भांगरभूंय | प्रतिनिधी
भांगरभूंय । खबरां मेज
पणजीः धर्म आनी हेर मुद्द्यां वयल्यान लोकां मदीं फूट घालपाचें भाजपाचें काम उक्ताडार आयिल्ल्यान देशातली जतना 2024चे लोकसभा वेंचणुकेंत ह्या भ्रश्ट जुमला पक्षाक लोक घरा धाडटले असो विस्वास गोंय प्रदेश काँग्रेस पक्षाचे अध्यक्ष अमित पाटकार हाणे उक्तायला.
रायबंदर सर्कल तें पणजे आझाद मैदान अशे काडिल्ले भारत जोडो यात्रे उपरांत ते पत्रकारां कडेन उलयताले. यात्रेंत दक्षीण गोंयचो खासदार फ्रान्सिस सार्दिन, विरोधी पक्ष फुडारी युरी आलेमाव, आमदार अॅड. कार्लूस फेरेरा, एल्टन डिकॉस्ता, आदले प्रदेश अध्यक्ष गिरीश चोडणकार, अमरनाथ पणजीकार, बायल मोर्चा अध्यक्ष बीना नायक, रिची भार्गव, जोएल आंद्राद्र, विवेक डिसिल्वा, केनिशा मिनेझीस, विल्मा फर्नांडींस, अहराज मुल्ला, नितीन पाटकार, रेनाल्डो रुझारियो, महेश नादर, विजय भिके, प्रदिप ना.क, जनार्दन भंडारी, वीरेन्द्र शिरोडकार, सावियो डिसील्वा वांटेकार जाल्ले.
धर्म आनी हेर मुद्द्यांचेर देशांत फूट घालपाचो यत्न भाजप करता. हें थांबोवपा खातीर लोकांनी संघटीत जावपाची गरज आसा हें आमचे फुडारी राजीव गांधी हांणे तांच्या भारत जोडो यात्रे वेळार सांगल्लें. आमी लोकांक एकठांय हाडपाचो यत्न करतात, अशें पाटकारान सांगलें. सत्ताधारी भाजप धर्म आनी जाती वयल्यान लोकां मदीं फूट घालपाक सोदता. राहुल गांधी हांणी देशांतल्या लोकांक एकठांय हाडपाच्या उद्देशान भारत जोडो यात्रा केल्ली अशें गिरीश चोडणकारान सांगलें.
गोंयांत बेरोजगारीचें प्रमाण चड आशिल्ल्यान तरणाट्यां मदीं निर्शेणी आसा. ही तरणाटी शक्त भाजपाचो पर्दाफाश करतली अशें चोडणकारान सांगलें. भाजप देशांत फूट घालपाक सोदता आनी राहुल गांधी हाका लोकांक एकठांय करपाचें आसा. भाजपान देशाचो नाश केला, बेरोजगारी वाडटा आनी म्हारगायेचेर लेगीत नियंत्रण ना. भाजपाक घरा धाडपाचो वेळ आयला, अशें फ्रान्सिस सार्दिन हाणे सांगलें.
गोंयांतल्या लोकसभेचो दोनूय सुवातो काँग्रेस पक्ष जिखतलो असो हावे प्रदेश युवक काँग्रेसाची प्रभारी रिची भार्गवान सांगलें. गोंय मुक्तीची कीट डॉ राम मनोहर लोहिया आनी डॉ ज्युलिया मिनेझीस हांणी पेटयली. सध्या युवक काँग्रेस आनी आमचे फुडारी द्वेशाच्या विरोधांत लोकांच्या मनांत कीट पेटोवपा खातीर एकठांय आयल्यात अशें बीना नायकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
