भांगरभूंय | प्रतिनिधी
मडगांवां रस्तो सुरक्षा सप्तक : वाहन चालकां मदीं जागृताय
मडगांव, प्रतिनिधी : रस्तो सुरक्षा ही म्हत्वाची गजाल आशिल्ल्यान हे विशीं जागृताय जावन गरजेचें. कांय नेम पाळ्ळ्यार अपघात तशेंच अपघातांत मरण येवप्यांचो आंकडो देंवतलो. वेगान वचपा परस स्वताचो आनी दुसर्याचो जीव वाटावपा खातीर रस्तो सुरक्षा नेम पाळप गरजेचें, असो उलो मडगांवचे येरादारी पुलीस निरीक्षक संजय दळवी हांणी मारलो.
मडगांवां गार्डना कुशीक रस्तो सुरक्षा नेमां विशीं जागृताय केली. ह्या वेळार मडगांव येरादारी पुलीस खात्याचे अधिकारी आनी कर्मचारी हांचे वांगडा जेसीआयचे अधिकारी हाजीर आशिल्ले. येरादारी पुलिसांनी नेमां विशीं पत्रकां वांटून जागृताय केली.
ह्या वेळार मार्गदर्शन करतना दळवी हांणी सांगलें, हेल्मेट घालतना ताचो बेल्ट लावप गरजेचें. नाजाल्यार अपघाता वेळार हॅल्मेट तकलेवयल्यान पडून जखमो जावपाची शक्यताय आसता. तालांव मेळटा म्हणून हेल्मेट वा सीट बेल्ट घालपाची संवय मोडची. स्वताच्या जिवाची राखण करपाक ह्यो गजाली करच्यो, अशें तांणी सांगलें.
लोकां मदीं रस्तो सुरक्षा विशीं जागृताय करपा खातीर यत्न करतात. दरेक जीव म्हत्वाचो. ताका लागून रस्तो सुरक्षा नेम पाळचे आनी ते लोकां मेरेन पावपूय गरजेचें अशें जेसीआय मडगांवची सोनल नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
