भांगरभूंय | प्रतिनिधी
पणजी : गोंयांतत स्मार्ट वीज मिटर बसोवचे पयलीं खात्यान तशेंच आपणें स्वता लेगीत ताचो खोलायेन अभ्यास केला. स्मार्ट मिटराक लागून लोकांचोच फायदो जातलो. आमी केंद्र सरकार, जेईआरसीच्या नेमां प्रमाणूच स्मार्ट मिटर बसयतात. हाका लागून ह्या विशयाचेर आतां कसलेच तरेची चर्चा जावची ना. मिटर बसयले उपरांत ताचो निकाल बरोच येतलो अशी आमची खात्री आसा. उपरांत आमी हे विशीं चर्चा करपाक शकतात, अशें वीज मंत्री सुदिन ढवळीकार हांणी सांगलें. ते बिरेस्तारा अखील भारतीय थळावे प्रशासन संस्थेचे कार्यावळी उपरांत माध्यमां कडेन उलयताले.
आधुनीक गजाली लागू करपाक गोंय देशांत मुखार आसा. गोंयच्या लोकांक अजूनय स्मार्ट मिटराचे फायदे खबर नात. स्मार्ट मिटराक लागून गिरायकांक आपल्याक खंयच्या उपकरणाक लागून बील चड आयलां हें समजतलें. घरांतलीं लायटीचीं उपकरणां चुकून चालू उरल्यार हेर सुवातांचेर वचून मोबायला वरवींय वीज बंद करतले. ही प्रणाली प्रीपेड आशिल्ल्यान गिरायकांक हाचो फायदो जातलो.
ताचे पयलीं जाल्ले कार्यावळींत ढवळीकार हांणी देशभरचे थळावे नागरीक संस्थेच्या महापौर, नगरसेवकां कडेन उलोवप केलें. ढवळीकार हांणी मुखार म्हणलें, अखील भारतीय थळावी प्रशासन संस्था ही राज्य आनी केंद्र सरकारा मदलो दुंवो. नव्याच नियुक्त केल्ल्या नगरसेवकां खातीर मार्गदर्शन करपाचें काम संस्था करता. विकसीत भारताचें सपन पुराय करपा खातीर दरेक लोक प्रतिनिधीन उमेदीन काम करचें. थळाव्या स्वराज्य संस्थांनी नागरीक केंद्रीत कामांक प्राधान्य दिवचें. तांणी शाश्वत उदरगतीचीं कामां करचीं. बरें प्रशासन दिवप ही आमची सगल्यांची जापसालदारी आसा. फोंडें पोटवेंचणुकेचें प्रकरण सध्या सर्वोच्च न्यायालयांत आशिल्ल्यान हे विशीं आपूण कसलीच प्रतिक्रिया दिवचो ना. विधानसभा अधिवेशना विशीं कॅबिनेट योग्य तो निर्णय घेतलें. कॅबिनेटांत निमाणो निर्णय घेवपाचो अधिकार फकत मुख्यमंत्र्यांक आसा, अशें ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
