भांगरभूंय | प्रतिनिधी
साश्टींतल्या पंचायतींची पर्यटन खात्या कडेन मागणी
पणजीः दृश्टी आनी दर्यादेगेचो कोयर नितळ करपी कंत्राटदाराक दर्यादेगेर भोंवपी बेवारशी सुण्यांचो बंदोबस्त करपा खातीर कंत्राट दिवचें. तशेंच पोशिल्ल्या सुण्यांच्या गळ्यांत बिल्लो घालचो आनी बेवारशी सुण्यां खातीर दोंगराळ वाठारांत आलाशिरो केंद्र उबारचें अशी मागणी साश्ट म्हालातल्या दर्यादेगे वेल्या पंचायतींनी केल्या.
बेवारशी सुण्यांचे समस्ये विशीं चर्चा करपा खातीर पर्यटन खातें आनी साश्ट म्हालांतल्या पंचायतीच्या सरपंचांची बसका जाली. हे बसकेंत पर्यटन खात्याचे संचालका सयत पशू वैजकी खात्याचे अधिकारी, पंचायत संचालनालयाचे अधिकारी, मिशन रॅबीस आनी हेर तज्ञ हजर आसले.
बसके उपरांत म्हायती दितना बाणावलेचे सरंपच डिक्सन वाझ हांणी सांगलें, बेवारशी सुणीं पर्यटकांक घांस मारतात, तांकां त्रास करतात हे विशींचीं कितलींशींच पत्रां बरयल्यांत. पूण कोणेच हाची अजून दखल घेवंक ना.
पर्यटक आमचे पोट जावन आसा. जर सुणीं चड जावन पर्यटक उणे जायत जाल्यार आमचे तरणाटे बेकार उरतले. पूण हे बसकेंत आमकां फावो तसो प्रतिसाद मेळूंक ना. पूण हे बसकेंत आमी आमचे मुद्दे स्पश्ट मांडल्यात, अशे वाझ हांणी म्हणलें.
पर्यटन खातें दृश्टी आनी दर्यादेग नितळसाणेचेर इतले पयशे मोडाटात. ते खातीर खात्यान ह्या कंत्राटदारांक प्रशिक्षण दिवन जी आक्रमक सुणीं आसात तांकां धरपाची जापसालदारकी दिवची अशें आमी सुचयलां. ही मागणी मान्य करून हे विशींचो प्रस्ताव तयार करपाचें सांगलां. पयलीं सुण्यांक जसो बिल्लो मारताले तसो आतां परतून सुरू करून सुण्याच्या पट्ट्याचेर पत्तो आनी धनयाचें नांव आशिल्लो बिल्लो दिवचो, असो सल्लो वाझ हांणी दिलो.
बेवारशी सुण्यांचो बंदोबस्त करपाक सुरवात करतना ज्या गांवगिऱ्या वाठारांनी दोंगराळ वा रानां वाठार आसात थंयसर तांकां आलाशिरो केंद्रां उबारचीं. तांकां एका बारीक सुवातेंत कैद करचे सोडून एक 30 हॅक्टर मेरेन रानांत सुवात सोदची आनी थंयसर तांकां भोंवपाक मेकळीक दिवची, अशी सुचोवणी वाझ हांणी केली.
दर्यादेग वाठारांत खूबशीं बेवारशी सुणीं लोकांक, पर्यटकांक घांस मारतात. जाण्टे लोक रस्त्यार वा दर्यादेगेर पासय मारताले ते भियेवन घरा बसल्यात, अशें बेताळभाटीचे सरपंच मेनो फर्नांडीस हांणी सांगलें.
सरकारान जीं व्हडलीं रानां आसात त्या रानां भितर एक बारीक आलाशिरो घर करून बेवारशी सुण्यांचे स्थलांतर करचें. शॅक आसात म्हूण हीं सुणीं दर्यादेगेर भोंवतात. पूण शॅक बंद जाले उपरांत हीं सगलीं सुणी गांवांनी येवन कोंबयो, दुकरांचें लुकसाण करतात. देखून तांकां एक आलाशिरो घर करचें, अशी मागणी फर्नांडीस हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
