भांगरभूंय | प्रतिनिधी
डॉ. रघुनाथ माशेलकार : गोमंत गौरव सन्मानान भोवमानीत
भांगरभूंय । प्रतिनिधी
पणजी : आपूण गरीब, सामान्य लोकां खातीर काम करचें हो आपले आवयचो सदांच आगरो आशिल्लो. तिच्या नांवान सुरू केल्ल्या अंजनी फावंडेशना वतीन आयज लेगीत आमी विज्ञान, तंत्रज्ञानाचो वापर गरिबांच्या कल्याणा खातीर करता, अशें डॉ. रघुनाथ माशेलकार हांणी सांगलें. जीसीसीआय आनी वर्ल्ड पीस युनिव्हर्सिटी, गोंय हांच्या जोडपालवान आयोजीत केल्ले कार्यावळींत ते उलयताले. ह्या वेळार मुख्यमंत्री डॉ प्रमोद सावंत, मंत्री मॉविन गुदिन्हो, डॉ. राहुल कराड, प्रतिमा धोंड उपस्थीत आशिल्ली. ते आदीं डॉ. माशेलकार हांकां गोमंत गौरव सन्मानान भोवमानीत केले.
डॉ. माशेलकार हांणी सांगलें, आपलें भुरगेंपण खूब कश्टाचें आशिल्लें. शिक्षण नाशिल्ल्यान आवयक नोकरी मेळूंक ना. मात ही गजाल तिच्या मनात खूब लागिल्ली. आपणे शिकचें, हे खातीर तिणें खूब कश्ट घेतले. आपणे पीएच.डी. मेळयली तेन्ना लेगीत तिणें ताचे मुखार लेगीत शिकपाक जाय, असो आगरो धरलो. केन्नाच शाळेंत वचूंक नाशिल्ले आवयन सदांच आपल्याक उर्बा दिली. तिकाच लागून आयज आपूण हे सुवातेर पावला. आपल्याक नोकरी लागले उपरांत आपूण तिका दर म्हयन्याक तिका कांय पयशे धाडटालो. ते तिणें खर्च करिनासतना निमाणे मेरेन संबाळून दवरिल्ले. आपली सुरवात खंयच्यान जाली हें केन्नाच विसरचें न्हय, अशें तिणें आपल्याक सांगिल्लें.
आवय भायर पडले उपरांत आमी सामान्य लोकां खातीर अंजनी फावंडेशन सुरू केलें. तातूंत आधुनीक तंत्रज्ञानाचो वापर करून समाज उपेगी उपकरणीं, सेवा, वस्तू तयार करपाचेर आमचो भर आसा. दुसऱ्याची नक्कल करचे परस फुडारांत उपेगांत येतले अशे कल्पक उपक्रम आमी करतात. गोमंत गौरव सन्मानान भोवमानीत जावप ही अभिमानाची गजाल. हो भोवमान आपूण आपले आवयक समर्पीत करता. लोकांच्यो सदित्सा हेंच आमचें भांडवल आसा. हे बाबतींत आमी गिरेस्त आसात, अशें डॉ. माशेलकार हांणी सांगलें.
2035 तल्या गोंय सुरमयी, संसुस्कृत, संतुलीत, सुविद्य, समृद्ध, सुशासन आनी स्वानंदी आसतलें, अशें सपन आमी पळयलां.
गोंयकारां खातीर अभिमानाची गजाल : मुख्यमंत्री
डॉ. रघुनाथ माशेलकार हांकां हो भोवमान मेळप ही समेस्त गोंयकारां खातीर अभिमानाची गजाल आसा. तांच्या अंजनी फावंडेशनान तयार केल्ली वैजकी चांचणी स्ट्रीप बेगिनूच गोंयांत उपलब्ध करून दितले. तातूंत 100 रुपयांनी 10 तरांच्यो वैजकी चांचण्यो 10 मिनटांत जातल्यो. गोंयांत वर्ल्ड पीस युनिव्हर्सिटीचें काम फुडल्या शिक्षणीक वर्सां सावन सुरू जातलें, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
