भांगरभूंय | प्रतिनिधी
-2025 त नव्या बांदा वरवीं मेळटलें उदक
पणजी : फुडारांत उदकाचो उणाव जावचो न्हय म्हूण सरकारान पुराय राज्यांत 100 बांद बांदपाक तत्वता मान्यताय दिल्या. ह्या 100 बांदां मदीं 50 बांदांचें जागे निश्चीत जाल्यात. उदका पुरवण खात्याचे मंत्री सुभाष शिरोडकार हांणी ही म्हायती दिली.
जागे निश्चीत जाल्यान त्या बांदांचें अदमासे खर्च काडपाची प्रक्रिया सुरू जाल्या. नोव्हेंबर मेरेन कामाच्यो निविदा जारी जातल्यो. जानेवारी 2024 मेरेन 50 बांदांचें काम सुरू जातलें. पावसाच्या दिसांनी काम करपाक आडखळ जाता. जानेवारी ते मे ह्या 5 म्हयन्यांत काम पुराय करचें पडटा. जानेवारींत काम सुरू जाले, तरी फुडल्या मे म्हयन्यांत ह्या बांदांतल्यान उदक मेळचें ना. 2025 त कांय बांदांतल्यान उदक मेळटलें, अशें मंत्री सुभाष शिरोडकार हांणी सांगलें.
फुडारांतल्या उदकाच्या गरजेचो विचार करून सरकारान बांदांचें नियोजन केलां. कुट्टी बांदांक विरोध जाता. लोकांची समजूत काडपाचे सरकार यत्न करता. पूण लोक समजून घेनात जाल्यार 144 कलम लागू करपा खेरीत हेर पर्याय ना. मुर्डी – खांडेपारा लेगीत खात्याच्या अधिकाऱ्यांनी लोकांची समजूत काडपाचे यत्न केल्ले. लोक आयकना जाले म्हूण 144 कलम लागू करचें पडलें, अशें उदका पुरवण खात्याचे मंत्री सुभाष शिरोडकार हांणी सांगलें.
उदका पुरवण खात्याच्या अधिकाऱ्यांची बसका घेतले उपरांत तांणी ही म्हायती दिली.
उदकाच्या नियोजना खातीरूय बांद
मुर्डी – खांडेपारा पुलीस बंदोबस्तात बांदांचें काम सुरू आसा. 144 कलम लागू करून बांदांचीं कामां करपाची इत्सा सरकाराक ना. लोकांच्या हिता खातीर बांद बांदप गरजेचें. बांदांक विरोध करप्यांनी हाचो विचार करपाक जाय. फुडारांत उदकाचो उणाव जावचो न्हय, म्हूण 144 कलम लागू करून काम करपाची पाळी सरकाराचेर आयल्या, अशें उदका पुरवण खात्याचे मंत्री सुभाष शिरोडकार हांणी सांगलें. मुर्डी – खांडेपारा बांदांक लागून लोकांचें कसलेंच लुकसाण जावचें ना. लोकांक पुराय म्हायती दिवन बांदांचें काम सुरू करपाचो यत्न आशिल्लो. पूण लोकांनी विरोध केलो हे दुर्दैव, अशें शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
