भांगरभूंय | प्रतिनिधी
संसदेंत विशेश अधिवेशनाक सुरवात
लोकसभेंत मांडलें महिला आरक्षण विधेयक
मतदारसंघ पुनर्रचना मुद्द्याचेर विरोधकांची हरकत
खबरां संस्था
नवी दिल्ली : प्रधानमंत्री नरेंद्र मोदी हांणी लोकसभा आनी विधानसभांनी बायलांक 33 टक्के आरक्षण दिवपा खातीर राज्यांक सगळे तरेचो विस्वास दिवपाचो यत्न केलो. प्रधानमंत्री मोदी हांणी लोकसभेंत सांगलें, आपूण उतर दितां, मतदारसंघ पुनर्रचनेकलागून जावपी निर्णय प्रक्रियेंत खंयच्याच राज्यांचेर अन्याय जावपाक दिवचे नात.
प्रधानमंत्री नरेंद्र मोदी हांणी महिला आरक्षण लागू करपा खातीर हाडिल्ल्या विधयकांचेर आपल्या भाशणांत खुबूच पॅझाद पद्दतीन आपल्या सरकाराची बाजू मांडली आनी सगल्या खासदारांक भरवसो दिलो, हाचें स्रय घेवपाचो यत्न ते करचे नात आनी कोणाच कडेन भेदभाव करचे नात.
प्रधानमंत्री मोदी हांणी सांगलें, ह्या पवित्र सुवाते वयल्यान सांगपाक सोदतां, ही निर्णय प्रक्रिया कोणाच वांगडा भेदभाव करची ना. ही निर्णय प्रक्रिया कोणाच वांगडा अन्याय करची ना. भुतकाळांत जे फेररचणुकेचें प्रमाण चलत आयलां, तातूंत कसलोच बदल जावचो ना.
संसदेंत बिरेस्तारा विशेश अधिवेशनाक सुरवात जाल्या. पयल्याच दिसा लोकसभेंत महिला आरक्षण विधेयका वयल्यान सत्ताधारी आनी विरोधकां मदीं नेटाचो वादविवाद पळोवपाक मेळ्ळो. सकाऴ सावन दनपार मेरेनच्या कामकाजांत मतदारसंघ पुनर्रचना मुद्द्याचेर विरोधकांनी खर हरकत घेतली, जाल्यार सत्ताधाऱ्यांनी लेगीत ताका सणसणीत जाप दिली.
लोकसभेंत चर्चे वेळार प्रधानमंत्री मोदी हांणी विरोधकांचेर टिका करून म्हणलें, जे आदीं ह्या विधेयकाक तेंको दिताले, तेच आतां विरोध करतात. बायलांक आरक्षण दिवप हें आपल्या प्रायश्चिताचें साधन आसा. ह्या विधेयकाक लागून खंयच्याच राज्याचेर अन्याय जावचो ना. कसलोच भेदभाव जावचो ना, हें आपूण उतर दितां. सध्याच्या प्रतिनिधित्वाचें प्रमाण बदलचे नात. खंयच्याच राज्याचेर अन्याय जावचो ना.
प्रधानमंत्र्यान फुडें सांगलें, महिला आरक्षण हो नारी शक्तीचो अधिकार आसा. आमी बायलांक कांयच दिनात, जाल्यार तांचो अधिकार परतून दितात. जर तुमी विरोध केलो जाल्यार ताचो राजकी फायदो आपल्याकूच जातलो. जर तुमी तेंको दिलो जाल्यार आपूण ताचें पुराय स्रय तुमकां दितलों. विधेयक मंजूर जाले उपरांत सगल्या पक्षांचें उपकार मानचे कातीर जायरात दिवपाक आनी तातूंत सगल्यांचो फोटो छापपाक लेगीत आपूण तयार आसा, अशेंय मोदी हांणी सांगलें.
ह्या प्रकरणांत कशे तरेचे डावपेच खेळ्ळे तें आमकां सगल्यांकूच खबर आसा. आपूण हाच्या पुराय बाजून आसा, तरी लेगीत एकादो तंत्रीक मुद्दो मुखार येता आनी परतून परतून हे प्रक्रियेंत आडखळ हाडटात. पूण आतां, बायलांची फटवणूक करप तुमका हाचे मुखार शक्य जावचें ना. हांगा अशेय कांय लोक आसात, जांकां दिसता ह्या पुराय प्रकरणांत मोदींचो कसलो तरी राजकी सुवार्थ लिपला. महिला आरक्षणाचो विशय फाटलीं तीन दसरां पडून आसा. ह्या विशया कडेन राजकारणाच्या वक्लांतल्यान पळय नासतना राष्ट्रहिताचे नदरेन पळोवप गरजेचें आसा. तशेंच, 2023 त नव्या संसद भवनांत ‘नारी शक्ती वंदन अधिनियम’ सगल्यांच्या मतान पारीत जाला, हाचोय उगडास मोदी हांणी करून दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
