भांगरभूंय | प्रतिनिधी
बरेच वैजकी कर्मचारी अपडेट जायनात. तांचे खातीर कुशळटाय, प्रशिक्षण असल्यो कार्यावळी जावंक जाय.
हाॅस्पिटलांनी कर्मचाऱ्यांचो उणाव जाणवता, हाचे फाटलें कारण म्हणल्यार दुयेंतींचो आंकडो वाडला. लोक भलायके बाबतींत जागृत जाल्यात काय दुयेंसां वाडल्यांत, हो अभ्यासाचो विशय. द. गोंय जिल्हो हाॅस्पिटल, काणकोण- केपेंचीं हाॅस्पिटलां तशेंच हेर भलायकी केंद्रांचो मनीसबळाचो उणाव पयस करपाचो निर्णय सरकारान घेतला. तो बेगोबेग चालीक लागचो. मडगांवचें इएसआय हाॅस्पिटल आतां केंद्रीय कर्मचारी राज्य विमो म्हामंडळा वतीन चलयतले. थंय वैजकी म्हाविद्यालय येता. गोंयांतलें हें दुसरें वैजकी म्हाविद्यालय. थंय सध्या 100 खाटी आसतल्यो. ह्या इएसआय हाॅस्पिटलांत बरींच वर्सां कंत्राटाचेर काम करपी कर्मचारी आसात खंय. चडशे गोंयकार. इएसआय म्हामंडळान तें ताब्यांत घेतकच ह्या कर्मचाऱ्यांक सरकारान हाॅस्पिटलांनी आसपावन घेवपाक जाय. नव्यान सुरू जावपी हाॅस्पिटल- म्हाविद्यालयाक नवे कर्मचारी लागतले. तुयेंच्या हाॅस्पिटलांत भरती जातली, काणकोण, केप्यांय कर्मचारी घेतले. म्हणटकच पावसा पयलीं वैजकी मळाचेर दीस बरे फुलतले!
सगल्याच हाॅस्पिटलांतल्यो, भलायकी केंद्रांतल्यो साधन सुविधा सुदारपाची गरज आसा. अॅम्ब्युलन्सी 108 सेवे कडेन जोडपाचो निर्णय योग्यूच. कारण हे सेवेचो वापर दिसान दीस वाडतूच आसा. अॅम्ब्युलन्सींचो आंकडो वाडोवपाचो वेळ आयला. भलायकी केंद्रांतल्यान तालुको हाॅस्पिटल, उपरांत जिल्हो हाॅस्पिटल आनी निमाणें जीएमसी, असो दुयेंतीचो प्रवास. तो उणो जावंक जाय. जीएमसींत मेळटात, तश्यो सुविधा हेर कडेन मेळ्ळ्यार हो प्रस्न सुटावो जातलो. पयस मेरेन धांवाधाव करची पडचीना. उपकरणां चलोवपाक तंत्रज्ञांची नेमणूक करची पडटली. कर्मचारी गांवगिऱ्या वाठारांनी वच्चे, हे खातीर तांकां ‘उर्बा भत्तो’ दिवं येता. तज्ञ दोतोरांची भायल्यान सेवा घेवं येता. बरेच वैजकी कर्मचारी अपडेट जायनात. तांचे खातीर कुशळटाय वर्ग, प्रशिक्षण, गिन्यान वाडोवप असल्यो कार्यावळी नेमान जावपाक जाय. भोवतेक जाणांक पाळयांनी काम करचें पडटा. कांय वेळार एका फाटल्यान एक पाळी सांबाळीत देड- दोन दीस कामार रावचें पडटा. असले प्रकार जावंक जायनात म्हूण कर्मचाऱ्यांची संख्या वाडोवची पडटली. मुळाव्या सुविधां कडेनूय लक्ष जाय. खास करून नितळसाण. हाॅस्पिटलांत हुंदीर, जल्ले, सुणीं, माजरां नाकांत. फावो तितल्यो खाटी जाय. व्हडल्या हाॅस्पिटलांनी तांकां शेंदरी, चादर, स्ट्रेचरीचेर न्हिदोवचे पडटात, अश्यो कागाळी वाडल्यात. दुयेंती भायर पडलो जाल्यार ताका घरा व्हरपाक सगल्या हाॅस्पिटलांक धवी चादर, स्ट्रेचर, अॅम्बुलन्सीची सुविधा दिवची. हे खातीरुय लाचार जावन नगरसेवक, पंच, आमदारा कडेन वशिलो लावपाचो वेळ दुयेंतीच्या घरच्यांचेर येवचो न्हय. कर्मचाऱ्यांनी नमळायेन वागचें, कामाची तिडक दुयेंतींचेर काडची न्हय, हें वेगळें सांगपाक नाका.
गोंय हें पर्यटन राज्य. देशाची ‘अपघात राजधानी.’ म्हणटकच ते नदरेन वैजकी सुविधा जाय. उदकांत बुडपाच्यो दुर्घटना जातात, नशेचीं प्रकरणां आसात. ताचेर गोंयांत अत्याधुनीक उपचार जावचे. कॅन्सर, मुत्रपिंडाचीं दुयेंसांय चड आसात. देखून डायलेसिस उपकरणांची गरज आसा. रक्तपेढीय जाय. तितलेंच जीएमसी वयलें वजें उणें जातलें. ‘सरकारी हाॅस्पिटलांतलीं वखदां घेवन भलायकी सुदरना. ते खातीर खाजगी दोतोरा कडेनूच वचपाक जाय’, असो एक गैरसमज (घडये अप्रचार) आसा. तो केन्ना पयस जातलो? हाॅस्पिटलांत उपचार घेवपी दुयेतींच्या घरच्यांक वखदां खातीर फाॅर्मासी सोदीत भोंवचें पडटा, हें योग्य न्हय. खाजगी हाॅस्पिटलांनी दुयेंतीचो डाटा नोंद करून दवरतात. दोतोराक तो बऱ्याक पडटा. सगल्या सरकारी हाॅस्पिटलांनी ही पद्दत चालीक लावची. हो डेटा राज्यांतल्यान सगल्या हाॅस्पिटलांक आॅनलायन पळोवपाक मेळपाक जाय. दुयेंतीची डिजीटल फायल फायद्याचीच. घरांतल्या दुयेंतीक दोतोर फोना वयल्यान सल्लो दितले, अशें जाहीर जाल्लें, ताचें कितें जालें?
गोंयांत एक से बढकर एक म्हणटात, तशीं सरकारी आनी खाजगी हाॅस्पिटलां आसात. पूण सगलें चकचकीत, झगमगीत आसून उपकारना; थंय मनीसपण, कुशळटाय आनी दर्जेदार सेवा आसप चड म्हत्वाचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
