भांगरभूंय | प्रतिनिधी
-येरादारी वेवस्था, रस्तो सुरक्षा, धुल्ल प्रदेशणाच्या आदेशाची अंमलबजावणीचो आदेश
पणजी: पणजे स्मार्ट सीटीच्या कामांक लागून नागरिकांक जावपी अडचणींची म्हायती घेवपा खातीर मुंबय उच्च न्यायालयाचे न्यायाधीश 1 एप्रील 2024 दिसा सांजे 5.00 वरांचेर पळोवणी करतले.
मजगतीं, राज्य सरकारान येरादारी वेवस्था, रस्तो सुरक्षा आनी धुल्ल प्रदुशण आडावपाक जारी केल्ल्या निर्देशांची योग्य अंमलबजावणी करपाचो आदेश न्यायालयान जारी केला.
फाटल्या जायत्या म्हयन्यां पसून स्मार्ट सीटीच्या कामांक लागून जावपी गैरवेवस्था आनी धुल्लाचें प्रदुशण उणें करपा खातीर सरकारी आनी इमॅजीन स्मार्ट सीटी डेव्हलपमेंट कॉर्पोरेशन लि. (आयपीएससीडीएल) हांकां ताकतिकेन निर्देश दिवचे, अशी विनवणी करपी जनहीत याचिका पियुष पांचाल, आल्वीन डिसा आनी निलब नावेलकार ह्या तिगांयनी न्यायालयांत दाखल केल्या. ते उपरांत दाखल जाल्ली ही दुसरी याचिका पणजेंतल्या ख्रिस्तस लोपीस आनी सदानंद वायंगणकार हांणी दाखल केल्या. ह्या दोनूय याचिकेंत पणजेे स्मार्ट सीटी खाला सुरू आशिल्ल्या कामांक लागून तीन नागरिकांक मरण आयलें. तशेंच घाळपणान सुरू आशिल्ल्या कामांचो थळाव्या नागरिकांक त्रास सोंसचो पडटा, असो दावो याचिकेंत केला. तशेंच स्मार्ट सीटीच्या कामांक लागून पोरूं पावसाळ्यांत पणजीकारांचे हाल जाल्ले. अंदूं मॉन्सून सुरू जावपा पयलीं ही कामां पुराय जालीं ना जाल्यार पोरू सारकीच स्थिती निर्माण जावपाची शक्यताय उक्तायल्या.
हे संदर्भांत न्यायालयान सुनावणी घेवन सरकाराक येरादारी वेवस्था, रस्तो सुरक्षा आनी धुल्ल प्रदुशण आडावपा खातीर कितें उपाय येवजण्यो आंखल्यात हाची म्हायती दिवपाक सांगिल्लें. ते प्रमाण बुधवारा सुनावणी जाल्ली, तेन्ना सिवरेजीचें 85 टक्के काम पुराय केला. कांय वाठारांत खणकाम सुरू आशिल्ल्यान थंय धुल्ल प्रदुशण जावपाची शक्यताय आसा. ते खातीर कंत्राटदार थंय दिसा दोन खेपे टॅकरा वरवीं उदकाची फवारणी करता. तशेंच 1 एप्रील पसून संबंदीत वाठारांतली रस्त्या वयलीं माती, धुल्ल काडटले. तशेंच कामां सुरू अाशिल्ल्या वाठारांनी फुडल्या तीन दिसांत येरादारी आनी हेर संदर्भांत सुचोवणी तकटे लायतले. ज्या वाठारांत काम सुरू आसा थंयच्या रस्त्या वयली येरादारी घुंवडायल्या. थंय येरादारी पुलिसांची वेवस्था केल्या. नागरिकांच्या सुरक्षे खातीर थंयचो रस्तो बंद दवरला.
तेच प्रमाण थंय बॅरिकेड लायल्यात. सरकारान 31 मे मेरेन सगलीं कामां पुराय करपाचे निर्देश संबंदितांक दिल्यात. ते खातीर अतिरिक्त मनीसबळ आनी हेर वेवस्था करपाक कंत्राटदाराक सांगिल्ल्याची म्हायती अॅडव्होकेट जनरल देविदास पांगम हांणी न्यायालयांत दिली.
————-
न्यायालयान घेतली स्वच्छा दखल
याचिकेची स्वेच्छा दखल घेवन न्यायालयान गोंय राज्य प्रदुशण नियंत्रण मंडळ (जीएसपीसीबी) याचिकादार तशेंच म्हानगरपालिका आनी हेर अधिकाऱ्यांक फुडले पांच दीस स्मार्ट सीटी कामां संदर्भांत समन्वयक नेमून वाठारांतली धुल्ल प्रदुशणाचें मेजमाप करचें. तशेंच ह्या काळांत धुल्ल प्रदुशण उणें करपा खातीर, नागरिकांच्या सुरक्षा आनी येरादारी वेवस्था हाचेर भर दिवपाचे निर्देश दिल्यात. 1 एप्रील दिसा सांजे उच्च न्यायालयाचे न्यायाधीश कामांची पळोवणी करतले, अशी म्हायती न्यायालयान दिल्या. तशेंच ह्या प्रकरणाची फुडली सुनावणी 2 एप्रीलाक जातली, अशेंय सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
