भांगरभूंय | प्रतिनिधी
कोयर वेवस्थापन समितीचे बसकेंत निर्णय
हरमल, बातमीदार : हरमलच्या दर्यादेग आनी पंचायत वाठारांत कोयराचें राज्य जालां. पर्यटन स्थळांच्या नांवाची वाट लागची न्हय देखून हांगच्या वेवसायिकांनी ओलो आनी सुको कोयर वेगळो करून दिवन सहकार्य करचें, असो म्हत्वाचो निर्णय कोयर वेवस्थापन समितीचे बसकेंत घेतलो.
ह्या वाठारांतल्या कांय वेवसायिकांनी आपलो वेवसाय कराराचेर भाड्याक दिला. पूण पंचायत शुल्क उण्या प्रमाणात भरता अशें निदर्शनांत आयिल्ल्यान दंडात्मक कारवाय जावपाची शक्यताय आसा. ताका लागून नव्या नेमां प्रमाण डेटा एकठांय करपाचें काम चालूच आशिल्ल्यान सगळ्यांनी हाका सहकार्य करचें असो उलो सरपंच बर्नार्ड फेर्नांडीस हांणी मारला.
हे बसकेचे अध्यक्ष सरपंच फेर्नांडीस आशिल्ले. कोयर एकठांय करपी कंत्राटदारान कोयरा विशीं जावपी गैर वेवस्था समितीक कळयल्या. समितीन वेवसायिकां खातीर खासा सुचवण्यो करपाचें थारायलां. वेवसायिकांची वळेरी तयार करपाचें काम बेगीन करपा खातीर पावलां उखलचीं, तशेंच गरज पडल्यार दिसवड्याचेर कामगारांक घेवन काम पुराय करपाचें सगळ्यांनी थारायलां. कोयर एकठांय करपाच्या कंत्राटदाराचे मजतीन वाड जाल्या, तो मेरेन नव्या कंत्राटदाराचे नियुक्तीचें सोपस्कार पुराय करपाचें थारलां.
फाटल्या कंत्राटदाराक निमाणो हप्तो दिवपाचें थारलें आनी त्या कंत्राटदारान कोयर उखलतना कांय कोयर फोंडकुलांनी उडयल्ल्यान तो उखलपाक मंजुरी आनी हेर खर्च, त्या कंत्राटदारा कडल्यान वसूल करपाचें थारलें. ह्या वेळार सरपंच बर्नार्ड फेर्नांडीस, पंच अनुपमा मयेंकार, सोनाली माज्जी, सांतान फेर्नांडीस तशेंच महेश वायगंणकार, समीर कुडव, गुरुदास नानोस्कार, मिनीन माशादो हाजीर आशिल्ले. पंचायत सचीव सचिन धावस्कार हांणी मार्गदर्शन केलें. समितीचे सचीव चंद्रहास दाभोलकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
