भांगरभूंय | प्रतिनिधी
बाजारांत लाखांनी रुपयांची जातली उलाढाल; देवी लयराईची जात्रा
दिवचल: लाखांनी भाविकांचें श्रद्धास्थान आशिल्ल्या शिरगांवच्या श्रीदेवी लयराईच्या उत्सवा निमतान गोंय तशेंच हेर राज्यांतूय हजारांनी धोंड व्रत करपाक आयज सावन सुरवात करतात आनी फुडले पांच दीस पुराय गोंय सुवाळ्याक पाळो दिल्ल्याचें दिसून येतलें.
गांवांगांवांनी, वाड्यवाड्यार सैमीक उदकास्रोत बांयचे सुवातेर, देवूळ वाठारांत व्हड प्रमाणांत एकठांय जावन व्रतस्थ व्रत करतले. ते सुवातेर एकठांय रावन पांच दीस वेगळो अणभव घेतले. चुट्टांच्या माटवांत वा धोंडांच्या शेड सभाघरांत हे धोंड व्रत करतात. सुवाळ्याक पाळो दितात. जेवणा खातीर, फराळा खातीर स्वतंत्र वेवस्था करून दिसांतल्यान धा ते पंदरा फावटी न्हावन हे धोंड आगळी वेगळी सेवा करतात.
शेणाचो शिंतोडो घालून वाठार शुद्ध करतात. तशेंच हे सुवातेर पुरायपणान सुवाळ्याक पाळो दिवप गरजेचें आशिल्ल्यान ताची सगली खबरदारी गांवांतले लोक घेतात.
हो अणभव विलक्षण आसून आपल्या घरा पसून तीन आनी पांच दीस वेगळें रावप आनी गटागटान एकठांय रावन देवीची आराधना करप हो अणभव विलक्षण आशिल्ल्याचें विक्रम आरोलकार ह्या धोंडान सांगलें.
गोंयांतल्या खूबशा वाठारांनी, गांवांगांवांनी ह्या निमतान प्रसन्न वातावरण आसून देवी लयराईच्या भक्तींत धोंड विलीन जातले.
जात्रे निमतान वृतस्थ धोंड नवीं नवीं खरेदी करून तशेंच फराळ, भाजिपालो, कपडे, आयदनां तशेंच हेर वस्तूंचे खरेदी खातीर चड पसंती दीत आशिल्ल्यान बाजारपेठेंत लाखांनी रुपयांची उलाढाल जायत आसता. ते खातीर बाजारांत गर्दी केल्ल्याचें दिसून येता. जात्रेचे फाटभुंयेर शिरगांवां गोंय प्रशासनान तशेंच देवस्थान समितीन तयारी नेट केल्ल्याचें प्रत्यक्ष चित्र शिरगांवां वतकच दिसून आयलें.
पवित्र तळयेचे सुवातेर हजारांनी धोंड पवित्र स्नान घेतले थंय बरी वेवस्था केल्या. येरादारीची, पार्किंगेची आनी हेर गजालींचो बंबोदस्त करपाची नेटान तयारी सुरू आसा. 92 सीसीटीव्ही कॅमेरे लावन सगली कडेन नदर दवरतले. तशेंच व्हड प्रमाणांत पुलीस बंदोबस्त आसून देवस्थाना वतीन आपवावुरपी सगली कडेन नदर दवरतले. तशेंच जिल्होधिकारी आनी प्रशासनान मार्गदर्शक तत्वांक पाळो दिवपाचो निश्चेव करून जात्रेंत कसलेच तरेची चूक घडची न्हय हे खातीर बारकायेन नदर दवरल्या.
जात्रेंत अंदूं फेरी भरची ना हे खातीर खूबशे लोक निरशेल्यात. तरी सुरक्षेचे नदरेन आनी भाविकांक देवदर्शनाचे नदरेन प्रशासनान फाटल्या वर्साचे दुर्घटणेचे फाटभुंयेर ह्या वर्सा नेमांक खरपणान पाळो दिवपाचो निश्चेव केला.
मजगतीं, येरादारी वेवस्था, पार्कींग वेवस्था आनी हेर वेवस्थे विशीं येरादारी पुलीस, ट्राफीक सेव, पुलीस तशेंच भौशीक बांदकाम खातें, वीज खातें, भलायकी खातें हांणी सगले तरेची वेवस्था उपलब्ध करपाचे नदरेन तयारी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
