भारतांत जाली पाकिस्तानी चलयेचेर काळजाच्या प्रत्यारोपणाची येसस्वी शस्त्रक्रिया
भांगरभूंय | प्रतिनिधी
चेन्नय, खबरां संस्था ः भारतान परत एक फावट दुस्मानकाय विसरून संवसारा मुखार मनीसपणाची देख दवरल्या. पाकिस्तानांतल्या कराची शारांत रावपी आयेशा रशीद (19) हे चलयेची काळजाची प्रत्यारोपणाची शस्त्रक्रिया (Heart Transplant) येसस्वीपणान जाल्या. आयेशाक 2019 वर्सा काळजाचे दुयेंस जाल्ल्याचें कळ्ळें. आयेशाच्या कुटुंबान तिका उपचारा खातीर भारतांत धाडली. चेन्नयच्या दोतोरांच्या देखरेखी खाला तिचेर उपचार सुरू आशिल्ले. पूण ताचे उपरांतय तिका काळजाचे त्रास जावपाक लागले. ते उपरांत तिका परत चेन्नय हाडली आनी तिची शस्त्रक्रिया केली.
आयेशाक 2019 वर्सा सावन काळजाचो त्रास जातालो
आयेशाक काळजाचो त्रास आसा हें कळटकच तिच्या कुटुंबाचेर ताण आयलो. तिची अर्थीक स्थितीय बरी ना. चेन्नयांतल्या एमजीएम हेल्थकेअर हार्ट ट्रान्सप्लांटाचे मुखेली डॉ. के. आर. बालकृष्ण हांणी तिची मजत केली. 31 जानेवारी 2024 दिसा हार्ट एअर एम्ब्युलन्साच्या आदारान तिका दिल्लींतल्यान चेन्नय हाडली. आनी आयेशाच्या काळजाचें प्रत्यारोपणाची शस्त्रक्रिया करपाची थारायली. तशेंच आयेशाक ताणी अर्थीक मजतय केली. आनी आयेशाची येसस्वी शस्त्रक्रिया जाली.
डॉ. के. आर. बालकृष्ण हांणी सांगलें, आयेशा पयलेच खेपे 2019 वर्सा आयल्ली. त्या वेळार तिचें काळीज बंद जाल्लें. त्या वेळार तिका सीपीआर दिल्लो. कृत्रीम श्वसनय दिताले. ते उपरांत ती बरी जाली. आनी परत पाकिस्तानाक गेली. पूण पाकिस्तानांत गेले उपरांत तिका चड त्रास जावंक लागले. पाकिस्तानांत गरजेचीं उपकरणां नाशिल्लीं आनी तिची अर्थीक स्थितीय बरी नाशिल्ली. त्या वेळार ऐश्वर्याम ट्रस्ट तिच्या मजतीक आयलो आनी तिचेर उपचार जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
