भांगरभूंय | प्रतिनिधी
म्हापशें: हणजूण्यां मोबायल फोन झोमून व्हरप तशेंच भाड्याचे कुडींत चोरी केल्ल्या प्रकरणांत तिगां दुबावितांक अटक केल्या. अटक केल्ल्यां मदीं डॅनिएल दास सांडोस आवेरो (27, दक्षीण केरळ), आमीर अहम्मेद शेरवान (25, कन्नीपराम्बा केरळ) आनी गगन ओमकार दीप सिंग (अंबाला हरियाणा) ह्या दुबावितांचो आस्पाव आसा.
सोमारा 24 वेर सांजवेळा हणजूण्यां पार्कींग थळा कुशीक कागाळदार मुहम्मद सिनान आनी ताचो इश्ट फसलू रहमान हांच्या हातांतलो अनवळखी दुचाकी चालक चोरांनी 52 हजारांचे दोन मोबायल फोन झोमून व्हेल्ले.
ह्या चोरांच्या दुचाकीचो जीए 11 बी 8966 हो क्रमांक कागाळदारान नोंद केल्लो. कागाळी बराबर ताणें पुलिसांक हो दुचाकीचो क्रमांक दिल्लो. त्या आदाराचेर पुलिसांनी दुबावीत डॅनिएल आवेरो आनी अमीर शेरवान ह्या दोगांक अटक केली आनी चोरिल्ले मोबायल जप्त केले.
मजगतीं, फाटल्या 19 वेर कागाळदार हरीश कुमार (राजस्थान) हांच्या भाड्याच्या कुडींतल्यान दुबावीत गगन दीप सिंग (अंबाला हरियाणा) हाणें कागाळदार आनी तांच्या वांगड्यांचे 65 हजारांचे मोबायल फोन चोरून व्हेल्ले. ह्या प्रकरणांत पुलिसांनी दुबाविताक अटक केली आनी चोरिल्लो 10 हजारांचो एक मोबायल जप्त केलो. ह्या दोनूय प्रकरणांचो फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
