्वंयपुर्णताये कडेन
पणजी: भाजीपाल्या उपरांत आतां रोजांच्या उत्पादनांतूय गोंयची वाटचाल स्वयंपुर्णताये कडेन सुरू जाल्या. पोरू वर्सांचे तुळेंत ह्या वर्सा रोजांच्या फुलांची लागवड क्षेत्र आठ हॅक्टरांनी वाडल्या. ताका लागून उत्पादनांतूय मोटी वाड अपेक्षीत आशिल्ल्याची म्हायती कृशी खात्याचे संचालक नेव्हील अल्फान्सो हांणी दिली.
कृशी खात्यान रोजांचे लागवडीक प्रोत्साहन दिलां. रोजांचे क्षेत्र वाडोवपा खातीर खात्या वतीन प्रती हॅक्टर 75 हजार रुपयांची मजत करतात. पोरूं वर्सा गोंयांत वट्ट 17 हॅक्टर क्षेत्रांत रोजां लायिल्लीं. ताचें उत्पादन सुमार 102 मेट्रीक टन आशिल्लें. ह्या वर्सा रोजांचे क्षेत्र वाडून 25 हॅक्टर मेरेन पावलां. हातूंतल्यान 125 मेट्रीक टन उत्पादन अपेक्षीत आशिल्ल्याचें अल्फान्सो हांणी सांगलें.
तांणी म्हणलें, आमी लोकल फोर लोकल आनी स्वयंपूर्ण गोंय ह्या उपक्रमा खाला हेर राज्यांतल्यान रोजां हाडचे परस थळाव्या रोजांच्या उत्पादनाक प्रोत्साहन दितात. पोरूं वर्सा 250 शेतकारांनी रोजांची लागवड केल्ली. ह्या वर्सा वट्ट 285 शेतकारांनी रोजांची लागवड केल्या. हेर राज्यांतल्यान हाडिल्लीं रोजां दोन दिसां भितर पेड्डेर जातात. गोंयांत घेतिल्ल्या रोजांच्या उत्पादनाक बरो दर्जो आसा. ताच्या वैशिश्ट्याक लागून तो पांच ते स दीस बरो उरता.
गोंयांत परबांच्या दिसांनी रोजांची मागणी वाडटा. पूण फावो तशें उत्पादन जायनाशिल्ल्यान रोजां महाराष्ट्र आनी कर्नाटकांतल्यान हाडचीं पडटात. पोरूं वर्सा मुख्यमंत्री डॉ. प्रमोद सावंत हांणी रोजांचें उत्पादन गोंयांतूच करपाचें आवाहन केल्लें. उपरांत कृशी खात्यान रोजांचे लागवडी खातीर विशेश यत्न सुरू केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
