थळाव्यो वेंचणुको घेवपाचे सगळे अधिकार राज्य वेंचणूक आयोगाक

भांगरभूंय | प्रतिनिधी

पालिका वेंचणुको फुडें धुकलपाची शक्यताय

पणजीः पालिका वेचणुके सयत सगल्यो थळाव्यो वेचणुको घेवपाचे अधिकार हे राज्य वेंचणूक आयोगाक दिल्यात. हे विशींचे अध्यादेशाक राज्य मंत्रीमंडळान शुक्रारा मान्यताय दिला. हे अधिकार आता आयोगाकडेन गेल्ल्यान आरक्षण आनी प्रभाग फेररचणुक प्रकीया पुराय करपा खातीर वेळ लागपाक शकता. देखून पालिका वेंचणुको फुडे वचपाची शक्यताय आसा.
मंत्रीमंडळ बसके उपरांतची म्हायती दितना मुख्यमंत्री डॉ. प्रमोद सावंत हांणी सांगलें, मंत्रीमंडळ बसकेंत तांणी एक अध्यादेश समंत केला. तातूंत पालिका, पंचायत, जिल्लो पंचायत ह्यो सगल्यो थळाव्यो वेचणुको घेवपाचे सगळे अधिकार राज्य वेचणूक आयोगाक दिवपाचो निर्णय घेतला.
ह्यो वेचणुको घडोवन हाडपा खातीरचे सगळे अधिकार आयोगा कडेन दिवपाची पयलीं सावन मागणी आशिल्ली. ही भौसाची मागणी मान्य करीत सगले हक्क आयोगाक दिवपाचो मुखेल निर्णय मंत्रीमंडळान घेतिल्ल्याचें मुख्यमंत्र्यान सांगलें.
मजगतीं, राज्याचे अॅडव्होकेट जनरल देविदास पांगम हांणी सांगलें, पालिका वेचणुको घेवपाचे सगले अधिकार राज्य वेंचणूक आयोगाक दिल्यात. आरक्षण आनी प्रभाग फेररचणूके खातीर आयोगाक वेळ लागतलो. हे कारणांक लागून वेंचणुको फुडे धुकलपाची शक्यताय आसा.
पालिका कायद्यांत दुरूस्ती करून फेररचणूक आनी आरक्षण थारवपा सयत वेंचणूक घेवपाचे सगळे अधिकार आयोगाक दिल्यात. फेररचणूक आनी आरक्षण थारवचे पयली आयोगान मसुदो उजवाडाक हाडून लोकांची आक्षेप आनी हरकती नोंद केले उपरांत निमणी अधिसुचोवणी जारी करपाक जाय. हे पुराय प्रक्रीये खातीर वेळ मर्यादा बसयल्या, अशी म्हायती पांगम हांणी दिली.
जी वेळ मर्यादा हे प्रक्रीये खातीर थारयला त्या आदाराचेर वेळापत्रक तयार करचे पडटले आनी उपरांत वेंचणुको घेवचो पडटलो. सद्या कितल्या दिसां खातीर वेळ मर्यादा थारयला हे विशीं सद्या म्हाका तितली म्हायती ना. पूण वेचणूक प्रक्रीयेचो वेळ वाडटलो देखून पालिका वेंचणुको मात्श्यो फुडें वतल्यो, अशें पांगम हांणी सांगलें.

हे विशीं अदीक म्हायती दितना पालिका प्रशासन संचालनालयाचे वरीष्ठ अधिकाऱ्यान सांगलें की फक्त सांखळी आनी फोंडे पालिका सोडून सगळे 11 पालिकांच्यो वेंचणुको फुडे धुकलपाची शक्यताय आसा.
27 मे दिसा ह्या पालिकांचो कार्यकाळ सोंपता आनी हे तारखे पयलीं वेंचणुको घेवप गरजेचें आसा. निकाल जाहीर जाता ती तारीख न्ही तर जेन्ना पालिकेची पयली बसका सुरू जाता तेन्ना सावन फुडल्या पांच वर्सां खातीर पालिकेचो कार्यकाळ थारता. सद्या 5 पालिकांचेर आमी प्रशासक नेमल्यात आनी केपे पालिकेचेर काय दिसांनी प्रशासकाची नियुक्ती जातली. उपरांत पांवड्या पांवड्यार हेर पालिकांचेर प्रशासक नेमतले, अशी म्हायती अधिकाऱ्यान दिली.