भांगरभूंय | प्रतिनिधी
मेघना शेटगांवकार हांची म्हायती; म्हापश्यां डीएमसी म्हाविद्यालयांत आयोजन
म्हापशें: गोवा कोंकणी अकादेमी आनी ज्ञानप्रसारक मंडळ म्हाविद्यालय आसगांव, म्हापशें हांच्या जोड पालवान 22 वें युवा कोंकणी साहित्य संमेलन 17 आनी 18 मार्च दिसा डीएमसी म्हाविद्यालयांत आयोजीत केलां, अशी म्हायती गोवा कोंकणी अकादेमीच्यो वांगडी सचीव मेघना शेटगांवकार हांणी दिली.
बुधवारा म्हाविद्यालयाच्या सभाघरांत आयोजीत केल्ले पत्रकार परिशदेंत त्यो उलयताल्यो. ह्या वेळार म्हाविद्यालयाचे प्राचार्य डॉ. दिलीप आरोलकार, प्रा. प्रशांती तळपणकार आनी प्रा. पुरुषोत्तम वेर्लेकार हाजीर आशिल्ले.
17 वेर सकाळीं 10 वरांचेर महाराष्ट्रांतले नामनेचे उर्दू आनी इंग्लीश युवा साहित्यीक रहमान अब्बास हांचे हस्तुकीं ह्या साहित्य संमेलनाचें उक्तावण जातलें. संमेलनाध्यक्ष म्हूण साहित्यीक आनी पत्रकार मार्कुस गोन्साल्वीस जाल्यार खाशेले सोयरे म्हूण ज्ञानप्रसारक मंडळाचे अध्यक्ष श्रीकृष्ण पोकळे, गोवा कोंकणी अकादेमीचे अध्यक्ष अरूण साखरदांडे, उपाध्यक्ष वसंत भगवंत सावंत, म्हाविद्यालयाचे प्रा. डॉ. दिलीप आरोलकार हाजीर रावतले.
संमेलनाच्या येवकार अध्यक्षपदार प्रा. डॉ. दिलीप आरोलकार, जाल्यार कार्याध्यक्षपदार तरणाटे लेखक प्रा. पुरुषोत्तम वेर्लेकार हांची निवड जाल्या अशी म्हायती प्रा. प्रशांती तळपणकार हांणी दिली.
प्रा. डॉ. दिलीप आरोलकार हांणी कार्यावळीची म्हायती दितना सांगलें, संमेलनाच्या पुराय वाठाराक नागेश करमली नगर अशें नांव दिलां. मुखेल माटवाक नारायण मावजो हांचें नांव दिलां. जाल्यार माची आनी सभाघरांक म्हाविद्यालयाचे आदले प्राध्यापक तशेंच कोंकणी लेखक एडवर्ड डिलिमा, प्रकाश पाडगांवकार, जयमाला दणायत, रजनी भेंब्रे, रेवणसिद्धी नायक हांचीं नांवां दिल्यांत.
संमेलनाच्या उक्तावण सुवाळ्याक तरणाटे लेखक सुप्रिया काणकोणकार हिच्या कवितांझेल्याचें प्रकाशन तशेंच फाटल्या वर्सा इनामपात्र थारिल्ल्या तरणाट्या साहित्यिकांच्या साहित्याचो आस्पाव आशिल्ले युवाकुंर ह्या पुस्तकाचें प्रकाशन जातलें.
पडवेर हे कार्यावळींत लेखक दत्ता दामोदर नायक आनी नूतन साखरदांडे हांच्या मुलाखतीची कार्यावळ जातली. सान्वी खांडेपारकार आनी गौरांग भांडिये हे मुलाखती घेतले. उपरांत उक्त्या प्रांगणांत दोगूय लेखक तरणाट्यां लेखकां कडेन चर्चा करतले. तशेंच युवा साहित्य पुरस्कार जैतिवंत नरेश नायक हांची तरणाटे लेखक गोरख शिरसाट मुलाखत घेतले.
बीजभाशण आनी कार्यशाळा ह्या उपक्रमांत लेखक आनी प्रकाशक दिनेश मणेरकार युवा साहित्यिकांक मार्गदर्शन करतले. सांजवेळा 4.30 वरांचेर कवी संमेलन प्रा. दिलीप धारगळकार हांचे अध्यक्षताये खाला जातलें. जाल्यार 6 वरांचेर सांस्कृतीक कार्यावळ जातली.
18 वेर सकाळीं 9.30 वरांचेर कविता, कथा, ब्लॉगींग आनी बालसाहित्य हे कार्यशाळेंत हेमा नायक, मीना काकोडकार, राधा भावे, नारायण महाले, लुझेस गोम्स, रत्नमाला दिवकार, रमेश घाडी, गोपीनाथ गांवस, चेतन आचार्य, सुभाष कामळकार, अन्वेषा सिंगबाळ, युगांक नायक हे साहित्यीक तरणाट्या लेखकांक मार्गदर्शन करतले.
दनपारां 2.30 वरांचेर संमेलनाच्या समारोप सुवाळ्याक प्रा. भास्कर नायक खाशेले सोयरे म्हूण हाजीर आसतले. जाल्यार संमेलनाध्यक्ष मार्कुस गोन्साल्वीस, येवकार अध्यक्ष डॉ. दिलीप आरोलकार, कार्याध्यक्ष प्रा. पुरुषोत्तम वेर्लेकार आनी कोंकणी अकादेमीचे उपाध्यक्ष वसंत भगवंत सावंत हाजीर आसतले. मजगतीं, ह्या संमेलनाक 150 प्रतिनिधींची नोंदणी जाल्या अशी म्हायती प्रा. प्रशांती तळपणकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
