भांगरभूंय | प्रतिनिधी
मडगांव, प्रतिनिधी : मडगांवां हिंदू मसंडभूंयेंत मारामारी जाल्ल्या प्रकरणांत फातोर्डा पुलिसांनी रातचें उसरां स दुबावितांक अटक केली. नझिम बासू (२३), अफझल शेख (२५), जाफर अन्वर खान (२५), शाबुद्दीन कडकोल (२६), नसीर शेख (२५, सगळे रा. पाजीफोंड, मडगांवा) आनी मंजुनाथ हरिजण (२५, कुडतरी) अशीं दुबावितांचीं नांवां जावन आसात. ह्या सगळ्यां आड खुनाचो यत्न केल्ल्याचो गुन्यांव नोंद केला.
मठग्रामस्थ हिंदू सभेच्या पाजीफोंड मडगांवचे मसंडभूंयेंत कोयर उडयतना दोगा जाणांक हे विशीं विचारलें तेन्ना तांणी रागान दवर्ली दिकरपालचे पंच वांगडी साईश राजाध्यक्ष आनी जयवंत पै फोंडेकार हांकां मार घालो. ही घडणूक सांजवेळार घडली. मारप्यांनी हिंदू धर्मा विशीं आक्षेपार्ह विधान केल्या उपरांत ही मारामारी जाली. मार घाल्या उपरांत दुबावितांनी पुलीस स्टेशनांत वचून आपल्याक बडयल्ल्याची कागाळ करपाचो यत्न केलो. पूण, जखमी साईश राजाध्यक्ष आनी फोंडेकार हांचे वांगडा हिंदू मठग्रामस्थ सभेचे अध्यक्ष भाई नायक हांणी फातोर्डा पुलिसांक खरेंच कितें घडिल्लें हाची म्हायती पुलिसांक दिल्या उपरांत पुलिसांनी दुबावितांक पुलीस स्टेशनारूच बसोवन दवरले.
पुलिसांनी ह्या आठ जाणां आड गुन्यांव नोंद केला. खुनाचो यत्न करप, धर्मीक थळांचेर वाद निर्माण करप, हल्लो करून मारून उडोवपाची धमकी दिवप, थारावीक उद्देशान बेकायदेशीरपणान गर्दी करप, शस्त्रां वापरून दंगो करपाचो यत्न करप अश्या कलमां खाला गुन्यांव नोंद केल्लो.
आयतारा रातच्या वेळार स जाणांचेर अटकेची कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
